ކޮމިއުނިޓީ ފަންޑުން ހިންގި 3 ޕްރޮޖެކްޓެއް ނިމިއްޖެ

ބީއެމްއެލްގެ "ކޮމިއުނިޓީ ފަންޑުން" ހިންގި ތިން ޕްރޮޖެކްޓެއް ކާމިޔާބުކަމާ އެކު ނިންމާލައިފި އެވެ.

"ކޮމިއުނިޓީ ފަންޑު"ގެ ދަށުން ދ. ހުޅުދެލި، ލ. މުންޑޫ އަދި ލ. ފޮނަދޫގައި ދެމެހެއްޓެނެވި ގޮތެއްގައި ހިންގުމަށް ބޭނުންވާ ޕްރޮޖެކްޓްތަކަށް ބީއެމްއެލްއިން ވަނީ އެހީތެރިވެފަ އެވެ.

އެ ފަންޑުގެ ދަށުން ދ. ހުޅުދެލީގައި ވަނީ މަސްކެނޑުމަށް ހާއްސަ ތަނެއް ގާއިމްކޮށްފަ އެވެ. ބީއެމްއެލްއިން ބުނި ގޮތުގައި އެ ތަނަކީ މަސްވެރިންގެ އިތުރުން ހުޅުދެލީގެ އާންމު ރައްޔިތުންނަށް ވެސް މަސް ކެނޑުމަށް ފަސޭހަވާނެހެން ތަރައްގީ ކޮށްފައިވާ ތަނެކެވެ. އަދި އެ ތަން ފަރުމަކޮށްފައި ވަނީ ދުވާލުގެ ވަގުތުތަކުގެ އިތުރުން ރޭގަނޑު ވެސް ބޭނުން ކުރެވޭނެ ގޮތަށް ކަމަށް ބެންކުން ބުނެ އެވެ.

އެ ޕްރޮޖެކްޓް ހިންގާފައި ވަނީ ހުޅުދެލީ އައިލެންޑް ސޮސައިޓީ އެންޑް ސްޕޯޓްސް އެސޯސިއޭޝަނުންނެވެ.

ލ. މުންޑޫގައި އެ ފަންޑުގެ ދަށުން ބަނދަރު ސަރަހައްދުގައި ދަތުރުވެރިންނަށް ހާއްސަ ތަނެއް ވެސް ވަނީ ގާއިމްކޮށްފަ އެވެ.

ބީއެމްއެލްއިން ބުނި ގޮތުގައި އެ ތަނުގައި ވަނީ ހަޓެއް ހަދާ ލަކުޑި ބެންޗްތަކެއް ބަހައްޓައިފަ އެވެ. އެ ތަނަކީ ދަތުރުވެރިން މަޑުކޮށްލުމަށްޓަކައި ހިޔާވެވޭހެން ފަރުމާކޮށްފައިވާ ތަނެކެވެ.

އެ ޕްރޮޖެކްޓް ހިންގާފައި ވަނީ މުންޑޫ ޒުވާނުންގެ ޖަމިއްޔާ އިންނެެވެ.

އެ ފަންޑުގެ ދަށުން ލ. ފޮނަދޫގައި ހުންނަ ލ. އަތޮޅު ތައުލީމީ މަރުކަޒުގެ 4 ކްލާސްރޫމެއް ޑިޖިޓައިޒްކުރުމުގެ ގޮތުން ވަނީ ޓީވީ ބަހައްޓައިފަ އެވެ.

އެ ޕްރޮޖެކްޓް ހިންގާފައިވަނީ ވިމެން އެންހޭންސްމަންޓްގެ ފަރާތުންނެވެ.

ބީއެމްއެލްގެ ކޮމިއުނިޓީ ފަންޑަކީ އަމިއްލަ ފަރުދުންނާއި ހިލޭ ސާބަހަށް މަސައްކަތްކުރާ ޖަމިއްޔާތަކުން ރަށްރަށުގައި ހިންގަން ބޭނުންވާ ޕްރޮޖެކްޓްތަކަށް މާލީ އެހީތެރިކަން ފޯރުކޮށްދިނުމަށް ހުޅުވާލާފައިވާ ފަންޑެކެވެ.

ކޮމިއުނިޓީ ފަންޑުގެ ދަށުން 80 ޕްރޮޖެކްޓެއް ހިންގުމަށް ފައިސާގެ އެހީ ފޯޜުކޮށްދީފައިވާ ކަމަށް ބީއެމްއެލްއިން ބުނެ އެވެ.