"ވެނިސްޑޭ"ގެ ދެވަނަ ސީޒަންގެ އެގްޒެކެޓިވް ޕްރޮޑިއުސަރަކަށް ޖެނާ

ނެޓްފްލިކްސްގެ މަޝްހޫރު ސީރީޒް "ވެނިސްޑޭ"ގެ ދެވަނަ ސީޒަންގެ އެގްޒެކެޓިވް ޕްރޮޑިއުސަރަކަށް، އެ ސީރީޒްގައި ލީޑް ރޯލު ކުޅޭ ޖެނާ އޮޓޭގާ ހަމަޖައްސައިފި އެވެ.

މަޝްހޫރު ފެންޓަސީ ޑްރާމާ "އެޑަމްސް ފެމިލީ"ގެ ކެރެކްޓާއިންގެ މައްޗަށް ބިނާކޮށް ނެޓްފްލިކްސް އިން މިދިޔަ އަހަރުގެ ނޮވެމްބަރުގައި ގެނެސްދިން މި ސީރީޒަށް ބޮޑު ތަރުހީބެއް ލިބުނެވެ.

ހާއްސަކޮށް، މި ސީރީޒްގެ ޓައިޓަލް ކެރެކްޓަރު ކަމަށްވާ ވެނިސްޑޭ އެޑަމްސްގެ ރޯލު ކުޅުނު ޖެނާއަށް ބެލުންތެރިންގެ ލޯބި ލިބުނެވެ.

އެއްވެސް އިހުސާސެއް މޫނުމަތިން ނުދައްކައި އުޅޭ ވެނިސްޑޭގެ ދިރިއުޅުން ދައްކާ މި ސީރީޒްގެ ފުރަތަމަ ސީޒަން ނިމުނީ ބެލުންތެރިންނަށް ގިނަ ސުވާލުތަކެއް ކުރިމަތިކުރުވައިފަ އެވެ.

މިހާރު ދެވަނަ ސީޒަން އިއުލާނުކޮށްފައިވާ މި ސީރީޒްގެ ލީޑު އެކްޓަރަށް އެގްޒެކެޓިވް ޕްރޮޑިއުސަރުގެ މަގާމު ދީ، ސީރީޒްގެ ކަންކަން ނިންމުމުގެ ބާރުދީފައި މި ވަނީ، ފުރަތަމަ ސީޒަންގައި އޭނާ ހިތްހަމަނުޖެހޭ ކަންކަން ހުރި ކަމަށް ބުނެ ފާޑުކިޔާފައި ވަނިކޮށެވެ.

ޑިޒްނީން އެކްޓިން ކެރިއަރު ފެށި ޖެނާގެ އާ ފިލްމު "ސްކްރީމް 6" މިއަދު ރިލީޒްކުރާނެ އެވެ. މިދިޔަ އަހަރު ނިކުތް "ސްކްރީމް" ފުރަތަމަ ބަޔަށް ބޮޑު ތަރުހީބެއް ލިބުނުއިރު، އެ ފިލްމުގައި ޖެނާއާއެކު "ފްރެންޑްސް" ސީރީޒްގެ ތަރި، ކޯޓްނީ ކޮކްސް ވެސް އުޅެ އެވެ.