ލިޓްލް ޖެމްސް ޕްރީ ސްކޫލްގެ އިމާރާތް 15 އަހަރަށް ހިންގާނެ ބަޔަކު ހޯދަނީ

ލިޓްލް ޖިމްސް ޕްރީ-ސްކޫލު މިހާރު ހިންގާ އިމާރާތުގައި ޕްރީ-ސްކޫލެއް ހިންގާނެ ބަޔަކު ހޯދަން އެޑިއުކޭޝަން މިނިސްޓްރީން އިއުލާނުކޮށްފި އެވެ،

އެ މިނިސްޓްރީން މިިދިޔަ އަންގާރަ ދުވަހު ކުރި އިއުލާނުގައި ބުނީ ހުޅުމާލެ 1 ގެ ލޮޓް ނަންބަރު 11489 ގައި އިމާރާތް ކޮށްފައިވާ ޕްރީ ސްކޫލް، މެނޭޖްމަންޓް ކޮންޓްރެކްޓްގެ ދަށުން 15 އަހަރަށް ހިންގައި ބަލަހައްޓައި ދޭނެ ފަރާތެއް ހޯދަން ބޭނުންވާ ކަމަށެވެ.

ހުޅުމާލޭގެ ފުރަތަމަ ޕްރީ-ސްކޫލު ހުޅުވާފައިވަނީ ކުރީގެ ރައީސް އަބްދުﷲ ޔާމީންގެ ވެރިކަމުގަ އެވެ. އޭރު އެ ތަން ކުއްޔަށް ދިނީ އެޗްޑީސީގެ ޗެއާމަންކަން ވެސް ކުރެއްވި ފުއާދު ގާސިމްގެ ކުންފުންޏަށެވެ. ނަމަވެސް، އެތަން ދިން މުއްދަތެއް ސާފެއް ނުވެ އެވެ.

އެ އިމާރާތުގައި ޕްރީ-ސްކޫލް ހިންގަން 15 އަހަރު ދުވަހަށް ކުއްޔަށް ދޭން ހުޅުވާލީ އެ މުއްދަތު ހަމަވާތީ އެވެ.

އެކަމަށް ޝައުގުވެރިވާ ފަރާތްތަކުން ބީލަމުގައި ރަޖިސްޓްރީ ކުރުމަށް މި މަހުގެ 11 ވަނަ ދުވަހާ ހަމައަށް ވަނީ ހުޅުވާލައިފަ އެވެ. "ބިޑް ރަޖިސްޓްރީ ފޯމް" ފުރިހަމަކުރުމަށް ފަހު 500ރ. ނޮންރިފަންޑަބަލް ރަޖިސްޓްރޭޝަން ފީއެއް ދައްކަން ޖެހޭއިރު، ބީލަން ހުށަހެޅޭނީ އެ މުއްދަތުގައި ރަޖިސްޓްރީކޮށް ފައިސާ ދައްކާފައިވާ ފަރާތްތަކަށެވެ.

ބީލަން ހުށަހެޅުމާއި ބީލަން ހުޅުވުން އޮންނާނީ މި މަހުގެ 30 ވަނަ ދުވަހު އެޑިއުކޭޝަން މިނިސްޓްރީގަ އެވެ.