ރިޔާސީ އިންތިހާބުގައި އައްޑޫގެ މެޖޯރިޓީ ލިބޭނީ ރައީސަށް: ރޮޒައިނާ

އަންނަ ސެޕްޓެމްބަރު މަހު ބާއްވާ މި އަހަރުގެ ރިޔާސީ އިންތިހާބުގައި އައްޑޫގެ އަޣުލަބިއްޔަތު މީހުންގެ ވޯޓު ލިބޭނީ ރައީސް އިބްރާހިމް މުހައްމަދު ސޯލިހަށް ކަމަށް މީދޫ ދާއިރާގެ މެމްބަރު ރޮޒައިނާ އާދަމް ރޭ ވިދާޅުވެއްޖެ އެވެ.

ފޭދޫގެ އެމްޑީޕީ ޖަގަހަ ހުޅުވުމަށް ފަހު، ނޫސްވެރިންނާ ވަހަކަ ދައްކަވަމުން އޭނާ ވިދާޅުވީ، ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި އެމްޑީޕީގެ އިތުރުން އެހެން ޕާޓީތަކުގެ މީހުންގެ ވޯޓު ވެސް އައްޑޫ އިން ލިބޭނީ އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހަށް ކަމަށެވެ.

"... އަދި އަޅުގަނޑަށް މިހާރު ފެންނަ ތަނުގައި އެމްޑީޕީގެ އިތުރުން އެހެން ޕާޓީތަކުގެ މީހުންނާއި އެެއްވެސް ޕާޓީއަކަށް ނުވާ ނިއުޓްރަލް މީހުންގެ ވޯޓު ވެސް ރައީސަށް މި ފަހަރު ލިބިގެންދާ ތަން އައްޑޫ ސިޓީން ފެނިގެ ންދާނެ،" އެމްޑީޕީގައި މިހާރު އެންމެ ބާރުގަދަ ބޭފުޅުންގެ ތެރޭގައި ހިމެނިވަޑައިގަންނަވާ ރޮޒައިނާ ވިދާޅުވި އެވެ.

އޭގެ އެއް މިސާލަކަށް އޭނާ ދެއްކެވީ ރައީސް އިއްޔެ އައްޑު އަށް ވަޑައިގަތުމުން އައްޑޫ މީހުން ކިޔާފައިވާ ހޫނު މަރުހަބާ އެވެ. ރައީސް އިބްރާހިމް މުހައްމަދު ސޯލިހަށް މަރުހަބާ ކިޔަން މަރަދު އަށް ވަރަށް ގިނަ އަދަދެއްގެ ބަޔަކު އެއްވުމުން، އެ އެންމެންނާ އެ މަނިކުފާނަށް ސަލާމްކޮށް ނިންމައިލެވުނީ ގަޑިއެއްހާއިރު ފަހުންނެވެ.

"ވަރަށް ޒަމާން ވެއްޖެ އައްޑޫ ސިޓީގެ ރައްޔިތުންނަށް ކޮންމެ ވެރިކަމެއްގައި ވެސް ކޮށްދޭނަން، ކޮށްދޭނަން، މި ވައުދުތައް ވަމުން އަންނަތާ. އެކަމަކު މިއަދު ފެނިގެން އެ ދިޔައީ ހަމަ މަސައްކަތް ފެށިގެން ދިޔަތަން. މަސައްކަތް ކުރިއަށް ދަނިކޮށް ރައީސް މި ވަޑައިގެންނެވީ ވެސް،" އައްޑޫގެ ބިން ހިއްކުމަށް މިހާތަނަށް ހިންގާ އެންމެ ބޮޑު މަޝްރޫއު އިއްޔެ ރަސްމީކޮށް ފެށުމާ ގުޅިގެން އެ އަަށް އިޝާރާތް ކުރައްވައި ރޮޒައިނާ ވިދާޅުވި އެވެ.

"މިހާރު އެންމެންނަށް ވެސް ގަބޫލު ކުރެވޭ ހަމަ ކޮށްދޭން ވެގެން ވިދާޅުވާ އެއްޗެއް ކަން އެއީ ހަމަ، ހަމަ ހުރެފައި ވިދާޅުވާ ވާހަކަތަކެއް ނޫން ކަން."

ރޮޒައިނާ ވިދާޅުވިގޮތުގައި، އައްޑޫ މީހުން ދައްކުވައިދިނީ ރައީސް އިބްރާހިމް މުހައްމަދު ސޯލިހު ވިދާޅުވާ ވާހަކަފުޅުތައް ގަބޫލުކުރާ ކަމުގެ ހެއްކެވެ.

އައްޑޫ ބިން ހިއްކައި ގޯތި ލިބުމަކީ އައްޑޫގެ މީހުން ވަރަށް ބޭނުންވެފައިވާ ކަމެއް ކަމަށެވެ. އެ ތަފާތު މި އަހަރުގެ ރިޔާސީ އިންތިހާބުން ވެސް ފެންނާނެ ކަމަށް ރޮޒައިނާ ވިދާޅުވި އެވެ.

އައްޑޫގެ ބިން ހިއްކުމުގެ މަޝްރޫއު ހިންގަނީ އިންޑިއާގެ އެގްޒިމް ބޭންކުގެ 800 މިލިއަން ޑޮލަރުގެ ކްރެޑިޓް ލައިންގެ އެހީގަ އެވެ. އެ މަޝްރޫއުގެ ދަށުން 194.3 ހެކްޓަރުގެ ބިން ހިއްކާނެ އެވެ.