ޗައިނާގެ މޫސުމާ ބެހޭ ފުއްޕާހަން އެމެރިކާ އިން ގޮއްވާލައިފި

އެމެރިކާގެ ވައިގެ ސަރަހައްދުގެ ތެރެއިން ވަރަށް އުހުގައި ދަތުރުކުރަމުން ދިޔަ، ޖާސޫސީ ފުއްޕާހަމެއް ކަމަށް އެމެރިކާ އިން ތުހުމަތުކުރި ޗައިނާގެ މޫސުމީ ދިރާސާތަކާ ބެހޭ ފުއްޕާހަން، އެމެރިކާގެ ވައިގެ ސިފައިންގެ ހަނގުރާމަމަތީ މަތިންދާބޯޓުތަކުން ދިން މިސައިލް ހަމަލާއެއްގައި ގޮއްވާލައި ވައްޓާލައިފި އެވެ.

އެމެރިކާ އިން މި ފުއްޕާހަން މި ވައްޓައިލީ، އެމެރިކާގެ ވައިގެ ސަރަހައްދުގެ ތެރެއަށް ވަދެ އުޅޭކަން ފާހަގަކުރެވުނުތާ ހަފުތާއަކަށް ވުރެ ގިނަ ދުވަސްވެ، އެކަމާ މެދު އާންމު ރައްޔިތުންގެ ފާޑުކިޔުންތައް އެމެރިކާ ސަރުކާރަށް ކުރިމަތިވެފައި ވަނިކޮށެވެ.

އެމެރިކާގެ ވައިގެ ސަރަހައްދަށް މި ފުއްޕާހަން އެންމެ ފުރަތަމަ ވަނީ މިދިޔަ ޖެނުއަރީ މަހުގެ 28 ވަނަ ދުވަހު އެވެ. އެމެރިކާގެ އެލަސްކާގެ ހުޅަނގުން އޮންނަ އެލޫޝިއަން ޖަޒީރާތަކުގެ މަތީގައި ތިން ދުވަސް ހޭދަކުރުމަށް ފަހު، ދެން އެ ފުއްޕާހަން ދަތުރުކުރީ ކެނެޑާގެ ވައިގެ ސަރަހައްދުގެ ތެރެއަށެވެ.

އޭގެ ފަހުން ޖެނުއަރީ 31 ވަނަ ދުވަހު އަނެއްކާ ވެސް، އެ ފުއްޕާހަން އެމެރިކާގެ ވައިގެ ސަރަހައްދުގެ ތެރެއަށް ވަނެވެ. މިފަހަރު މި ހަން ފެނުނީ ކެނެޑާ އާއި އެމެރިކާ ގުޅޭ ސަރަހައްދީ ރޮނގު ކައިރީގައި އޮންނަ، އެމެރިކާގެ ސްޓޭޓެއް ކަމަށްވާ މޮންޓާނާގެ ވައިގެ ސަރަހައްދުންނެވެ. މިއީ އެމެރިކާގެ ނިއުކްލިއާ މިސައިލްތައް ގިނަ އަދަދަކަށް ރައްކާކޮށްފައި ހުންނަ އަސްކަރީ މަރުކަޒުތަކެއް ހިމެނޭ ސްޓޭޓެކެވެ.

އެންމެ ފުރަތަމަ ފަހަރަށް މި ފުއްޕާހަން އެމެރިކާގެ ވައިގެ ސަރަހައްދުގެ ތެރެއިން ފެނުމާއެކު ވެސް، މިސައިލް ހަމަލާއެއްގައި މި ހަން ގޮއްވައިލުމާ މެދު އެމެރިކާގެ އިސް ވެރިންގެ މެދުގައި މަޝްވަރާ ކުރެވުނެވެ. ނަމަވެސް، އެމެރިކާގެ އެއްގަމު ސަރަހައްދުންގެ ވައިގެ ތެރޭގައި ގޮއްވާލައިފި ނަމަ، އޭގެ ބައިތައް ބިމަށް ވެއްޓި އާންމުންނަށް ގެއްލުމެއް ލިބިދާނެތީ، އެކަން ފަސް ކޮށްލީ އެވެ.

އެންމެ ފަހުން މި ހަން ގޮއްވައިލީ އެއްގަމު ސަރަހައްދުން ނެއްޓި ކަނޑުގެ ސަރަހައްދުގެ ވައިގެ ތެރެއިން ދަތުރު ކުރަމުން ދަނިކޮށެވެ. އެމެރިކާގެ އެފް-22 މަރުކާގެ ހަނގުރާމަމަތީ މަތިންދާބޯޓަކުން ފޮނުވައިލި މިސައިލެއް އެ ހަމުގައި ޖެހުމާއެކު ވައިގެ ތެރެއަށް އެ ހަން ގޮވި އެވެ. އަދި އޭގެ އެހެން ބައިތައް، އެމެރިކާގެ ދެކުނު ކެރޮލީނާގެ އިރުމަތީ އައްސޭރި ފަށުން ފެށިގެން ހަ މޭލު ދުރުން ކަނޑަށް ވެއްޓުނެވެ.

ޗައިނާގެ ޖާސޫސީ ހަމުގެ ބައިތައް، ކަނޑުގެ ހަތް މޭލުގެ ސަރަހައްދަކަށް އެޅިފައިވާ ކަމަށް އެމެރިކާގެ އަސްކަރިއްޔާ އިން ބުނެ އެވެ. އެހެންކަމުން އެމެރިކާގެ ކަނޑުގެ ސިފައިންގެ ދެ މަނަވަރެއް މިހާރު ދަނީ، އެ ބައިތައް ނެގުމަށްޓަކައި، އެ ސަރަހައްދުގައި ހަރަކާތްތެރިވަމުންނެވެ.

އެމެރިކާގެ ދިފާއީ ވުޒާރާ ޕެންޓަގަން އިން ބުނި ގޮތުގައި ޗައިނާގެ ޖާސޫސީ ފުއްޕާހަމުގެ ބައިތަކަކީ، އެމެރިކާ އަށް ވަރަށް މުހިންމު މައުލޫމާތުތަކެއް ލިބިދޭނެ އެއްޗެހިތަކެކެވެ. އެހެންކަމުން، އޭގައި ހުރި ހުރިހާ އާލާތްތަކެއް ހޯދައި އެތަކެތީގައި ހިމެނޭ މައުލޫމާތުތައް ދިރާސާކުރާނެ ކަމަށް ޕެންޓަގަން އިން ބުންޏެވެ.

ނަމަވެސް ޗައިނާ އިން ބުނި ގޮތުގައި އެއީ މޫސުމާ ބެހޭ ދިރާސާތަކަށް ޚާއްސަ ކޮށްފައިވާ ފުއްޕާހަމަކެވެ. އަދި އޭގައި އެއްވެސް ގައުމަކަށް ގެއްލުމެއް ކުރިމަތިވެދާނެ ފަދަ ވަސީލަތެއް އަދި އާލާތެއް ވެސް ނުހުންނާނެ ކަމަށް ޗައިނާ އިން ބުނެ އެވެ.

މި ފުއްޕާހަން ވައްޓައިލިތާ ދެތިން ގަޑިއިރު ފަހުން، ޗައިނާގެ ޚާރިޖިއްޔާ އިން ނެރުނު ބަޔާނެއްގައި ވަނީ، އެމެރިކާގެ އެ އަމަލު ކުށްވެރިކޮށްފަ އެވެ. އަދި އެއްވެސް ނުރައްކަލެއް ނެތް ހިސާބަކުން ދަތުރު ކުރަމުން ދިޔަ މަދަނީ ވައިގެ އުޅަނދެއް، އަސްކަރީ ބާރުގެ ބޭނުންކޮށްގެން ވައިޓައިލުމަކީ ޒިންމާދާރުކަން ކުޑަ އަމަލެއް ކަމަށް ވެސް ޗައިނާ އިން ބުންޏެވެ.

"އެ ފުއްޕާހަމަކީ މަދަނީ ކަންކަމުގައި ބޭނުންކުރާ ހަމެއް ކަމާއި، އެ ހަން އެމެރިކާގެ ވައިގެ ސަރަހައްދަށް ވަދެފައިވަނީ، މޫސުން ގޯސްވެ ވައި ބާރުވުމުގެ ސަބަބުން ގަދަ ވަޔާ އެކުގައިކަމާއި، އެއީ އެއްވެސް ހާލެއްގައި ގަސްދުގައި ކޮށްފައިވާ ކަމެއް ނޫންކަން، ޗައިނާގެ ކަމާ ބެހޭ އިދާރާތަކުން ވާނީ އެމެރިކާގެ ރަސްމީ އިދާރާތަކަށް ތަކުރާރުކޮށް އަންގައިފަ،" ކަމަށް ޗައިނާގެ ޚާރިޖިއްޔާ އިން ނެރުނު ބަޔާނުގައިވެ އެވެ.

ޗައިނާގެ ފުއްޕާހަން ވައްޓައިލުމަށް، ރައީސް ޖޯ ބައިޑެން އަމުރު ކުރެއްވީ މިދިޔަ ބުދަ ދުވަހު އެވެ. ނަމަވެސް އެ އަމުރު ތަންފީޒު ކުރުން، ޕެންޓަގަން އިން ފަސްކޮށްލީ، އެ ހަން އެމެރިކާގެ އެއްގަމު ސަރަހައްދުން ނެއްޓި ކަނޑުގެ ސަރަހައްދުގެ ވައިގެ ތެރެއަށް ވަންނަންދެނެވެ.

ހީލިއަމް އަޅައިގެން މައްޗަށް އަރުވާ މި ޒާތުގެ ބިޔަ ފުއްޕާހަންތަކަކީ، 80 ހާސް ފޫޓާއި 120 ހާސް ފޫޓާ ދެމެދުގެ އުސްމިނަކުން ދަތުރުކުރާ ހަންތަކެކެވެ. އާންމު ވައިގެ ދަތުރުފަތުރުގައި ބޭނުންކުރާ މަތިންދާބޯޓުތައް ދަތުރުކުރާ އެންމެ އުސްމިނަކީ 42 ހާސް ފޫޓު ކަމަށްވާތީ، މިބާވަތުގެ ހަންތަކުން އެފަދަ އުޅަނދުތަކަށް އެއްވެސް ނުރައްކަލެއް ކުރިމައްޗެއް ނުވާނެ އެވެ.

ޗައިނާގެ މި ހަން ފުއްޕާފައި އޮންނަ އިރު އޭގެ ފުޅާމިނުގައި ގާތްގަނޑަކަށް 90 ފޫޓު ހުރެ އެވެ. މި ހަމުގައި އެލުވިފައި އޮންނަނީ، އޭގައި އެކުލެވޭ އާލާތްތަކާއި އެ އާލާތްތަކަށް ބޭނުންވާ ކަރަންޓު އުފައްދައިދޭ ސޯލާ ޕެނަލްގެ ދެ ފިޔަގަނޑެވެ. މި ހަމުގައި އެކުލެވޭ އާލާތްތަކަކީ، ކެމެރާތަކާއި، ރާޑާރާއި މުވާސަލާތީ ވަސީލަތްތަކާއި ސެންސަރުތަކެވެ.

އެމެރިކާގެ ވައިގެ ސަރަހައްދުގެ ހުޅަނގު ފަރާތުން ވަދެގެން އިރުމައްޗަށް މިހަން ދަތުރުކުރީ އެވްރެޖް ގޮތެއްގައި 60 ހާސް ފޫޓު މަތިންނެވެ. އެހެންކަމުން، މި ހަމުގެ ސަބަބުން ވައިގެ ދަތުރުތަކަށާއި، ބިންމަތީގައި އުޅޭ ބަޔަކަށް އެއްވެސް ނުރައްކަލެއް ނެތް ކަމަށް، އެމެރިކާގެ އަސްކަރިއްޔާ އިން ވަނީ އެމެރިކާ ސަރުކާރަށް ލަފާ ދީފަ އެވެ.

ޗައިނާގެ ޖާސޫސީ ފުއްޕާހަމުގެ މައްސަލަ ފެންމަތިވުމާއެކު، އެމެރިކާގެ ޚާރިޖީ ވަޒީރު އެންޓޮނީ ބްލިންކެން މި ހަފުތާގައި ޗައިނާ އަށް ކުރައްވަން ހަމަޖެހިފައި އޮތް ރަސްމީ ދަތުރު ވެސް ވަނީ، ވަކި ތާރީޚެއް ނެތް ގޮތަށް ފަސް ކޮށްލައްވައިފަ އެވެ.