ބީއެމްއެލްގެ ކޮމިއުނިޓީ ފަންޑަށް ޕްރޮޕޯޒަލް ހުށަހެޅޭނީ ހޮނިހިރު ދުވަހުގެ ނިޔަލަށް

ބީއެމްއެލްގެ ކޮމިއުނިޓީ ފަންޑުގެ ދަށުން ޕްރޮޖެކްޓްތައް ހޯދުމަށް ޕްރޮޕޯޒަލް ހުށަހެޅުމުގެ ފަހު ތާރީހަކީ އަންނަ ހޮނިހިރު ދުވަހުގެ ނިޔަލަށް ކަމަށް އެ ބޭންކުން މިއަދު ބުނެފި އެވެ.

ކޮމިއުނިޓީ ފަންޑުގެ ބޭނުމަކީ މުޖުތަމައަށް ދެމެހެއްޓެނިވި ގޮތެއްގައި ފައިދާކުރަނިވި ޕްރޮޖެކްޓްތަކާއި މަސައްކަތްތަކަށް ފައިސާގެ އެހީތެރިކަން ފޯރުކޮށްދިނުމެވެ. އެ ފަންޑުގެ ދަށުން ރާއްޖޭގެ އެކި ސަރަހައްދުތަކާއި އެކި މަސައްކަތްތައް ވަނީ ކޮށްފަ އެވެ.

ކޮމިއުނިޓީ ފަންޑަށް އެދި ހުށަހެޅޭނީ ތިމާވެއްޓާ ގުޅުން ހުރި ޕްރޮޖެކްޓް ތަކަށާއި ތައުލީމާއި ކުޅިވަރު ހަރަކާތްތަކުގެ އިތުރުން މުޖުތަމައުގެ ލާބަ އާއި މަންފާއަށް އަމާޒުކޮށްގެން ހުށަހަޅާ ޕްރޮޖެކްޓްތަކަށެވެ. ޕްރޮޖެކްޓުތަކުގެ ތެރެއިން ހޮވާ 10 ޕްރޮޖެކްޓަކަށް 50،000ރ. އާ ހަމައަށް ބީއެމްއެލުން އެހީ ދޭނެ އެވެ.

ބީއެމްއެލްގެ ކޮމިއުނިޓީ ފަންޑަށް އެދި ޕްރޮޕޯޒްލް ހުށަހެޅޭނީ ރަޖިސްޓަރީ ކޮށްފައިވާ ޖަމިއްޔާތަކަށް އެކަންޏެވެ.

ބީއެމްއެލް ކޮމިއުނިޓީ ފަންޑުގެ ދަށުން މިހާތަނަށް 80 ޕްރޮޖެކްޓެއް ހިންގުމަށް ފައިސާގެ އެހީ ވަނީ ދީފަ އެވެ. ކޮމިއުނިޓީ ފަންޑުގެ ދަށުން ދ. ހުޅުދެއްޔާއި ލ. މުންޑޫ އަދި ލ. ފޮނަދޫގައި ހިންގި ޕްރޮޖެކްޓްތައް ދާދި ފަހުން ވަނީ ނިންމައިފަ އެވެ.