މެސީ ގެނައުމަކީ ހުވަފެން ހަގީގަތަކަށްވުން: ބެކަމް

ފްލޮރިޑާ، އެމެރިކާ (ޖުލައި 16) - އެމެރިކާގެ އިންޓަ މަޔާމީ ފުޓްބޯޅަ ކްލަބުގެ މަސައްކަތް ފެށިއިރު، ކޮންމެވެސް ދުވަހަކުން ދުނިޔޭގެ އެންމެ މަގުބޫލު ކުޅުންތެރިން ގެނެވޭނެކަމަށް އުއްމީދުކުރި ކަމަށާއި، ލިއޮނެލް މެސީ އެޓީމަށް ލިބުމަކީ އެ ހުވަފެން ހަގީގަތަކަށް ވުން ކަމަށް އިންޓަ މަޔާމީގެ ކޯ އޯނަރު އަދި ކުރީގެ މަޝްހޫރު ފުޓްބޯޅަ ތަރި ޑޭވިޑް ބެކަމް ބުނެފި އެވެ.

އެމެރިކާގެ މޭޖަ ލީގު ސޮކާގައި ވާދަކުރަމުން އަންނަ މަޔާމީ އިން ވަނީ އިއްޔެ މެސީ އެ ކްލަބަށް ރަސްމީކޮށް ބަދަލުވިކަން ހާމަކޮށްފަ އެވެ. އެޓީމާ އެކު މެސީ ހުންނާނީ 2025 ވަނަ އަހަރުގެ ނިޔަލަށެވެ.

އިންޓަ މަޔާމީ އެމެރިކާ ފުޓްބޯޅައިގައި ވާދަކުރަން ފެށީ 2018 ވަނަ އަހަރު އެވެ. އެޓީމުގެ އޯނަރުންގެ ގޮތުގައި ބެކަމްއާ އެކު އިތުރު ދެ މީހުން ތިބެ އެވެ. ކްލަބުގެ ރައީސަކީ ބެކަމް އެވެ. މެސީގެ އެ ކްލަބަށް ރަސްމީކޮށް ގެނައުމަށް ފަހު ބެކަމް ވަނީ އެކަމާއި ގުޅޭގޮތުން ވާހަކަދައްކައިފަ އެވެ.

"މީގެ 10 އަހަރު ކުރިން މި ދަތުރު ފެށިއިރު އަހަރެން އުއްމީދުކުރިން ދުނިޔޭގެ މަޝްހޫރު ތަރިން މި ކްލަބަށް ގެންނަން. މެސީ ފެންވަރުގެ ކުޅުންތެރިޔަކާ އެކު މިއަދު އެ ހުވަފެން ހަގީގަތަކަށް ވެއްޖެ. މެސީ އަކީ ގާތް ރަހްމަތްތެރިއެއް. މެސީގެ އާއިލާ މި ސިޓީއާ ގުޅުމަކީ ވެސް ލިބުނު ބޮޑު އުފަލެއް" ކުރިން މެންޗެސްޓާ ޔުނައިޓެޑާއި ރެއާލް މެޑްރިޑްގައި މަޝްހޫރުކަން ހޯދި ބެކަމް ބުންޏެވެ.

މަޔާމީ އަށް ބަދަލުވުމަށް ފަހު މެސީ ބުނީ ކްލަބާ ގުޅިގެން މަސައްކަތްކޮށް ކްލަބަށް ކުރިއެރުން ހޯދައިދީ އާ ޖީލެއް ބިނާކުރަން މަސައްކަތްކޮށްދޭން ބޭނުންވާ ކަމަށެވެ.

މެސީ އާ ކްލަބުގެ ޖާޒީގައި ފުރަތަމަ ފެންނާނީ މި މަހުގެ 21 ވަނަ ދުވަހު ކުޅޭ މެޗުގަ އެވެ. އެ މެޗުގައި އިންޓަ މަޔާމީ ވާދަކުރާނީ ލީގާ އެމްއެކްސްއާ އެވެ.

ދުނިޔޭގެ މޮޅު ކުޅުންތެރިޔާގެ އެވޯޑް ހަތް ފަހަރު ހޯދާފައިވާ މެސީ ޔޫރަޕުން ބޭރު ލީގެއްގައި ކުޅޭ މިއީ ފުރަތަމަ ފަހަރެވެ. މެސީގެ ކެރިއަރުގެ ބޮޑުބައި ހޭދަކުރީ ބާސެލޯނާގަ އެވެ. އެ ކްލަބުގައި 21 އަހަރު ހޭދަކޮށް އެތައް ރެކޯޑެއް ގާއިމްކުރި އެވެ. އޭގެފަހުން މެސީ 2021 ވަނަ އަހަރު ބަދަލުވީ ޕީއެސްޖީ އަށެވެ. އެމެރިކާ ލީގަށް މެސީ ބަދަލުވީ ޕީއެސްޖީގައި ދެ އަހަރު ހޭދަކުރުމަށް ފަހު އެވެ.