ނަތަންޔާހޫގެ އިސްލާހީ އެޖެންޑާއާ ދެކޮޅު މުޒާހަރާ ފުޅާވަނީ

އިޒްރޭލުގެ ގާނޫނީ ނިޒާމު އިސްލާހް ކުރުމަށް އެ ގައުމު ބޮޑުވަޒީރު ބިންޔާމީން ނަތަންޔާހޫ ގާނޫނު ހަދާ މަޖިލީހަށް ހުށަހަޅުއްވާފައިވާ ބިލުގެ މަސައްކަތް ފެށުމާއެކު، އެކަމާ ދެކޮޅަށް އާންމު ރައްޔިތުން ފަށާފައިވާ މުޒާހަރާތައް އިއްޔެ އަނެއްކާ ވެސް ވަރުގަދަ ކުރަން ފަށައިފި އެވެ.

އެ ބިލުގެ ވާހަކަ އިޒްރޭލު ސަރުކާރުން އިއުލާން ކުރުމާއެކު، މިދިޔަ ޖެނުއަރީ މަހުގެ ކުރީކޮޅު އިޒްރޭލުގެ ޔަހޫދީންނާއި އިޒްރޭލު ރައްޔިތުންގެ ތެރޭގައި ހިމެނޭ އަރަބިންގެ އިތުރުން ފަލަސްތީނުގެ ބައެއް މީހުން ވެސް ވަނީ، އެ ބިލާ ދެކޮޅަށް މުޒާހަރާ ކުރަން ފަށައިފަ އެވެ. އެ މުޒާހަރާތައް މަޑުޖެހިލާފައި އޮތުމަށް ފަހު، އަލުން މުޒާހަރާތައް ފެށީ މީގެ ދެ ހަފުތާ ކުރިންނެވެ.

ނަތަންޔާހޫގެ ސަރުކާރުން އިއުލާންކޮށްފައިވާ އިސްލާހީ ޕްރޮގްރާމްގައި ހިމެނޭ ގާނޫނުތަކަށް އަމަލުކުރަން ފެށުމުން، އިޒްރޭލުގެ ހައި ކޯޓަށް ލިބިގެންވާ ބައެއް ބާރުތައް އެ ގައުމުގެ ގާނޫނު ހަދާ މަޖިލީހަށް އަދި ބައެއް ބާރުތައް ޖަސްޓިސް މިނިސްޓްރީ އަށް ލިބިގެންދާނެ އެވެ. އެ ގޮތުން ގާނޫނު ހަދާ މަޖިލީހަށް ލިބިގެންދާނެ ބައެއް ބާރުތަކަކީ، ގާނޫނުއަސާސީއާ ޚިލާފު ކަމަށް ބުނެ، މީގެ ކުރިން ހައި ކޯޓުން ބާތިލުކޮށްފައިވާ ބައެއް ގާނޫނުތައް އަލުން ފާސްކުރުމުގެ ބާރު ލިބުމެވެ.

އިސްލާހީ ޕްރޮގްރާމްގެ ތެރެއިން ގާނޫނު ހަދާ މަޖިލީހަށް ލިބިދޭނެ އަނެއް ބާރަކީ، ސުޕްރީމް ކޯޓުން ނިންމާ ނިންމުންތައް ވެސް، ގާނޫނު ހަދާ މަޖިލީހުގައި ހިމެނޭ ޖުމްލަ 120 މެމްބަރުންގެ ތެރެއިން، ސާދާ އަޣުލަބިއްޔަތު ކަމަށްވާ 61 މެމްބަރުންގެ ވޯޓުން ބަދަލުކޮށްލުމުގެ ބާރު ލިބުމެވެ.

ނަތަންޔާހޫގެ ސަރުކާރުން ހުށަހެޅި މި ބިލުތަކުގެ ފުރަތަމަ ކިޔުން އިއްޔެ އަށް ތާވަލުކުރުމާއެކު، އިޒްރޭލުގެ އެކި ކަންކޮޅުތަކުގައި މުޒާހަރާތައް ފެށި އެވެ. އަދި ގުދުސްގައި ހުންނަ އިޒްރޭލުގެ ގާނޫނު ހަދާ މަޖިލިސް ދޮށަށް މުޒާހަރާގެ ބައިވެރިން ޖަމާވެ، އެ ބިލުތަކާ ދެކޮޅަށް އަޑު އުފުލަން ފެށި އެވެ.

މުޒާހަރާގައި ބައިވެރިވި މީހުން ބުނި ގޮތުގައި ގާނޫނީ ނިޒާމަށް، ބޮޑުވަޒީރު ނަތަންޔާހޫ ހުށަހަޅުއްވާފައިވާ އިސްލާހުތަކުގެ އެންމެ ބޮޑު ބޭނުމަކީ، އެ ގައުމުގެ ސުޕްރީމް ކޯޓުގެ ބާރުތައް ހަނިކޮށް، އެ ބާރުތައް ސަރުކާރުގެ ވަކި މިނިސްޓަރަކަށް ލިބިދިނުމެވެ. އެ މީހުން ބުނާ ގޮތުގައި ނަތަންޔާހޫ ހުށަހަޅުއްވާފައިވާ ގޮތަށް ގާނޫނީ އޮނިގަނޑަށް ބަދަލު ގެނެސްފި ނަމަ، އެ ގައުމުގައި ޒަމާނުއްސުރެ އުފެދި އަމަލުކުރަމުން އަންނަ، ފާރަވެރިވުމާއި ޒިންމާދާރުކުރުމުގެ ނިޒާމު މުލުން ލުހިގެންދާނެ އެވެ.

ނަތަންޔާހޫގެ އާ ސަރުކާރުން މިދިޔަ މަހު އިއުލާންކުރި އިސްލާހީ ޕްރޮގްރާމާ ދެކޮޅަށް އަޑު އުފުލާ މީހުން ބުނާ ގޮތުގައި، ނަތަންޔާހޫގެ އެ ޕްރޮގްރާމަކީ އެ ގައުމުގެ އަދުލު އިންސާފުގެ ދާއިރާއާ ދެކޮޅަށް ހަނގުރާމަ އިއުލާން ކުރުމެވެ. އަދި އެ ޕްރޮގްރާމްގެ ސަބަބުން، ނަތަންޔާހޫގެ ސަރުކާރަށް އާދަޔާ ޚިލާފު ބާރުތައް ލިބި، ގައުމުގެ ޑިމޮކްރެޓިކް މުއައްސަސާތަކުގެ ބާރު ކެނޑިގެންދާނެ އެވެ.