ނަހުލާ، ގިނަ ބަޔަކަށް ދައުވަތު ދީގެން އަންހެނުންގެ ދުވަސް ފާހަގަ ކުރަނީ

މި އަހަރުގެ އަންހެނުންގެ ދުވަސް ފާހަގަކުރުމަށް އަންނަ ބުދަ ދުވަހުގެ ރޭ ހާއްސަ ޖަލްސާއެއް ބާއްވަން ޓްރާންސްޕޯޓް މިނިސްޓަރު އަދި ޖުމްހޫރީ ޕާޓީގެ ޑެޕިއުޓީ ލީޑަރު އައިޝަތު ނަހުލާ ނިންމައިފި އެވެ.

ޖުމްހޫރީ ޕާޓީގެ އަންހެން މެމްބަރުން އިންތިޒާމުކޮށްގެން ބާއްވާ އެ ޖަލްސާއާ ގުޅޭ ގޮތުން ހާއްސަ މަޝްވަރާ ބައްދަލުވުމެއް ވެސް ރޭގައި ބޭއްވި އެވެ. އެ ބައްދަލުވުމުގައި ނަހުލާއާއެކު، އެ ޕާޓީގެ ވަރަށް ގިނަ އަންހެން މެމްބަރުން ބައިވެރިވި އެވެ.

އެ ޕާޓީގެ ތަރުޖަމާން އަލީ ސޯލިހު މިއަދު "މިހާރު" އަށް ވިދާޅުވީ މިއީ އަންހެނުން ބާރުވެރިކޮށް، ހިތްވަރުދިނުމުގެ ގޮތުން މިނިސްޓަރު ނަހުލާ އިސްނަންގަވައިގެން ބާއްވާ ޖަލްސާއެއް ކަމަށެވެ. އެ ޖަލްސާ އޮންނާނީ އަންނަ ބުދަ ދުވަހުގެ ރޭ މ. ކުނޫޒްގައި ކަމަށް އޭނާ ވިދާޅުވި އެވެ.

"ރޭގެ މަޝްވަރާގައި ނިންމީ މި ޕާޓީގެ މެމްބަރުން ނޫނަސް، އެކި ދާއިރާތަކުގައި މަސައްކަތްކުރާ ކުޅަދާނަ އަންހެނުންނަށް މި ޖަލްސާއަށް ދައުވަތު ދޭން،" އޭނާ ވިދާޅުވި އެވެ.

މި އަހަރުގެ އަންހެނުންގެ ދުވަހުގެ ޝިއާރަކީ ޑިޖިޓަލް ދާއިރާގައި އަންހެނުން ކުރާ އިޖާދުތަކާއި ހޯދާފައިވާ ކާމިޔާބީތައް ކަމަށް ވާތީ، މި ޖަލްސާގައި އެ ޝިއާރާ ގުޅޭ ގޮތުން ވެސް ހާއްސަ ބައެއް ކަންކަން ކުރަން ރާވާފައިވާ ކަމަށް ވެސް އަލީ ސޯލިހު ވިދާޅުވި އެވެ.

ބައިނަލްއަގުވާމީ އަންހެނުންގެ ދުވަސް ފާހަގަކުރަނީ ކޮންމެ އަހަރެއްގެ މާޗު 8 ގަ އެވެ.