ކޮމިޝަންގެ މެމްބަރުންނާ ބައްދަލުނުވީ އިދިކޮޅުން ގަޑި ޖެހިގެން ދިއުމުން: އެޗްއާރުސީއެމް

ހިއުމަން ރައިޓް ކޮމިޝަން އޮފް ދަ މޯލްޑިވްސް (އެޗްއާރުސީއެމް)ގެ މެމްބަރުންނާ، އިދިކޮޅު ކޯލިޝަންގެ ލީޑާޝިޕްގެ ބޭފުޅުންނާ ބައްދަލުނުކުރެއްވުނީ އެޕޮއިޓްމަންޓް ހަމަޖައްސައި ދީފައިވާ ގަޑިއަށް ވަޑައިނުގަތުމުން ކަމަށް އެ ކޮމިޝަނުން މިއަދު ބުނެފި އެވެ.

އެޗްއާރުސީއެމްގެ ނޫސްބަޔާނެއްގައި ބުނީ އިދިކޮޅުން އެޗްއާރުސީއެމްގެ މެމްބަރުންނާ ބައްދަލުކުރަން ސިޓީއަކުން އިއްޔެ އެދިފައި ވާތީ މާދަމާ ނުވަތަ އަންނަ ހަފުތާއަށް އެ ބައްދަލުވުން ހަމަޖައްސައިދިނުމަށް އެ ކޮމިޝަނުން ހުށަހެޅި ކަމަށެވެ. ނަމަވެސް، ވީ އެންމެ އަވަހަކަށް އެ ބައްދަލުވުން ބާއްވައިިދޭން އިދިކޮޅުން އެދުމުން މިއަދު ހެނދުނު 11:15 އަށް އެޕޮއިޓްމަންޓް ހަމަޖައްސައިދިން ކަމަށް އެ ކޮމިޝަނުން ބުންޏެވެ.

ނަމަވެސް، އެ ގަޑިއަށް އިދިކޮޅުގެ ބޭފުޅުން ހާޒިރުނުވި ކަމަށް އެ ކޮމިޝަނުން ބުންޏެވެ.

"...ހަމަޖައްސާފައިވާ ވަގުތަށް ޕީޕީއެމް/ޕީއެންސީ ކޯލިޝަނުން މި ބައްދަލުވުމަށް ގަޑިޖެހިގެން އެތައް އިރެއް ވީއިރު ވެސް ވަޑައިގެންފައި ނުވާތީ އެ ފަރާތަށް ދެންނެވުމަށް ފަހު ޖޫން 15، 2023 ވަނަ ދުވަހުގެ ހެނދުނު 9:00 އަށް ބައްދަލުވުން ހަމަޖައްސައި އެކަން ކޯލިޝަނަށް ސިޓީއަކުން އަންގާފައިވެ އެވެ،" އެޗްއާރުސީއެމުން ބުންޏެވެ.

އެޗުއާރުސީއެމުން ބުނީ އެގޮތަށް އަންގާފައި ވަނިކޮށް 12:45 ގައި އިދިކޮޅު ކޯލިޝަންގެ ބޭފުޅުން ގިނަ އަދަދެއްގެ ބަޔަކު ގޮވައިގެން ކޮމިޝަނުގެ އޮފީސް ތެރެއަށް ވަން ކަމަށެވެ. އޭރު ކޮމިޝަންގެ މެމްބަރުން ތިބީ އެހެން ބައްދަލުވުމެއްގައި ކަމަށެވެ. އަދި ކޮމިޝަންގެ މެމްބަރުންނާ ބައްދަލުނުކޮށް އެތަނުން ނުކުންނަ ދެކޮޅު ހަދައި، އޮފީސް ތެރޭގައި އަޑުގަދަކުރި ކަމަށް އެޗުއާރުސީއެމުން ބުންޏެވެ.

އިދިކޮޅުން އަމަލުކުރި ގޮތުގެ ސަބަބުން ކޮމިޝަންގައި މަސައްކަތްކުރާ މުވައްޒަފުންގެ ހިތުގައި ބިރުވެރިކަން އުފެދި، މަސައްކަތުގެ މާހައުލުގައި އެ މުވައްޒަފުންނަށް ލިބެންޖެހޭ ރައްކާތެރިކަމަށް ހުރަސްއެޅިފައިވާ ކަމަށް ވެސް އެ ކޮމިޝަންގެ ނޫސްބަޔާނުގައި ބުންޏެވެ. އަދި އެކަމުގެ ސަބަބުން ކޮމިޝަންގެ މަސައްކަތްތަކަށް ވެސް ބުރޫއެރި ކަމަށް އެ ބަޔާނުގައި ބުންޏެވެ.

މެންދުރުފަހު 12:45 ގައި އިދިކޮޅުގެ ލީޑާޝިޕްގެ ބޭފުޅުން އެޗްއާރުސީއެމަށް ވަޑައިގެންނެވި ގޮތަށް އަދިވެސް ތިއްބެވީ އެތަނުގަ އެވެ. އެ ބޭފުޅުން އެޗްއާރުސީއެމްއަށް ވަޑައިގަތީ، މިހާރު ޖަލުގައި ހުންނެވި އިދިކޮޅުގެ ލީޑަރު އަދި ކުރީގެ ރައީސް އަބްދުﷲ ޔާމީނަށް މި ސަރުކާރުން އަނިޔާކުރާ ކަމަށް ބުނެ އެކަމުގެ ތަފުސީލު އެ ކޮމިޝަނާ ހިއްސާކުރުމަށެވެ.