އަދަދު ހަމައެއް ނުވޭ، ދެން އިދިކޮޅަށް ނެރެވޭނީ ކޮން ނަތީޖާއެއް؟

އަދިވެސް ބަދަލު ނުވާ ހަގީގަތަކީ މިއެވެ؛ ގިނަ މެންބަރުންތަކެއް އެމްޑީޕީން ވަކިވެ، ރައްޔިތުންގެ މަޖިލީހުގައި ދެން ތިބި ހުރިހާ ސިޔާސީ ޕާޓީތަކާ އެކުވެ، ކޯލިޝަނެއް ހަދައި ސަރުކާރާ ދެކޮޅަށް ނުކުތަސް އޭގެ މާ ބޮޑު އަސަރެއް ސަރުކާރަކަށް ނުކުރާނެ އެވެ. މަޖިލިހުގެ ރިޔާސަތާއި 12 މެންބަރުން މަޖިލިސް ކޮންޓްރޯލް ކުރުމާއި ސަރުކާރު ތާއީދު ކުރައްވާ "ލޮނު މަޑު" މެންބަރުންތައް ފިއްތާފައި ބޭތިއްބިޔަސް ވޯޓުގެ ރަނގަބީލު ޖަހާ ހިސާބުން ނުކުންނަނީ ހަމަ އެއް ނަތީޖާ އެކެވެ. އެ ހަގީގަތް ބަދަލުވާން އަދި ކައިރި ވެސް ނުވެ އެވެ.

މަޖިލީހުގައި ކުރިޔަށް މި އޮތް ދެ ހަފުތާގައި އެ މަންޒަރު އިތުރަށް ސާފު ވާން އޮތީ އެވެ. އެޓާނީ ޖެނަރަލް އިބްރާހިމް ރިފްއަތާއި ފޮރިން މިނިސްޓަރު އަބްދުﷲ ޝާހިދު އަދި މަޖިލީހުގެ ނައިބު ރައީސް އީވާ އަބްދުﷲގެ އިތުބާރު ނެތް މައްސަލަ މަޖިލީހަށް އޮތީ ހުށަހަޅައިފަ އެވެ.

ނަމަވެސް ތަޖުރިބާކާރުން ދެކެވަޑައިގަންނަވާ ގޮތުގައި ސިޔާސީ އޮއިވަރު ކިތަންމެ ބާރަސް މިއީ މި ވަގުތަށް މަޖިލީހުގައި ގަދަ ހިފުމަކަށް ދާނެ މައްސަލައެއް ނޫނެވެ. އިތުބާރު ނެތް މައްސަލަ ހުށަހެޅީ ދެ މިނިސްޓަރުން ބޭރު ކުރެވިދާނެ ކަމަށް ގަބޫލު ކޮށްގެނެއް ނޫނެވެ. މިކަން ކުރުމުގެ ފަހަތުގައި އޮތީ މުޅިން އެހެން ނިޔަތެކެވެ. ސަރުކާރަށް ފިއްތުމެއް ކުރިމަތި ކުރުވުން ކަމަށް ބެލެވެ އެވެ. މަޖިލިހަށް އިތުބާރު ނެތްކަމުގެ މައްސަލައެއް ވައްދަން ބޭނުންވާ އަދަދަށް ސަރުކާރާ އިދިކޮޅަށް މެމްބަރުން ހަމަވެ އެވެ. އެހެންވެ، އެފަދަ މައްސަލަތައް ހުށަހެޅިދާނެ އެވެ. އެކަމަކު އަދި އަދަދުތައް ބުރަވަނީ ސަރުކާރު ކޮޅަށެވެ.

މަޖިލީހުގައި މެންބަރުން މިހާރު ބެހިފައި އޮތް ގޮތުން، އެމްޑީޕީން ވަކިވި މެންބަރުންނާއި އެ ޕާޓީއާ އަލަށް ގުޅިވަޑައިގަތް ނިލަންދޫ ދާއިރާގެ މެންބަރު އަބްދުލް މުހުސިން ހަމީދު (ޖޭފޯ) ހިމަނައިގެން އެ ޕާޓީގައި މިހާރު ތިބީ 56 މެންބަރުންނެވެ. އެކަމަކު، އެ ލިސްޓުން މަޖިލިހުގެ ރިޔާސަތުގައި އިންނަވަނީ މަޖިލިހުގެ ރައީސް ނަޝީދުގެ ނަން އުނިކުރުމުން އެމްޑީޕީގެ މަޖިލިިސް މެމްބަރުންގެ އަދަދަކީ 55 އެވެ.

މަޖިލީހުގެ ދަފްތަރުގައި ވަކި ޕާޓީއަކަށް ނިސްބަތް ނުވާ މެންބަރުން ގޮތުގައި ތިއްބެވި ނަމަވެސް "ދަ ޑިމޮކްރެޓްސް" ގެ ނަމުގައި މުޅިން އާ ސިޔާސީ ޕާޓީއެއް އުފެއްދުމުގެ މަސައްކަތް ކުރައްވަމުން އަންނަ އެމްޑީޕީގެ ކުރީގެ މެންބަރުންގެ އަދަދަކީ 13 އެވެ. އެ ޕާޓީ އަށް އިތުރު މެންބަރުންތަކެއް ގުޅިވަޑައިގަންނަވާނެ ކަމަށް ބުންޏަސް އެ މެންޒަރެއް އަދި ނުފެނެ އެވެ.

ދަ ޑިމޮކްރެޓްސްއާ އެއްގަލަކަށް އަރުއްވައިގެން މަޖިލީހުގައި ދެން ތިއްބަވާ ޕީޕީއެމް/ޕީއެންސީ އެއްކޮށްލައިގެން މިހާރު ވަނީ 8 މެންބަރުންނެވެ. ދެން ތިއްބަވަނީ ޖުމްހޫރީ ޕާޓީގެ ދެ މެންބަރުންނާއި އެމްއެންޕީގެ މެންބަރުންނާއި އެމްޑީއޭގެ ދެ މެންބަރުން އަދި ވަކި ޕާޓީއަކަށް ނިސަބަތް ނުވާ ތިން މެންބަރެކެވެ.

މީގެ ތެރެއިން ވަކި ކޮޅެއް މުޅިން ސާފު ނުވާ އުޅެނީ ދެތިން މެންބަރެކެވެ. އެއް ބޭފުޅަކީ ސަރުކާރުގެ އާ ކޯލިޝަންގައި ހިމެނުނަސް މަޖިލީހުގެ ތަޅުމުގައި ސަރުކާރަށް ހުއްޓުމެއް ނެތް ފާޑު ކިޔުން އަމާޒު ކުރައްވާ ކުޑަހުވަދޫ ދާއިރާގެ އެމްޑީއޭ މެންބަރު އަހުމަދު އާމިރެވެ. ސިޔާސީ ގޮތުން ވަކިން މަސައްކަތް ކުރެއްވިޔަސް އިތުބާރު ނެތް މައްސަލާގައި ޖުމްހޫރީ ޕާޓީގެ ލީޑަރު އަދި މާމިގިލި ދާއިރާގެ މެންބަރު ގާސިމް އިބްރާހިމްގެ ސްޓޭންޑެއް ސާފެއް ނުވެ އެވެ. ދެން ތިއްބެވި ވަކި ޕާޓީއަކަށް ނިސަބަތް ނުވާ މެންބަރުންގެ ވޯޓު ވެސް ދެކޮޅަށް ބެހޭނެ އެވެ. ބާކީ ތިއްބެވި ހުރިހާ މެންބަރުން ވަނީ އިދިކޮޅު ފަރާތްތަކާ ބައިއަތު ހިފައިފަ އެވެ.

އެހެންވެ، ހުރިހާ މެންބަރުންގެ ހާޒިރުގައި ވޯޓެއް ނަގައިފި ނަމަ އެމްޑީއޭގެ ލީޑަރު އަދި މީދޫ ދާއިރާގެ މެންބަރު އަހުމަދު ސިޔާމްގެ ތާއީދާ އެކު ސަރުކާރަށް 56 ލިބޭނެ އެވެ. ބާކީ ތިބި ހުރިހާ މެންބަރުންގެ ވޯޓު އެއްކޮށްލައިގެން އިދިކޮލަށް ހަމަވަނީ 30 އެވެ. އެއީ ގާސިމާއި އާމިރު އަދި ވަކި ޕާޓީއަކަށް ނިސްބަތް ނުވާ ހުރިހާ މެންބަރުން އިދިކޮޅަށް އަރައިފި ނަމަ އެވެ.

އިދިކޮޅުން ސަރުކާރާ އަރާ ހަމަކުރަން އަދި 27 މެންބަރުންގެ ވޯޓު ބޭނުން ވާނެ އެވެ. މިއީ މި ދަނޑިވަޅުގައި ބޮޑު "އިންގިލާބެއް" ނުގެނެސް ހޯދަން އުނދަގޫ ނަމްބަރެކެވެ.

މި ހިސާބުތަކަކީ އަލަށް އެނގޭ މައުލޫމާތެއް ނޫނެވެ. ވަކިން ހާއްސަކޮށް ސިޔާސީ ޕާޓީތަކުގެ ޕާލިމެންޓަރީ ގްރޫޕްތަކުގައި ހިސާބު ޖަހައި ވަރަށް ރަނގަަޅަށް ބަލައި ދިރާސާ ކުރާ ކަމެކެވެ. މި އަދަދުތައް ހުރި ގޮތް އިދިކޮޅު ފަރާތްތަކަށް ވެސް ވަރަށް ސާފެވެ. ދެން މިނިސްޓާރުން އިމްޕީޗް ކުރަން މައްސަލަ ހުށަހެޅީ ކީއްވެތޯ ސުވާލު އުފެއްދާލަން ރަނގަޅެވެ.

ފާސް ނުވިޔަސް ނުފޫޒު އޮތް ވަރު ހާމަވެ، ބޭޒާރު ވާނެ!

މި ސުވާލު އިދިކޮޅު ޕީއެންސީގެ ޕާލިމެންޓްރީ ގްރޫޕް ލީޑަރު އަދި މަޑުއްވަރީ ދާއިރާގެ މެންބަރު އާދަމް ޝަރީފާ ކުރުމުން އޭނާ ވިދާޅުވި ގޮތުގައި ސަރުކާރު ޖަވާބުދާރީ ކުރުވުމުގެ ޒިންމާ މަޖިލީހުގައި އޮންނާތީ ފާސް ވިޔަސް ނުވިޔަސް މި މައްސަލަ ހުށަހަޅަން ޖެހޭނެ ކަމާމެދު ސުވާލެއް ނެތެވެ.

މަޖިލިސް މެންބަރުން ގާނޫނީ ޒިންމާ އަދާކުރައްވައި ނުފޫޒުން އެއްކިބާ ވެވަޑައިގެން މަސައްކަތް ކުރައްވާ ނަމަ ވަރަށް ސާފު ކޮށް މި ވޯޓުތައް ކާމިޔާބު ކުރެވޭނެ ކަމަށް އާދަމް ޝަރީފް ވިދާޅުވި އެވެ.

ނަމަވެސް މަޖިލިސް މެންބަރުން ތިއްބެވީ ރައީސް އިބްރާހިމް މުހައްމަދު ސޯލިހު ވިދާޅުވި ގޮތަކަށް ވޯޓު ދެއްވަން ތައްޔާރަށް ކަމަށް ވާ ނަމަ އެ މަންޒަރު ވެސް ވަރަށް ރަނގަޅަށް ފެންނާނެ ކަމަށް އޭނާ ވިދާޅުވި އެވެ.

"މި ވޯޓުން ފެނިގެން ދާނެ ތިން ބާރު ވަކިވެފައި އޮތް ވަރު. ރައިސުލްޖުމްހޫރިއްޔާގެ ނުފޫޒު މަޖިލީހާއި މެންބަރުންގެ މައްޗަށް އޮތް ވަރު،" އާދަމް ޝަރީފް ވިދާޅުވި އެވެ.

އޭނާ ވިދާޅުވި ގޮތުގައި މަޖިލީހަށް މި މައްސަލަ ހުށަހަޅައިފި ނަމަ ރިފްއަތާއި ޝާހިދު ވެސް މަޖިލީހަށް ހާޒިރު ވާން މަޖުބޫރު ވާނެ އެވެ. އަދި ރައްޔިތުން ކަންބޮޑުވާ ކަނޑުގެ އިން ވަކި ކުރި މައްސަލާގައި ޖަވާބު ދާރީވާން ޖެހިވަޑައިގަންނަވާނެ އެވެ.

އިދިކޮޅު ޕާޓީތަކުގެ މެންބަރުން ތިއްބެވީ މަޖިލީހުގައި އެ ވަގުތު ގަދަ އަށް ސުވާލު ކުރުމަށާއި ބަހުސަށް ވަރަށް ރަނގަޅަށް ތައްޔާރު ވެގެން ކަމަށް އާދަމް ޝަރީފް ވިދާޅުވި އެވެ. މުޅި ޕްރޮސެސް ނިމޭއިރު، ފެނުނު މަންޒަރާއި ދެއްކި ވާހަކަތަކަށް ބަލައި "ރައްޔިތުންގެ ކޯޓުގައި" ގޮތެއް ނިންމާނެ ކަމަށް އޭނާ ވިދާޅުވި އެވެ.

"މަޖިލީހުގެ ވޯޓު ކޮންމެ ގޮތަކަށް ދިޔަ ކަމުގައި ވިޔަސް ރައްޔިތުން ވެސް ގޮތެއް ނިންމާނެ،" އާދަމް ޝަރީފް ވިދާޅުވި އެވެ.

އިދިކޮޅުން ހުށަހެޅި އިތުބާރު ނެތް ކަމުގެ ދެ މައްސަލަ އާ ވިއްދާ ސަރުކާރުން ވެސް ހުށަހަޅާފައިވާ އީވާގެ މައްސަލާގައި އާދަމް ޝަރީފް ވަރަށް ކަންބޮޑުވުން ފާޅުކުރެއްވި އެވެ. އޭނާ އެކަން ސިފަ ކުރެއްވީ މަޖިލީހުގެ މެޖޯރިޓީގެ އިތުރުން އިދިކޮޅު މެންބަރުންގެ އަޑު ކަނޑުވާލަން ކުރައްވާ ކަމެއްގެ ގޮތުގަ އެވެ.

ނަމަވެސް މަޖިލީހުގެ ރައީސް ނަޝީދު ހުންނެވިހާ ދުވަހަކު މައިނޯރިޓީ އަށް ޖާގަ ދެއްވާނެ ކަމަށް ގަބޫލު ކުރައްވާ ކަމަށް އާދަމް ޝަރީފް ވިދާޅުވި އެވެ.

ދައްކަނީ "ފީކަޅާ ވާހަކަ"، ބޭނުމީ އަޑެއް އިއްވާލަން!

އަނެއް ކޮޅަށް ބަލާއިރު ސަރުކާރަށް އެމްޑީޕީގެ ޕާލިމެންޓަރީ ގްރޫޕަށް ފުރިހަމަ އަށް އިތުބާރު އެބަ އޮތެވެ. މިހާރު އޮތް މެޖޯރިޓީއަކުން އިދިކޮޅު ފަރާތްތަކަށް "އަޑެއް އިއްވުން" ފިޔަވައި އިތުރު ކަމެއް ނުވާނެ ކަން އެނގެ އެވެ.

އެމްޑީޕީގެ ޕީޖީ ލީޑަރު އަދި ހިތަދޫ އުތުރު ދާއިރާގެ މެންބަރު މުހައްމަދު އަސްލަމް "މިހާރު" އަށް ވިދާޅުވި ގޮތުގައި މި މައްސަލަތައް ނިމިގެން ދާނެ ގޮތް އިދިކޮޅު ފަރާތްތަކަށް ވެސް ވަރަށް ސާފެވެ. އެހެން ނަމަވެސް އިތުބާރު ނެތް މައްސަލަތަކުން ހާސިލް ކުރަން ބޭނުންވާ މަގްސަދަކީ ސަރުކާރަށް ފާޑު ކިޔުމާއި ޕްރެޝަރު ބޮޑު ކުރުމެވެ. ގަދަ އަޑެއް އިއްވާލައި މަޖިލީހުގެ ވަގުތު އެގޮތަށް ހުސްކޮށްލުމެވެ.

"ވަޒީރެއްގެ އިތުބާރު ނެތް މައްސަލައެއް ދުނިޔޭގެ ކޮންމެ ގައުމެއްގައި ވެސް މަޖިލީހަށް މި ހުށަހަޅަނީ ވަރަށް ބައިވަރު މައްސަލަތަކާއި ސީރިޔަސް ކަންތައްތަކެއް އޭގެ ތެރޭގައި ހިމެނޭތީ. ކަނޑާ ގުޅޭ ގޮތުން އެ ދައްކަނީ ހަމަ ފީކަޅާ ވާހަކަތަކެއް," އަސްލަމް ވިދާޅުވި އެވެ.

މިހާރު ހުށަހަޅާ ކުއްލި މައްސަލަތަކާއި ގަރާރުތަކަކީ ވެސް އެ މަސައްކަތުގެ ބައެއް ކަމަށް އަސްލަމް ވިދާޅުވި އެވެ. ނަތީޖާއެއް ނުފެންނާނެ ކަން އެނގެ އެވެ. ވޯޓާ ހަމައިން ކޮޅެއްގައި ނުޖެހޭނެ ކަން ވެސް މެންބަރުންނަށް އެނގޭނެ އެވެ. އެހެން ނަމަވެސް ބޭނުމަކީ މަޖިލީހަކީ ސަރުކާރާ ދެކޮޅު ހަރަކާތް ހިންގާ ތަނެއްގެ ގޮތުގައި ބޭއްވުން ކަމަށް އޭނާ ވިދާޅުވި އެވެ.

އެހެން ނަމަވެސް އަސްލަމްގެ ވާހަކަތައް ހުންނެވީ މިފަހަރު އެ ފުރުސަތު ދެއްވާ ކަހަލަ ގޮތަކަށް ނޫނެވެ.

ރިފްއަތާއި ޝާހިދު މަޖިލީހަށް ހާޒިރު ކުރަން ޖެހޭނެ ކަމަށް އާދަމް ޝަރީފް ވިދާޅުވި ނަމަވެސް އަސްލަމް ވިދާޅުވީ އިތުބާރު ނެތް މައްސަލަތަކުގައި ލިޔުމުން ޖަވާބުދާރީވުމުގެ ފުރުސަތު ވެސް މިނިސްޓަރުންނަށް އޮންނާނެ އެވެ. އަދި ބޭނުންވާނަމަ އެކަން ވެސް ނުކޮށް ދޫކޮށްލެވިދާނެ ކަމަށް އޭނާ ވިދާޅުވި އެވެ.

"ކޮންމެ ގޮތެއް ވިޔަސް ނަތީޖާ ނުކުންނާނީ ހަމަ އެންމެ ގޮތަކަށް،" އޭނާ ވިދާޅުވި އެވެ.

ކުރިއަށް މި އޮތް ވޯޓުން ދެ ބައި ވަކިވެފައި އޮތް ގޮތް ވަރަށް ސާފުކޮށް ފެންނާނެ އެވެ. އެކަމަކު އަދިވެސް ބައެއް މެންބަރުން އިދިކޮޅަށް ހިނގައިދާނެ ކަމަށް ދެއްކެވޭ ވާހަކަތަކަށް ރައްދު ދެއްވަމުން އަސްލަމް ވިދާޅުވި ގޮތުގައި އީވާ ވަކި ކުރަން ހުށަހެޅި 50 މެންބަރުންގެ ތެރެއިން އެންމެ ވޯޓެއް ވެސް އިދިކޮޅަކަށް ނުދާނެ އެވެ. ކުރިމަގުގައި ވާނީ އިތުރު ކަމަށް އަސްލަމް ވިދާޅުވި އެވެ.

"އެއް ގޮތަކަށް ވެސް ފަހަތަށް ދިޔުމެއް ނެތް. ޝާހިދާއި ރިފްއަތުގެ މައްސަލަ ފެއިލް ކޮށްލާނަން،" ވަރަށް ޔަގީންކަމާ އެކު ވިދާޅުވި އެވެ.

ވެރިކަމުގެ ފަހު އަތަށް އެޅޭ ވަރަކަށް ރައްޔިތުންގެ މަޖިލީހުގައި ކޮންމެ ފަހަރަކު މަސައްކަތްތަކަށް ވުރެ ބޮޑަށް އޮންނަނީ ސިޔާސީ ކޯޅުމެވެ. އެމްޑީޕީގެ އަޣުލަބިއްޔަތު އޮތް ނަމަވެސް 19 ވަނަ މަޖިލީހުގައި ވެސް އެ މަންޒަރެއް ތަފާތެއް ނުވި އެވެ. ރައްޔިތުންނާ ގުޅޭ މުހިންމު ބިލްތައް ފަހަތަށް ޖައްސާފައި ކުރިޔަށް ނެރެން އޮތީ އިތުބާރު ނެތް މައްސަލަތަކާއި ސިޔާސީ ޒުވާބުތަކަށް ވަގުތު ހުސްކުރާ ގަރާރުތަކެވެ.

މިކަމުގެ ތެރޭގައި މެންބަރުންގެ "ޓްރާންސްފާ މާކެޓް" ހުޅުވި ފަޅި ބަދަލު ކުރުމާއި އެކި ކޮޅު ކޮޅަށް ކިރި ނިމޭއިރު މިހާރު މި ޖަހާ ހިސާބު އެތައް ގޮތަކަށް ބަދަލުވުމަކީ އެކަށީގެންވާ ކަމެކެވެ. ނަމަވެސް މިހާރު ހުށަހަޅާފައިވާ އިތުބާރު ނެތް ކަމުގެ މައްސަލަތަކަކީ މެންބަރުން ތިބި ގޮތް ސާފުވެ, މުގުރު ޖަހާ ހިސާބެވެ.