ބެޔާން ދޫކޮށް ލޫކަސް ހެނާންޑޭޒް ޕީއެސްޖީ އަށް

ޕެރިސް (ޖުލައި 10) - މިދިޔަ ހަތަރު ސީޒަނުގައި ޖަރުމަނުގެ ބެޔާން މިޔުނިކަށް ކުޅުނު ފްރާންސްގެ ޑިފެންޑަރު، ލޫކަސް ހެނާންޑޭޒް ޕީއެސްޖީ އަށް ބަދަލުވެއްޖެ އެވެ.

ހެނާންޑޭޒް، 27، ފަސް އަހަރުގެ މުއްދަތަކަށް ޕީއެސްޖީ އަށް ބަލުވީ 43 މިލިއަން ޕައުންޑަށެވެ.

ފްރާންސާ އެކު 2018 ވަނަ އަހަރު ފީފާ ވޯލްޑް ކަޕް ކާމިޔާބުކޮށް ހެނާންޑޭޒް ބެޔާންއާ ގުޅުނީ 2019 ވަނަ އަހަރު އެވެ. ފުރަތަމަ ސީޒަނުގައި ހެނާންޑޭޒް ވަނީ ބެޔާންއާ އެކު ޖަރުމަނުގެ ތިން ތަށި ހޯދައިފަ އެވެ. އެ ފަހަރު ޖަރުމަނު ކަޕްގެ އިތުރުން ޖަރުމަނު ބުންޑަސްލީގާ އާއި ޔޫއެފާ ޗެމްޕިއަންސް ލީގު ކާމިޔާބުކުރި އެވެ. ޗެމްޕިއަންސް ލީގު އެފަހަރު ހޯދީ ފައިނަލްގައި ޕީއެސްޖީ ބަލިކޮށްގެންނެވެ.

ވާތް ފަޅިން ފަހަތަށް ކުޅޭ ހެނާންޑޭޒް ވަނީ ބެޔާން އަށް 107 މެޗު ކުޅެފަ އެވެ.

"އަހަރެން މިހުރީ ވަރަށް އުފަލުން. ޕީއެސްޖީއާ ގުޅެން އަހަރެން ބޭނުންވެގެން އުޅޭތާ އެތައް ދުވަހެއް. އެންމެ ފަހުން އެކަން ވެއްޖެ. މިއީ އަހަރެންނަށް ވަރަށް ހާއްސަ ދުވަހެއް" ފްރާންސް ގައުމީ ޓީމުގެ ކުޅުންތެރިޔާ ބުންޏެވެ.

ރަޝިއާގައި އޮތް ވޯލްޑް ކަޕް ފްރާންސް ކާމިޔާބު ކުރިއިރު ހެނާންޑޭޒް މޮޅު ކުޅުމެއް ދެއްކި އެވެ. އެކަމަކު މިދިޔަ އަހަރުގެ ވޯލްޑް ކަޕްގެ ފައިނަލަށް ފްރާންސް ދަތުރު ކުރިއިރު ހެނާންޑޭޒް އަށް އަނިޔާވެ ގިނަ މެޗުތަކެއް ގެއްލުނެވެ. ގްރޫޕް ސްޓޭޖުގެ ތިން ވަނަ މެޗުގައި އަނިޔާވުމުން އޭނާ އަށް ވޯލްޑް ކަޕްގެ ބާކީ މެޗުތައް ގެއްލުނެވެ. ބަދަލުގައި އެ މަގާމް ފޫބެއްވީ އޭސީ މިލާނަށް ކުޅެމުން އަންނަ އޭނާގެ ކޮއްކޮ ތިއޯ ހެނާންޑޭޒް އެވެ.

ޕީއެސްޖީ އިން އަންނަނީ އާ ސީޒަނަށް ގިނަ ކުޅުންތެރިންތަކެއް ގެންނަމުންނެވެ. އެޓީމުގެ ކޯޗުކަމަށް ހަމަޖެއްސީ ކުރިން ބާސެލޯނާގެ ކޯޗުކަން ކުރި ލުއިސް އެންރީކޭ އެވެ. ހެނާންޑޭޒްގެ އިތުރުން އެޓީމަށް ސޮއިކުރީ ރެއާލް މެޑްރިޑަށް ކުޅުނު މާކޯ އަސެންސިއޯ އާއި ރެއާލް މަޔޯކާ އިން ވިދާލި ދެކުނު ކޮރެއާގެ ލީ ކަންގް-އިންގްގެ އިތުރުން ސްޕޯޓިން ލިޒްބަން އިން ބަދަލުވި މެނުއަލް އުގާޓޭ އަދި އިންޓަ މިލާނަށް ކުޅުނު މިލާން ސްކްރިނިއޭ އެވެ.