ތިން ކިލޯ އަށް ވުރެ ގިނަ ޑްރަގާ ހަވާލުވާން ދިޔަ މީހާ އުމުރަށް ޖަލަށް

ތުރުކީގެ މީހަކު ރާއްޖެ އެތެރެކުރި ތިން ކިލޯއަށް ވުރެ ގިނަ މަސްތުވާތަކެއްޗާ ހަވާލުވާން ދިޔަ މީހަކު އުމުރަށް ޖަލަށްލައި، އެއް ލައްކަ ރުފިޔާ އިން ޖޫރިމަނާ ކުރަން ކްރިމިނަލް ކޯޓުން ހުކުމްކޮށްފި އެވެ.

މޭ 2022 ގައި ރާއްޖެ އައި ތުރުކީ މީހެއްގެ ލަގެޖުން 3.9 ކިލޯގެ ކޮކެއިން ފެނުނެވެ. އެ ފޮށްޓާ ހަވާލުވާން ދާ މީހަކު ބެލުމަށް ކޮންޓްރޯލް ޑެލިވަރީ އޮޕަރޭޝަން ފުލުހުން ހިންގަނިކޮށް ހުޅުމާލޭ ގެސްޓް ހައުސްއަކުން އެ ފޮށްޓާ ހަވާލުވީ ދިވެއްސެކެވެ.

ކްރިމިނަލް ކޯޓުން އިއްޔެ ކުރި ހުކުމުގައިވަނީ އެ ފޮށްޓާ ހަވާލުވާން އޭނާ ގެސްޓް ހައުސް އަށް ދިޔައީ އެހެން މީހަކު ބުނެގެން ކަން އޭނާގެ މޮބައިލް ފޯނުގެ ތަހުލީލު ރިޕޯޓުން އެނގޭއިރު، މަސްތުވާތަކެއްޗާ ގުޅޭ ފޮޓޯ އާއި ވީޑިއޯ އެ ފޯނުން ފެނިފައިވާތީ އޭނާ އެ ފޮށްޓާ ހަވާލުވާން ދިޔައީ ޝައްކު އުފެދޭ ހާލަތެއްގައި ކަމަށް ބެލެވޭ ކަމަށެވެ. ގެސްޓް ހައުސް އަށް ދިޔަ ސަބަބާ ބެހޭގޮތުން ތަހުގީގުގައި އޭނާ އޮޅުވާލަން މަސައްކަތް ކޮށްފައިވާތީ އޭނާގެ ގޯސް ނިޔަތެއް އޮތްކަން ސާބިތުވާ ކަމަށް ހުކުމުގައި ވެ އެވެ.

ހުކުމުގައިވާ ގޮތުން އެފަދަ މައްސަލަތަކުގައި ދައުލަތުން ސާބިތުކޮށް ދޭން ޖެހޭނީ ތުހުމަތު ކުރެވޭ މީހާގެ އަތުގައި އެއްޗެއް ހުރި ކަން އެކަންޏެވެ. އަދި އޭގައި މަސްތުވާއެއްޗެއް ހުރިކަން އޭނާ އަށް އެނގޭކަން ދައުލަތުން ސާބިތުކޮށްދޭން ނުޖެހޭނެ ކަމަށް ސުޕްރީމް ކޯޓުން ނިންމާފައިވާ ކަމަށް ހުކުމުގައިވެ އެވެ.

ގާޒީ އިސްމާއިލް ޝަފީއު އިއްވެވި ހުކުމުގައިވަނީ އެ މީހާގެ މައްޗަށް މަސްތުވާތަކެތި ޓްރެފިކް ކުރުމުގެ ކުށް ސާބިތުވާތީ އުމުރަށް ޖަލަށްލުމާ އެކު، އެއް ލައްކަ ރުފިޔާއިން ޖޫރިމަނާ ކުރުމަށެވެ. އަދި ޖޫރިމަނާ ފައިސާ އެއް އަހަރު ތެރޭގައި ދައުލަތަށް ދައްކަން ވެސް ހުކުމުގައި އަންގާފައިވެ އެވެ.