މެމްބަރު ޒަރީރު އަވަހާރަކޮށްލަން އުޅުނު ކަމުގެ ތުހުމަތަށް ގައްބަރޭ ހޯދަނީ

ރައްޔިތުންގެ މަޖިލީހުގެ މަތިވެރި ދާއިރާގެ އެމްޑީޕީ މެމްބަރު ހަސަން ޒަރީރު ބޮލުގައި މަރުތޭލަކުން ތަޅައި މަރާލަން އުޅުނު ކަމުގެ ތުހުމަތަށް އެ ޕާޓީގެ ގައުމީ މަޖިލީހުގެ މެމްބަރެއް ކަމަށްވާ އިބްރާހިމް އަބްދުއްﷲ (ގައްބަރޭ) ހޯދަން މިއަދު އިއުލާންކޮށްފި އެވެ.

މީގެ ކުރިން ވެސް މާރާމާރީ އާއި ބޮޑެތި ކުށްތަކެއްގެ ގިނަ ރެކޯޑު އޮންނަ ގައްބަރޭއަކީ އެމްޑީޕީގެ ގައުމީ މަޖިލީހުގެ މައްޗަންގޮޅި ދެކުނު ދާއިރާގެ ރައީސެވެ.

ފުލުހުން ކުރި އިއުލާނުގައި ބުނި ގޮތުގައި އޭނާ ހޯދަނީ ގްރޫޕު ހަދައި ތޫނު ހަތިޔާރު ބޭނުންކޮށްގެން މާރާމާރީ ހިންގައި މީހަކު މަރާލަން އުޅުނު ކަމުގެ ތުހުމަތަށެވެ. އެއީ ކޮން މައްސަލައެއް ކަން ފުލުހުން ނުބުންޏަސް "މިހާރު"އަށް އެނގިފައިވާ ގޮތުގައި ގައްބަރޭ ހޯދަނީ މާލޭގެ ކެފޭއެއްގެ ތެރޭގައި އިންނަވަނިކޮށް ޒަރީރަށް ހަމަލާދިން މައްސަލައިގަ އެވެ.

ޒަރީރު ވިދާޅުވެފައިވާ ގޮތުގައި ފަސް މީހަކު ކެފޭތެރެއަށް ވަދެ މަރުތޭލަކުން އޭނާގެ ބޮލާއި ގައިގެ އެކި ތަންތަނުގައި ތަޅައި އަނިޔާކުރި އެވެ.

ފުލުހުން ތަހުގީގު ކުރާ މައްސަލައިގައި ގައްބަރޭ ހައްޔަރުކުރުމަށް އޭނާގެ އެއްވެސް މައުލޫލޫމާތެއް އެނގޭ ނަމަ ފުލުހުންގެ ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓްގެ ނަމްބަރު 9911099 އާއި ފުލުހުންގެ ހޮޓްލައިން 3322111 ނަމްބަރަށް އަންގަން އެދުނެވެ.

ޒަރީރު ވިދާޅުވި ގޮތުގައި އޭނާއަށް ހަމަލާދިން ސަބަބެއް އެނގިވަޑައެއް ނުގަންނަވަ އެވެ. ހަމަލާދިން މީހުންގެ ނަން ހާމަނުކުރައްވައި އޭނާ ވިދާޅުވެފައި ވަނީ ބަޔަކު ވަދެ އަނިޔާކުރިއިރު އޭނާއެކު އެތަނުގައި އިތުރު ބަޔަކު ވެސް ތިބި ކަމަށެވެ.

ޒަރީރަށް ހަމަލާ ދިން މީހުން ދެނެގަނެވުނީ އެ ކެފޭ ތެރޭގައި ހުރި ސީސީޓީވީ ކެމެރާއިންނެވެ.