ހުޅަނގަށް ގޮން ޖައްސަވައި ޕުޓިން ޔޫކްރޭނަށް

ރަޝިޔާ ސިފައިން މީގެ އަހަރު ދުވަސް ކުރިން ޔޫކްރޭނާ ދެކޮޅަށް ފެށި ހަނގުރާމައިގައި ހިފާފައިވާ ޔޫކްރޭންގެ ބިންތަކުން ފޭބުމަށް ހުޅަނގުގެ ގައުމުތަކުން ގޮވައިލަމުން ދަނިކޮށް، ރަޝިޔާގެ ރައީސް ލަޑިމިއާ ޕުޓިން އެ ބިންތަކަށް ޒިޔާރަތް ކުރައްވައި، އެ ސަރަހައްދުތަކުގެ ކަންތައް ހުރި ނެތް ގޮތް ބައްލަވާލައްވައިފި އެވެ.

އެ ގޮތުން ރައީސް ޕުޓިން އެންމެ ފުރަތަމަ އިއްޔެ ވަޑައިގަތީ، މާޗް 18، 2014 ގައި ރަޝިޔާގެ ބައެއްގެ ގޮތުގައި އެ ގައުމުން ކަނޑައެޅި، ޔޫކްރޭންގެ ކްރީމިއާ ސަރަހައްދަށެވެ. އެ ސަރަހައްދު ރަޝިޔާއާ އެއްކޮށްލިތާ ނުވަ އަހަރު ފުރުން ފާހަގަކުރުމުގެ ގޮތުން ކުރެއްވި އެ ޒިޔާރަތުގައި ރައީސް ޕުޓިން ވަޑައިގަތީ ކްރީމިއާގެ އެންމެ ހުޅަނގުދެކުނުގައި އޮންނަ ބަނދަރުމަތީ ސަހަރެއް ކަމަށްވާ ސެވެސްޓަޕޯލް އަށެވެ.

ރައީސް ޕުޓިން ކްރީމިއާ އަށް މި ކުރެއްވި ދަތުރުގައި އޭނާގެ އަރިހުގައި ބައިވެރިވެވަޑައިގަތީ، ކްރީމިއާ ސަރަހައްދަށް ރަޝިޔާ އިން ކަނޑައަޅާފައި ހުންނަވާ ގަވަރުނަރު މިޚައިލް ރަޒްވޮޒަޔޭވް އެވެ.

ރަޝިޔާގެ ބައެއްގެ ގޮތުގައި ކްރީމިއާ ހަމަޖެއްސީ، 2014 ވަނަ އަހަރު ރަޝިޔާ އިން އެ ސަރަހައްދު ހިފުމަށްފަހު، ރަޝިޔާ ސިފައިންގެ ބެލުމުގެ ދަށުން އެ ސަރަހައްދުގެ އާންމު ރައްޔިތުންގެ މެދުގައި ނެގި ޚިޔާލު ހޯދުމުގެ ވޯޓަކަށް ފަހު އެވެ. އެ ވޯޓުގައި، ރަޝިޔާގެ ބައެއްގެ ގޮތުގައި ކްރީމިއާ ހަމަޖައްސަން އަޣުލަބިއްޔަތު ލިބުނު ނަމަވެސް، ޔޫކްރޭނާއި ބައިނަލްއަގުވާމީ މުޖްތަމައުން އެކަން ގަބޫލެއް ނުކުރެ އެވެ.

ކްރީމިއާ އަށް ކުރެއްވި ޒިޔާރަތަށް ފަހު، ރައީސް ޕުޓިން ދެން ވަޑައިގަތީ ޔޫކްރޭންގެ އިރުމަތީގައި އޮންނަ ޑޮނެޓްސްކް ސަރަހައްދުގެ މައި ސަހަރެއް ކަމަށްވ މަރިއުޕޯލް އަށެވެ. ރަޝިޔާ ސިފައިން މިދިޔަ އަހަރުގެ މެއި މަހުގެ ތެރޭގައި ހިފި މަރިއުޕޯލް އަށް ރައީސް ޕުޓިން ވަޑައިގަތީ ހެލިކޮޕްޓަރެއްގަ އެވެ. އެއަށް ފަހު ކާރުގައި އެ ސަހަރުގެ އެކި އަވަށްތަކަށް ޒިޔާރަތް ކުރައްވައި، ބައެއް ސަރަހައްދުތަކުގައި މަގުމަތީ މަޑުކުރައްވައި އާންމުންނާ ބައްދަލުކުރެއްވި އެވެ.

ރައީސް ޕުޓިން މަރިއުޕޯލް އަށް މި ވަޑައިގަތީ، ޔޫކްރޭނާ ދެކޮޅަށް ހަނގުރާމަ ފަށައި، ރައީސް ޕުޓިން ހަނގުރާމައިގެ ޖަރީމާތައް ހިންގަވާފައިވާ ކަމަށް ބުނެ، އޭނާ ހައްޔަރުކުރުމަށް މިދިޔަ ހުކުރު ދުވަހު ބައިނަލްއަގުވާމީ ޖިނާއީ ކޯޓުން އަމުރެއް ނެރެފައި ވަނިކޮށެވެ. އެ ކުށްތަކުގެ ތެރޭގައި ޔޫކްރޭންގެ އެތައް ހާސް ކުޑަކުދިންނެއް، އެ ކުދިންގެ ނުރުހުމުގައި އަދި ގާނޫނާ ޚިލާފަށް ޔޫކްރޭނުން ބޭރަށް ގެންދިއުން ހިމެނެ އެވެ.

ބައިނަލްއަގުވާމީ ޖިނާއީ ކޯޓުގެ އެ އަމުރާ ގުޅޭ ގޮތުން ރައީސް ޕުޓިން މިހާތަނަށް ވަކި އެއްޗެއް ވިދާޅެއްނުވެ އެވެ. ނަމަވެސް ރިއާސީ ގަނޑުވަރު ކްރެމްލިންގެ ތަރުޖަމާނު ވިދާޅުވީ އެއީ އެއްވެސް ބުރަދަނެއް ނެތް ބާތިލު އަމުރެއް ކަމަށެވެ. އަދި އެ ކޯޓުގެ ނިންމުންތަކާ މެދު ރަޝިޔާ ދެކެނީ ވަރަށް ރުޅިވެރިކަމުގެ އަދި ގަބޫލު ނުކުރެވޭނެ ނިންމުންތަކެއްގެ ގޮތުގަ އެވެ.