ހުޅުމާލޭގައި ނައިޓް މާކެޓް ބާއްވަން ހުއްދަ ދޫކުރަނީ

ހުޅުމާލޭގެ ފޭސް އެކެއް އަދި ދޭއްގައި ނައިޓް މާކެޓާއި މަގުމަތީ ބާޒާރު ބާއްވަން ބޭނުންވާ ފަރާތްތަކަށް ސިޓީ ކައުންސިލުން ފުރުސަތު ހުޅުވާލައިފި އެވެ.

މާލޭ ސިޓީ ކައުންސިލުން ކުރި އިއުލާނުގައިވާ ގޮތުން ނައިޓް މާކެޓް ނުވަތަ މަގުމަތީ ބާޒާރު ބާއްވާނެ ގޮތުގެ އުސޫލާ އެއްގޮތަށް ފެއާ އާއި ނައިޓް މާކެޓް ހުޅުމާލޭގައި ބާއްވަން ބޭނުންވާ ފަރާތްތަކަށް އެކަމަށް ހާއްސަ ފޯމު ހުށަހެޅުމަށް އެދިފައިވެ އެވެ.

މަގުމަތީ ބާޒާރު ބޭއްވުމުގެ ހުއްދަދޫކުރުމަށް ކައުންސިލުން ނިންމާފައިވަނީ ކޮންމެ އާ އަހަރު ފެށޭ ދުވަހާއި އަހަރު ނިމޭ ދުވަސް، މިނިވަން ދުވަހާ ގުޅިގެން އަދި ކޮންމެ އަހަރެއްގެ ރޯދަމަހެއް ފެށޭ ދުވަހާ ގުޅިގެންނާއި އަލްހާ އީދާ ގުޅިގެން އަންނަ ބަންދުދުވަސްތަކުގަ އެވެ.

މިކަމުގެ ހުއްދައަށް އެދި އެ ވިޔަފާރިއެއް ނުވަތަ ޖަމިއްޔާއެއްގެ ރަޖިސްޓްރީގެ މައުލޫމާތާއި، ނައިޓު މާކެޓު ބާއްވަން ބޭނުންވާ މުއްދަތާއި މާކެޓު ބާއްވަން ބޭނުންވާ ތަނުގެ މައުލޫމާތު ވެސް ސިޓީ ކައުންސިލާ ހިއްސާ ކުރަން ޖެހޭނެ އެވެ.

މިކަމަށް އެދި އަންނަ އާދިއްތަ ދުވަހުން ފެށިގެން މިމަހުގެ 23 ވަނަ ދުވަހާ ހަމައަށް ފޯމު ބަލައިގަންނާނެ އެވެ.