ކުރިއަށް އޮތް 131 އަހަރު ވެސް ޖިންސީ ހަމަހަމަކަން ގާއިމެއް ނުވާނެ: ރިޕޯޓް

ޖިންސީ ހަމަހަމަކަން ހޯދަން ކުރާ މަސައްކަތުގެ ދުވެލި މަޑު ކަމަށާއި ކުރިއަށް އޮތް 131 އަހަރު ވެސް އެކަން ހާސިލް ނުވާނެ ކަމަށް ވޯލްޑް އިކޮނޮމިކް ފޯރަމްގެ "ގްލޯބަލް ޖެންޑާ ގެޕް ރިޕޯޓް" ގައި ބުނެފި އެވެ.

އެ ރިޕޯޓްގައި ބުނެފައިވާ ގޮތުގައި އިގްތިސާދީ، ސިއްހީ އަދި ތައުލީމީ ދާއިރާގައި ދެ ޖިންސުގެ ދެމެދުގައި ހުރި ފަރަގު ނައްތާލުމުގައި މިދިޔަ އަހަރާ އަޅާބަލާއިރު ލިބުނީ 0.3 ޕަސެންޓުގެ ކުޑަ ކުރިއެރުމެކެވެ.

މީގެ ތެރެއިން އިގްތިސާދު ފަދަ ދާއިރާތަކުގައި ކުރިއެރުން ނުލިބި ފަހަތަށް ގޮސްފައި ވުމަކީ ކަންބޮޑުވުން އޮތް އަދި އަލުން މި މަސައްކަތް ފަށަންޖެހޭ ކަމުގެ ސިގްނަލެއް ކަމަށް ޑަބްލިޔު.އީ.އެފްގެ މެނޭޖިން ޑިރެކްޓަރު ސާދިއާ ޒާހިދީ މި ރިޕޯޓްގައި ވިދާޅުވެފައިވެ އެވެ.

"ކޮވިޑް19 ގެ ސަބަބުން، މިދިޔަ ދެތިން އަހަރު، ޖިންސީ ހަމަހަމަކަން ގާއިމުކުރުމުގައި މުޅި ދުނިޔޭގައި ވެސް ވަރަށް ބޮޑެތި ނާކާމިޔާބީތަކާ ކުރިމަތިވި. އެއީ އަންހެނުންނާއި އަންހެން ކުދިންގެ ތައުލީމާއި މަސައްކަތުގެ މާހައުލަށް އެ ބަލިމަޑުކަމުގެ ސަބަބުން ކުރިމަތިވި ނޭދެވޭ އަސަރުތަކުގެ ސަބަބުން،" ސާދިއާ ވިދާޅުވެފައިވެ އެވެ.

"ލިބުނު މި ގެއްލުން ބައެއް ގައުމުތަކުގައި ފޫބައްދަމުން އަޔަސް އެހެން ބައެއް ގައުމުތަކުގައި ދަނީ އިތުރަށް ގޯސްވަމުން."

ޑަބްލިޔުއީއެފްގެ ރިޕޯޓްގައި ޖެންޑާ ގެޕް އިންޑެކްސް ނުވަތަ ޖިންސީ ތަފާތުކަން އޮތް މިންވަރު 146 ގައުމެއްގައި ބަލާފައިވަނީ މައިގަނޑު ހަތަރު ދާއިރާއަކަށް ބަލައިގެންނެވެ. އެއީ؛

- އިގްތިސާދީ ކަންކަމުގައި ބައިވެރިވާ މިންވަރާއި އެ ދާއިރާއިން ލިބޭ ފުރުސަތު

- ތައުލީމީ ދާއިރާއިން ލިބޭ ފުރުސަތު

- ސިއްހަތާއި އެކަމާ ގުޅުން ހުރި ކަންކަން

- ސިޔާސީ ގޮތުން ބާރުވެރިކުރުވުން

ރިޕޯޓްގައި ބުނެފައިވާ ގޮތުން 2006 ވަނަ އަހަރު މި ރިޕޯޓް ނެރެން ފެށިއިރާ އަޅާބަލާއިރު ޖުމްލަކޮށް މިހާތަނަށް ލިބިފައިވަނީ 4.1 ޕަސެންޓުގެ ކުރިއެރުމެކެވެ.

ތައުލީމީ ދާއިރާގައި ދެ ޖިންސުގެ މެދުގައި އޮތް ތަފާތު ކުޑަވެފައި ވިޔަސް ސިޔާސީ މައިދާނުގައި އަންހެނުން ބާރުވެރިކުރުވުމުގައި ފަހަތަށް ސޮއްސާލާފައިވުން އެއީ ކަންބޮޑުވުމެއްގެ ގޮތުގައި މި ރިޕޯޓްގައި ފާހަގަކޮށްފައިވެ އެވެ.

ޑަބްލިއުއީއެފް އިން އަންދާޒާކުރާ ގޮތުގައި އިގްތިސާދީ ދާއިރާގައި ޖިންސީ ހަމަހަމަކަން އަންނަން އަދި 169 އަހަރު ހޭދަވެދާނެ އެވެ. ސިޔާސީ ކަންކަމުގައި އޮތް މި ފަރަގު ނައްތާލަން 162 އަހަރު ހޭދަވާނެ އެވެ.

މުޅި ދުނިޔެ އަށް ބަލާއިރު ޖިންސީ ތަފާތު 80 ޕަސެންޓަށް ކުޑަކުރެވިފައިވަނީ އެންމެ ނުވަ ގައުމެއްގަ އެވެ. އެއީ އައިސްލެންޑާއި ނޯވޭ އާއި ފިންލެންޑާއި ނިއު ޒީލެންޑާއި ސްވިޑްން އާއި ޖަރުމަނާއި ނިކަރާގުއާ އާއި ނެމީބިއާ އަދި ލިޔުއޭނިއާ އެވެ. އައިސްލެންޑް ވަނީ 14 ވަނަ ފަހަރަށް، ޖިންސީ ތަފާތު އެންމެ ކުޑަ ގައުމުގެ ގޮތުގައި މި ފަހަރު ވެސް ހިމެނިފަ އެވެ. އެއީ 91.2 ޕަސެންޓަށް ތަފާތު ކުޑަކޮށްގެންނެވެ.