ޑިމޮކްރަސީ ކުރިއެރުވުމުގައި ޖިންސުގެ ހަމަހަމަކަން މުހިންމު: ދުންޔާ

މުސްލިމް ގައުމުތަކުގައި ޑިމޮކްރަސީ ކުރިއެރުވުމުގައި އަންހެނުންގެ ހަމަހަމަކަމަކީ މުހިންމު ކަމެއް ކަމަށް ކުރީގެ ފޮރިން މިނިސްޓަރު ދުންޔާ މައުމޫން ވިދާޅުވެއްޖެ އެވެ.

މި ސަރުކާރުގެ ފުރަތަމަ ފޮރިން މިނިސްޓަރަކަށް ހުންނެވުމަށް ފަހު މި އަހަރުގެ ތެރޭގައި މަގާމުން އިސްތިއުފާ ދެއްވި ދުންޔާ އެގޮތަށް ވިދާޅުވީ މެލޭޝިއާގެ ކުއަލަމްޕޫރުގައި ބޭއްވި މުސްލިމް ލީޑާސް ފޯރަމްގެ ތިން ވަނަ ބައްދަލުވުމުގައި އިއްޔެ ވާހަކަ ދައްކަވަމުންނެވެ.

ދުންޔާ ވިދާޅުވީ މުސްލިމް ޑިމޮކްރެޓިކް މުޖުތަމައުތަކުގެ ތަރައްގީ އާއި ކުރިއެރުވުމުގައި އަންހެނުންގެ ބައިވެރިވުމާއި ހަރުދަނާ އިޖްތިމާއީ އަދުލުގެ ނިޒާމެއް އޮތުމަކީ އެ މުޖުތަމައެއްގެ ހަމަޖެހުމާއި ތަރައްގީ އޭގެ މައްޗަށް ބިނާވެފައިވާ ކަންތައްތަކެއް ކަމަށެވެ. އަދި އިސްލާމީ ދުނިޔޭގައި އަންހެނުންގެ ދައުރާއި އަންހެނުން ހޯދާފައިވާ ކާމިޔާބީތަކުގެ އިތުރުން ދިމާވާ ގޮންޖެހުންތަކަށް ވެސް އޭނާ ވާހަކަ ދެއްކެވި އެވެ.

މި ފޯރަމަކީ މެލޭޝިއަން އޭޝިއަން ސްޓްރެޓީޖިކް އެންޑް ލީޑަޝިޕް އިންސްޓިޓިއުޓް އިން އިންތިޒާމްކުރި ފޯރަމެކެވެ. މިފަހަރުގެ ފޯރަމްގައި ދުނިޔޭގެ އެކި ކަންކޮޅުތަކުން އެކި ފެންވަރުގެ މަންދޫބުން ބައިވެރިވި އެވެ.