ޔަންގް ޝެފް އޮލިމްޕިއަޑްގައި ފުރަތަމަ ފަހަރަށް ރާއްޖެއަށް ކާމިޔާބީއެއް ލިބިއްޖެ

ބައިނަލްއަގުވާމީ ކަލްނަރީ މުބާރާތެއް ކަމަށްވާ "ޔަންގް ޝެފް އޮލިމްޕިއަޑް" ގައި ފުރަތަމަ ފަހަރަށް ރާއްޖެއަށް ކާމިޔާބީއެއް ލިބިއްޖެ އެވެ.

އިންޑިއާގައި ބާއްވަމުން އަންނަ އެ މުބާރާތުގައި މި އަހަރު ރާއްޖޭގެ ފަރާތުން ބައިވެރިވީ މޯލްޑިވްސް ނެޝަނަލް ޔުނިވާސިޓީ (އެމްއެންޔޫ) ގެ ފެކަލްޓީ އޮފް ހޮސްޕިޓަލިޓީ އެންޑް ޓޫރިޒަމްގައި ކިޔަވަމުން އަންނަ ދަރިވަރު މަރިޔަމް ހަޝްމާ ޟާމިރު އާއި އެ ފެކަލްޓީގެ ލެކްޗަރާ، އަލްމާ އަލީލް އެވެ.

މިއީ އެމްއެންޔޫ އިން އެ މުބާރާތުގައި ބައިވެރިވި ހަ ވަނަ ފަހަރެވެ. އަދި އެ މުބާރާތުން އެ ޔުނިވާސިޓީއަށް ކާމިޔާބީއެއް ލިބުނު ފުރަތަމަ ފަހަރެވެ.

މިދިޔަ މަހު 24 އިން މި މަހު ހަތަރަކަށް އިންޑިއާގެ ނިއު ދިއްލީ، ގޯއާ އަދި ކޮލްކަތާގައި ކުރިއަށް ގެންދިޔަ މި މުބާރާތުން އެ ޔުނިވާސިޓީއަށް ތިން އެވޯޑެއް ލިބުނެވެ. އެއީ؛

• ބެސްޓް އެމްބެސެޑާ އެވޯޑް

• މެންޓާ އެވޯޑް

• ހައިލީ ކޮމެންޑެޑް އެވޯޑް ފޯ ސަސްޓެއިނަބިލިޓީ ޕްރެޒެންޓޭޝަން

އަލްމާ ވިދާޅުވީ، 53 ގައުމަކުން ބައިވެރިވި ވާދަވެރި މި މުބާރާތުގައި ރާއްޖެއަށް ފުރަތަމަ ފަހަރަށް މިހާ ބޮޑު ކާމިޔާބީއެއް ލިބުމުން ވަރަށް އުފާވާ ކަމަށެވެ.

"ބެސްޓް އެމްބެސެޑާ އަދި މެންޓާ އެވޯޑަކީ މުބާރާތުގައި ބައިވެރިވި ދަރިވަރާއި އަޅުގަނޑު، މި ދާއިރާއިން ކުރިއަށް ދިއުމަށް ކުރާ އުއްމީދުތަކާއި ހުރި ޝައުގުވެރިކަމަށް ބަލައި ދިން އެވޯޑުތަކެއް. އަދި މުބާރާތުގައި އަޅުގަނޑުމެން ދެއްކި ޕާފޯމަންސްއަށް ވެސް ބެލި މި އެވޯޑުތައް ދިނުމުގައި،" އޭނާ ވިދާޅުވި އެވެ.

ހައިލީ ކޮމެންޑެޑް އެވޯޑް ފޯ ސަސްޓެއިނަބިލިޓީ ޕްރެޒެންޓޭޝަން އެވޯޑު ލިބުނީ އެ މުބާރާތުގައި އަލްމާ އާއި ހުޝްމާ ހުށަހެޅި ޕްރެޒެންޓޭޝަނަކަށެވެ. އެ ޕްރެޒެންޓޭޝަން ހުށަހަޅަން ޖެހުނީ މި އަހަރު އެ މުބާރާތަށް ކަނޑައެޅި ތީމް ކަމަށްވާ "ސަސްޓެއިނިބިލިޓީ" ނުވަތަ ދެމެހެއްޓެނިވި ގޮތެއްގައި ކަންކަން ކުރުމާ ގުޅޭގޮތުންނެވެ.

"އަޅުގަނޑުމެން ޕްރެޒެންޓޭޝަން ހުށަހެޅީ ރާއްޖެއާ ބެހޭގޮތުން، ރާއްޖޭގެ ޓޫރިޒަމްއާ ވެސް ގުޅުވާލައިފައި، ކިހިނެއްކަން ރާއްޖޭގައި ސަސްޓެއިނިބިލިޓީއަށް ކޮންޓްރިބިއުޓް ކުރަނީ،" އޭނާ ވިދާޅުވި އެވެ.