ކޮމްޕެޓިޝަން ޑިޕާޓްމަންޓުގެ އިސްވެރިޔާގެ ދަރިފުޅު ނިޔާވުމުން ޕްރެޒިޑެންޓްސް ކަޕް ފެށުން ފަސްކޮށްފި

އީގަލްސް އާއި ވެލެންސިއާގެ މެޗުން މިރޭ ފަށަން ހަމަޖެހިފައި އޮތް ޕްރެޒިޑެންޓްސް ކަޕް ފުޓްބޯޅަ މުބާރާތް، އެފްއޭއެމްގެ ކޮމްޕެޓިޝަންސް ޑިޕާޓްމަންޓުގެ ހެޑް އިސްމާއީލް ރިޔާޒްގެ ތުއްތު ދަރިފުޅު ނިޔާވުމާ ގުޅިގެން މާދަމާ ރެއަށް ފަސްކޮށްފި އެވެ.

ރިޔާޒްގެ ދަރިފުޅު އުމުރުން ތިން މަހުގައި ނިޔާވީ ކުއްލި ގޮތަކަށް ރޭ ފަތިހު އެވެ.

"މިކަމުގެ ހިތާމައިގައި ބައިވެރިވުމުގެ ގޮތުން ޕްރެޒިޑެންޓްސް ކަޕުގައި މިރޭ ކުޅުމަށް ހަމަޖެހިފައިވާ އީގަލްސް އާއި ވެލެންސިއާ މެޗު ޕޯސްޓްޕޯޯން ކުރެވިފައިވާ ވާހަކަ ދަންނަވަމެވެ،" އެފްއޭއެމުން ބުންޏެވެ.

އެފްއޭއެމްގައި މަސައްކަތްކުރާތާ ގިނަ ދުވަސްތަކެއްވެފައިވާ ޒުވާން ރިޔާޒް އަކީ އެފްއޭއެމުން ރާވާ ހިންގާ މުބާރާތްތައް އިންތިޒާމުކޮށް ބެލެހެއްޓުމުގެ އެންމެ ބޮޑު ޒިންމާ ނަގާ ފަރާތެވެ.

މިހާރު އޮތް ގޮތުން މުބާރާތް ފަށާނީ މާދަމާރޭ މާޒިޔާ އާއި ޓީސީ ކުޅޭ މެޗުންނެވެ.

ފުރަތަމަ ޑިވިޝަނުގެ އަށް ޓީމުގެ މެދުގައި ބާއްވަން އެފްއޭއެމުން ރޭވި ޕްރެޒިޑެންޓްސް ކަޕުގައި އޭގެ ތެރެއިން ޔުނައިޓެޑް ވިކްޓްރީ (ޔޫވީ) އާއި ކްލަބް ގްރީންސްޓްރީޓްސް ނުހިމެނެ އެވެ. މުބާރާތުގައި ކުޅޭނީ ވެލެންސިއާ އާއި އީގަލްސް އާއި މާޒިޔާ އާއި ޓީސީގެ އިތުރުން ސުޕަ ޔުނައިޓެޑް ސްޕޯޓްސް (ސަސް) އާއި ފުރަތަމަ ޑިވިޝަނަށް އަލަށް ޕްރޮމޯޓްވި ބުރު ސްޕޯޓްސް ކްލަބެވެ.

ޔޫވީ އާއި ގްރީން ސްޓްރީޓްސް ވެސް މުބާރާތުގައި ބައިވެރިނުވީ މާލީ ހާލަތު އޮތް ގޮތުންނާއި ކްލަބް ލައިސެންސިން ކަންކަން އަދި ފުރިހަމަ ނުކުރެވޭތީ އެވެ.

މުބާރާތުގައި ވާދަކުރާ ހަ ކްލަބް ވަނީ ދެ ގުރޫޕަކަށް ބަހާލައިފަ އެވެ. ގުރޫޕް 1 ގައި ހިމެނެނީ އީގަލްސް އާއި ވެލެންސިއާ އަދި ސަސް އެވެ. ގުރޫޕް 2 ގައި ހިމެނެނީ މާޒިޔާ އާއި ޓީސީ އަދި ބުރު އެވެ.

އެގޮތުން ކޮންމެ ގުރޫޕެއްގައި ވެސް ކޮންމެ ޓީމެއް ކޮންމެ ޓީމަކާ ކުޅެ، ގުރޫޕަކުން ދެ ޓީމެއް ސެމީ ފައިނަލަށް ހޮވޭނެ އެވެ. ސެމީ ފައިނަލް މެޗުތައް އޮންނާނި މި މަހުގެ 25 ވަނަ ހުވަހު އެވެ. އަދި ފައިނަލް މެޗު އޮންނާނީ 29 ވަނަ ދުވަހުގެ ރެއެވެ.

ޔޫވީ އާއި ގްރީން ސްޓްރީޓްސް ފިޔަވައި ބާކީ ހަ ކްލަބް ވެސް ވަނީ މިހާރު ފަރިތަކުރުންތައް ފަށައިފަ އެވެ. މާޒިޔާ އާއި އީގަލްސް ފެބްރުއަރީ މަހު ފަރިތަކުރުންތައް ފަށާފައި ވާއިރު، ބުރުން ވަނީ ސީޒަން ހުޅުވަން ކުޅުނު ޗެރިޓީ ޝީލްޑް މެޗުގެ ދެ ރޭ ކުރިން ފަރިތަކުރުންތައް ފަށައިފަ އެވެ.

މިދިޔަ ބުދަ ދުވަހުގެ ރޭ ވެލެންސިއާ ޕްރެކްޓިސް ފެށިއިރު ޖެހިގެން އައި ރޭ ސަސް ވެސް ވަނީ ކޯޗު އިސްމާއިލް މަހްފޫޒް (އިންމަ) އާއެކު ފަރިތަކުރުންތައް ފަށައިފަ އެވެ. އަދި ޓީސީ ސްޕޯޓްސް ކްލަބް ވަނީ ރޭ އަހުސަން ރަޝީދު (ޗޭ) އާއެކު ފަރިތަކުރުންތައް ފަށައިފަ އެވެ.