ނަޝީދު ވަކިވުމަކީ ހިތާމައެއް، އެ ބަޔަކު އިހުތިޔާރުކުރާ މަގުން ކުރިއަށްދާން މަގުފަހިވާނެ: ފައްޔާޒު

އެމްޑީޕީގެ ރައީސް މުހައްމަދު ނަޝީދު އެ ޕާޓީން ވަކިވެވަޑައިގަތުމަކީ ހިތާމައެއް ކަމަކަށް ވިޔަސް އެކަމުގެ ސަބަބުން އެ ބަޔަކު އިހުތިޔާރުކުރާ މަގުން ކުރިއަށް ދާން މަގުފަހިވާނެ ކަމަށް އެ ޕާޓީގެ ޗެއާޕާސަން ފައްޔާޒު އިސްމާއިލް މިއަދު ވިދާޅުވެއްޖެ އެވެ.

ނަޝީދުގެ ސިޔާސީ ހަޔާތް ފެއްޓެވި ޕާޓީން މިއަދު ވަކިވެވަޑައިގެންނެވި ސިޓީއާ އެކު ކުރެއްވި ޓްވީޓަށް ހެޔޮ އެދުމާއި ކާމިޔާބީ އަށް އެދިވަޑައިގެން ފައްޔާޒު ވިދާޅުވީ މަޖިލީހުގެ ރައީސް އެމްޑީޕީން ވަކިވެވަޑައިގަތުމުން މިއަދަކީ ހިތާމަވެރި ދުވަހެއް ކަމަށެވެ.

ނަމަވެސް، އެ ޕާޓީއަކުން އިހުތިޔާރުކުރާ މަގަކުން ކުރިއަށް ދިއުމުގެ މަގު ފަހިވާނެ ކަމަށް ފައްޔާޒު ވިދާޅުވި އެވެ.

"އެމްޑީޕީގައި ތި ކުރެއްވި މަސައްކަތްޕުޅުތަކާއި ލީޑަޝިޕްގައި ހޯއްދެވި ކާމިޔާބީއަށް ޝުކުރު ދަންނަވަން،" އިކޮނޮމިކް މިނިސްޓަރުކަން ވެސް ކުރައްވާ ފައްޔާޒުގެ ޓްވީޓުގައިވެ އެވެ.

އިސްތިއުފާގެ ސިޓީގައި ނަޝީދު ވިދާޅުވީ ގައުމުގައި މި ވަގުތު ކަންކަން ހިނގަމުންދާ ގޮތުން އެމްޑީޕީގައި މި ވަގުތު ހުރުމަކީ އެންމެ ރަނގަޅު ގޮތް ކަމަށް ފެނިވަޑައިނުގަންނަވާ ކަމަށެވެ.

އެ ޕާޓީން ވަކިވާން ނަޝީދު ނިންމެވިއިރު، ރައްޔިތުންގެ މަޖިލީހުގެ އިދާރާގައި މިދިޔަ ހޯމަ ދުވަހު ބޭއްވި ނިއުސް ކޮންފަރެންސްގައި އެ މަނިކުފާނު ވިދާޅުވީ އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހަށް ރިޔާސީ އިންތިހާބު ކާމިޔާބުވާން އެދިވަޑައިނުގަންނަވާ އިރު ވެސް އެމްޑީޕީގައި ހުންނަވަނީ އެ ޕާޓީ އަތުލަން ކަމަށެވެ.

ނަޝީދުގެ އަރިސް މެމްބަރުންތަކެއް ވެސް ވަނީ އެމްޑީޕީން ވަކިވެވަޑައިގެން ޑިމޮކްރެޓްސްގެ ނަމުގައި އާ ޕާޓީއެއް ރަޖިސްޓްރީކުރަން އިލެކްޝަންސް ކޮމިޝަނަށް ހުށަހަޅުއްވައިފަ އެވެ. އެ ދުވަހުގެ މީޑިއާ ބްރީފިންގައި ވެސް ނަޝީދު ވިދާޅުވީ އަރިސް މެމްބަރުން ޑިމޮކްރެޓިކް ޕާޓީ އުފެއްދެވިޔަސް އޭގެ ފަހަތުގައި ވެސް އޮތީ އެމްޑީޕީ އަތުލުން ކަމަށެވެ.

"އަޅުގަނޑު އެމްޑީޕީގައި މި ހުންނަނީ އެމްޑީޕީ އަލުން އަނބުރާ އަތުލަން. އަޅުގަނޑު ދަންނަވައިފިން އިރާދަކުރެއްވިއްޔާ އަޅުގަނޑު އެކަން ކުރާނަމޭ،" ނަޝީދު ވިދާޅުވި އެވެ.

ނަޝީދު އެމްޑީޕީ މި ދޫކުރެއްވީ އެހެން ވިދާޅުވިތާ ދެ ދުވަސް ފަހުންނެވެ.

ޑިމޮކްރެޓްސް އިން ވަނީ އަންނަ ސެޕްޓެމްބަރު މަހު ބާއްވާ ރިޔާސީ އިންތިހާބަށް ކެންޑިޑޭޓަކު ނެރޭނެކަން އިއުލާންކޮށްފަ އެވެ. އެ ޕާޓީއާ ގުޅިވަޑައިގެން އިންތިހާބުގައި ވާދަކުރައްވާނެތޯ ރައްޔިތުންގެ މަޖިލީހުގެ އިދާރާގައި މިދިޔަ ހޯމަ ދުވަހު ބޭއްވި ޕްރެސް ކޮންފަރެންސްގައި ނޫސްވެރިން ސުވާލުކުރުމުން ސީދާ ޖަވާބެއް ނުދެއްވަ އެވެ.