މިފްކޯގެ ޒަމާންވީ ލޯގޯ ބަދަލުކޮށްފި

މިފްކޯ އިން ދިވެހި މަސްވެރިކަމުގެ ސިނާއަތުގައި ހިދުމަތްކުރާތާ 30 އަހަރު ފުރުން ފާހަގަކުރުމުގެ ގޮތުން ދިވެހިވަންތަ ގޮތަކަށް އެ ކުންފުނީގެ ލޯގޯ ބަދަލުކޮށްފި އެވެ.

މި ލޯގޯ ފާސްކުރީ މިދިޔަ ޖޫން މަހު އެ ކުންފުނީގެ ބޯޑުންނެވެ. މި ލޯގޯ މިއަދުން ފެށިގެން މިފްކޯއިން ވަނީ ބޭނުން ކުރަން ފަށައިފި އެވެ.

މި ބަދަލު ގެނައީ ކުރީގެ ލޯގޯ އަކީ އެ ލޯގޯ ވުޖޫދަށް އައި ދުވަސްވަރާ އަޅާބަލާއިރު ފުރިހަމަ އަދި މިހާތަނަށް ކުންފުންނީގެ ހުރިހާ ކަމެއްގައި ބޭނުންކުރި ލޯގޯ އަށް ވިޔަސް މިހާރުގެ ޑިޖިޓަލް މީޑިއާތަކުގައި އެ ލޯގޯ ބޭނުން ކުރަން ދަތިތަކާ ކުރިމަތިވާތީ ކަމަށް މިފްކޯއިން ބުންޏެވެ.

މިފްކޯއިން ބުނީ އަލަށް ތައާރަފް ކުރި ލޯގޯ ފަރުމާކުރީ ފަންނީ ތަޖުރިބާކާރުންނާ އެކު ގިނަ މަސައްކަތްތަކެއް ކުރެވި، ކުރީގެ ލޯގޯގެ ކުލަތައް ބޭނުންކޮށްގެން ކަމަށެވެ. މިފްކޯގެ އާ ލޯގޯގައި ބޭނުން ކޮށްފައިވަނީ، އެ ކުންފުނީގެ ނަން ރަމްޒުކޮށްދޭ ތާނަ އަކުރުތަކެވެ. އަދި މި ޑިޒައިނުން މިފްކޯގެ އެންމެ އަގުހުރި އަސާސް ކަމަށްވާ ދިވެހި މަސްވެރިކަން ރަމްޒުކޮށްދޭ މަހުގެ ސިފަ ފެންނާނެ އެވެ.

މިފްކޯއިން ބުނީ އެކުންފުނީގެ ބްރޭންޑް "ފަސްމީރު" ގައި ވެސް ދިވެހިވަންތައް އާދަކާދަތަކާއި ސަގާފަތް ހިމެނޭ ފަދަ މަންޒަރުތައް ކުރިއަށް އޮތްތަނުގައި ހިމަނާނެ ކަމަށެވެ.