ގެއަކަށް ވަދެ ބިރުދެއްކި މީހާ އަމިއްލައަށް ފުލުހުންނާ ހަވާލުވެއްޖެ

މާލޭގެ ގެއަކަށް ވަދެ މީހަކަށް ތޫނު އެއްޗަކުން ބިރުދައްކައި މާރާމާރީ ހިންގައި އަދި މުދަލަށް ގެއްލުންދިން މައްސަލައެއްގައި ހޯދަމުންދިޔަ މީހާ ހައްޔަރުކޮށްފި އެވެ.

ކޯޓު އަމުރަކަށް ހައްޔަރުކުރުމަށް ރ. މަޑުއްވަރީ، ދެތަނޑިމާގެ، އިބްރާހިމް ސަމީން، 34، ހޯދަން ފުލުހުން އިިއްޔެ އިއުލާނުކުރީ ގްރޫޕަކާ އެކު އެޕާޓްމަންޓަކަށް ވަދެ ބިރުދެއްކި މައްސަލައެއްގަ އެވެ.

ފުލުހުން މިއަދު ބުނީ، ސަމީން އަމިއްލައަށް ފުލުހުންގެ މައި މަރުކަޒަށް ރޭގެ ވަގުތެއްގައި ހާޒިރުވުމުން އޭނާ ހައްޔަރުކޮށްފައިވާ ކަމަށެވެ.

މި މަހުގެ ދެ ވަނަ ދުވަހު ގުރޫޕަކާ އެކު ސަމީން އެ އެޕާޓްމަންޓަށް ވަދެ އެ ތަނުގައި ދިރިއުޅޭ މީހަކަށް ތޫނު އެއްޗަކުން ބިރުދައްކައި ނުރައްކާތެރި ހަތިޔާރުން ހަމަލާދީ މާރާމާރީ ހިންގުމަށް ފަހު އެޕާޓްމަންޓުގައި ހުރި މުދަލަށް ގެއްލުން ދީފައިވާ ކަމަށް ފުލުހުން ބުނެފައިވެ އެވެ.