އެމްއެލްއެސް ކަޕުން މެސީގެ އިންޓަ މަޔާމީ ކަޓައިފި

އެޓްލާންޓާ (ނޮވެމްބަރު 10) – އެޓްލާންޓާ ޔުނައިޓެޑް އަތުން ބަލިވެ، އެމްއެލްއެސް ކަޕުން، މަޝްހޫރު ލިއޮނެލް މެސީގެ އިންޓަ މަޔާމީ ކަޓައިފި އެވެ.

ރާއްޖޭގެ ގަޑިން މިއަދު ހެނދުނު ކުޅުނު މެޗުން މަޔާމީ ބަލިވީ 3-2 ންނެވެ. ފުރަތަމަ ލީޑް ނެގީ މަޔާމީންނެވެ. މަތިއަސް ނިކޮލަސް ރޯހަސްގެ ގޯލުން، މެޗުގެ 17 ވަނަ މިނެޓްގައި މަޔާމީން ލީޑް ނެގި އެވެ. އެކަމަކު ދެ މިނެޓް ފަހުން އެޓަލާންޓާގެ ސެނެގާލް ފޯވާޑް ޖަމާލް ތިއަރޭ އެ ޓީމަށް ނަތީޖާ ހަމަހަމަކޮށް ދިނެވެ. އެ ޓީމަށް ލީޑް ނަގައި ދިނީ ވެސް އޭނާ އެވެ.

ދެވަނަ ހާފުގައި މެސީ ވަނީ އެޓަލާންޓާ އަށް ނަތީޖާ ހަމަހަމަކޮށް ދީފަ އެވެ. އެއީ އެމްއެލްއެސް ކަޕްގެ ޕްލޭއޮފްގައި އޭނާ ޖެހި ފުރަތަމަ ލަނޑެވެ. އަގުބޮޑު ސްކޮޑެއް އޮތް މަޔާމީ އަކީ މެޗުގެ ފޭޗަރިޓް ޓީމު ކަމަށް ވިޔަސް ނަތީޖާ އެކަމެއް ނުފެނުނެވެ. އެޓްލާންޓާ މޮޅުކޮށް ދިން ލަނޑު ޖެހީ ބާޓޯޒް ސްލިޒް އެވެ.

އެމްއެލްއެސްގެ ރެގިއުލާ ސީޒަންގައި ނުވަތަ ލީގު ބުރުގައި އެންމެ ގިނަ ޕޮއިންޓް ހޯދައިގެ ސަޕޯޓާސް ޝީލްޑް ކާމިޔާބު ކުރި އެވެ.

ދާދި ފަހުން ފެބްރިޒިއޯ ރޮމާނޯ އަށް ދިން އިންޓަވިއުގައި މެސީ ބުނީ އެމްއެލްސް ކަޕްގެ ތަށި ކާމިޔާބު ކުރުމަކީ އޭނާގެ ހުވަފެނެއް ކަމަށެވެ. އެކަމަކު މިއަދު ކުރިމަތިވި ބައްޔާ އެކު އެ އުއްމީދު، މި ސީޒަނުގައި ދެން ހާސިލެއް ނުވާނެ އެވެ.

ޓީމު ކަޓައިގެން ދިއުމުން، މެޗު ނިމުމުން ދަނޑުމަތީގައި މެސީ މަޑެއް ނުކުރި އެވެ. އެޓްލާންޓާގެ ކުޅުންތެރިންނާ ސަލާން ވެސް ނުކޮށް އޭނާ ދިޔައީ ޗޭންޖިން ރޫމަށެވެ.