ގައްބަރޭ ނުފެނޭ، އަދިވެސް ހޯދަނީ

ރައްޔިތުންގެ މަޖިލީހުގެ މަތިވެރި ދާއިރާގެ އެމްޑީޕީ މެމްބަރު ހަސަން ޒަރީރު އަވަހާރަކޮށްލަން އުޅުނު ކަމުގެ ތުހުމަތުގައި ފުލުހުން ހޯދާ އިބްރާހިމް އަބްދުﷲ (ގައްބަރޭ) އަދިވެސް ނުފެންނަ ކަމަށް ފުލުހުން ބުނެފި އެވެ.

މީގެ ކުރިން ވެސް މާރާމާރީ އާއި ބޮޑެތި ކުށްތަކެއްގެ ގިނަ ރެކޯޑު އޮންނަ ގައްބަރޭއަކީ އެމްޑީޕީގެ ގައުމީ މަޖިލީހުގެ މައްޗަންގޮޅި ދެކުނު ދާއިރާގެ ރައީސެވެ. އޭނާ ހޯދަން ހޯމަ ދުވަހު ފުލުހުން އިއުލާނުކުރީ މެންބަރު ޒަރީރަށް މަރުތޭލަކުން ހަމަލާދީ ޒަހަމްކޮށްލި މައްސަލައަކަށް ފަހުގަ އެވެ.

ފުލުހުންގެ މީޑިއާ އޮފިޝަލް "މިހާރު" އަށް ވިދާޅުވީ ގައްބަރޭ ހޯދުމުގެ މަސައްކަތް ފުލުހުން ހުއްޓުމެއް ނެތި ކުރަމުން އަންނަ ކަމަށެވެ.

ގައްބަރޭ ހޯދަން ފުލުހުން ކުރި އިއުލާނުގައި ބުނެފައިވާ ގޮތުގައި އޭނާ ހޯދަނީ ގްރޫޕު ހަދައި ތޫނު ހަތިޔާރު ބޭނުންކޮށްގެން މާރާމާރީ ހިންގައި މީހަކު މަރާލަން އުޅުނު ކަމުގެ ތުހުމަތަށެވެ. އެއީ ކޮން މައްސަލައެއް ކަން ފުލުހުން ނުބުންޏަސް "މިހާރު" އަށް އެނގިފައިވާ ގޮތުގައި ގައްބަރޭ ހޯދަނީ މާލޭގެ ކެފޭއެއްގެ ތެރޭގައި އިންނަވަނިކޮށް ޒަރީރަށް ހަމަލާދިން މައްސަލައިގަ އެވެ.

ޒަރީރަށް ހަމަލާދިނީ މި މަހުގެ އެއް ވަނަ ދުވަހުގެ ފަތިހު ކެފޭއެއްގައި އިންނަވަނިކޮށް ފަސް މީހުންގެ ގްރޫޕަކުން ވަދެ އެވެ.

ޒަރީރު ވިދާޅުވި ގޮތުގައި އޭނާއަށް ހަމަލާދިން ސަބަބެއް އެނގިވަޑައެއް ނުގަންނަވަ އެވެ. ހަމަލާދިން މީހުންގެ ނަން ހާމަނުކުރައްވައި އޭނާ ވިދާޅުވެފައި ވަނީ ބަޔަކު ވަދެ އަނިޔާކުރިއިރު އޭނާއެކު އެތަނުގައި އިތުރު ބަޔަކު ވެސް ތިބި ކަމަށެވެ. ޒަރީރަށް ހަމަލާ ދިން މީހުން ދެނެގަނެވުނީ އެ ކެފޭ ތެރޭގައި ހުރި ސީސީޓީވީ ކެމެރާއިންނެވެ.