ނައީމާގެ މަރު: ގިނަ ބަޔަކު ފިންގަޕްރިންޓާއި ޑީއެންއޭ ސާމްޕަލް ދޭން އެދިއްޖެ

އަނިޔާވެރިކޮށް މަރާލާފައި އޮއްވާ ފެނުނު ނައިމާ މޫސާގެ ގާތިލް ހޯދަން ފުލުހުން ހިންގާ ތަހުގީގުގައި، ނ. މަނަދޫގެ ގިނަ ބައެއްގެ ފިންގަޕްރިންޓާއި ޑީއެންއޭ ސާމްޕަލް ނަގަން ބޭނުންވާތީ ރައްޔިތުން އެއްބާރުލުންދޭން ކައުންސިލުން އެދިއްޖެ އެވެ.

އެ ރަށު ކައުންސިލްގެ ރައީސް އަބްދުއްރަހުމާން ސޮބީހު މިއަދު ވިދާޅުވި ގޮތުގައި ފުލުހުން ބޭނުންވާ ގިނަ ބައެއްގެ ފިންގަޕްރިންޓް މިހާރު އަންނަނީ ނަގަމުންނެވެ. އެކި އުމުރުފުރާތަކަށް ބަހާލައިގެން ފިންގަޕްރިންޓާއި ޑީއެންއޭ ސާމްޕަލް ނަގަނީ އެއްވެސް މީހަކާ މެދު ތުހުމަތެއް އޮވެގެން ނޫން ކަމަށާއި ތަހުގީގުގެ ބޭނުމަށް ކަން ވެސް ރައްޔިތުންނަށް އަންގާފައިވާނެ ކަމަށް ވިދާޅުވި އެވެ.

"ފުލުހުން ބޭނުންވާ ގޮތަށް އެކަމުގައި ރައްޔިތުން އަންނަނީ އެއްބާރުލުން ދެމުން،" އޭނާ ވިދާޅުވި އެވެ.

އެކަނި ދިރިއުޅެމުން އަންނަ ނައީމާގެ ގައިގެ އެކި ތަންތަނަށް ވަޅި ހަރާފައި އޮއްވާ ފެނުނީ އޭނާގެ ހަބަރެއް ނުވެގެން ހޯދަމުން ދަނިކޮށް މި މަހުގެ ހަތް ވަނަ ދުވަހެވެ. ތަހުގީގުގައި ފުލުހުން މިހާތަނަށް ގިނަ މަސައްކަތްތަކެއް ކޮށްފައި ވިޔަސް ކޭސްގައި ލިބުނު ކުރިއެރުމުގެ ތަފްސީލް އާއްމެއް ނުކުރެ އެވެ.

ފުލުހުން ދޭ ޔަގީން ކަމަކީ، ގާތިލް ހޯދާނެ ކަމެވެ.

އެކަމަކު، މިކަން ލަސްވާތީ ކައުންސިލްގެ ކަންބޮޑުވުން އެބައޮތެވެ. އެއީ ތަހުގީގަށް އިތުބާރު ނުކުރާތީ ނޫން ކަމަށާއި އެ މަރާ ގުޅިގެން "ގާތިލް އެންމެ ގާތުގައި ވެސް އުޅެދާނެ" ބައެއް މީހުންގެ ހިތްތަކުގައި އުފެދިފައިވާ ބިރާ ހެދި ކަަމަށް ކައުންސިލްގެ ރައީސް ވިދާޅުވި އެވެ.

އޭނާ ވިދާޅުވި ގޮތުގައި މި މަރާ ގުޅިގެން ރަށުގައި އުފެދިފައިވާ ނުތަނަވަސްކަމުގެ ތެެރެއިން ނަފްސާނީ އެހީ ބޭނުންވާ މީހުންނަށް އެހީވުމަށް ވަނީ ނިންމައިފަ އެވެ. ފުލުުހުންނާއި ޖެންޑާ މިނިސްޓްރީގެ ޓީމަކުން އިއްޔެ ގޭގެއަށް ގޮސް ނަފްސާނީ އެހީ ބޭނުންވާ މީހުން އޮޅުންފިލުވި ކަަމަށް ސޮބީހް ވިދާޅުވި އެވެ.

"ތަހުގީގަށް ލިބޭ ކުރިއެރުމެއްގެ ވާހަކަ ނުދަައްކާ، ގާތިލް ހޯދާނެ ކަމަށް ފުލުހުން ބުނަނީ. ރައްޔިތުންގެ ބިރަކީ ގާތިލް ހުރީ އެންމެ ކައިރީގައި ނޫން ކަމެއް ވެސް ނޭނގެއޭ،" ސޮބީހް ވިދާޅުވި އެވެ.

މި ކަހަލަ އުނދަގޫ ކޭސްތަކުގައި، މާ ތަފްސީލީ މައުލޫމާތު ހާމަނުކުރަނީ، ފުލުހުން ބުނެފައިވާ ގޮތުގައި، ތަހުގީގަށް ހުރަސްއެޅޭތީ އެވެ. ނައީމާ މަރުވެފައި އޮއްވާ ފެނުނު ދުވަހުން ފެށިގެން ފުލުހުންގެ ހާއްސަ ޓީމަކުން އަންނަނީ މަނަދޫގައި ހަރަކާތްތެރިވަމުންނެވެ. ތަހުގީގުގައި، ގެއެއް ވެސް ބަލައި ފާސްކޮށްފައިވެ އެވެ.

ނައީމާގެ ދިރިއުޅުމުގެ ބައެއް ކަންކަމުގެ މައްޗަށް ބަލައި ރަށުގެ ވަކި މީހަކަށް ތުހުމަތު އަޅުވައި ވާހަކަ ފެތުރިޔަސް ފުލުހުން މިހާތަނަށް އެއްވެސް މީހަކަށް ތުހުމަތުކުރެވޭ ކަމެއް ބުނެފައެއް ނުވެ އެވެ.