ކުޅުދުއްފުށީ ހޮސްޕިޓަލްގައި އެޑްމިޓްކުރާ މީހުންނަށް ބޭސް ނަގައިދޭނީ އެތަނުން

ކުޅުދުއްފުށި ރީޖަނަލް ހޮސްޕިޓަލް (ކޭއާރްއެޗް) ގައި އެޑްމިޓްކުރާ ބަލި މީހުންނަށް އެ ހޮސްޕިޓަލުން ބޭސް ނަގައިދޭ ގޮތަށް ހަމަޖައްސައިދީފި އެވެ.

މީގެ ކުރިން އެ ހޮސްޕިޓަލުން ފަރުވާ ހޯދާ މީހުން ވެސް ބޭސް ހަމަކުރަން ޖެހެނީ ބޭސްފިހާރަތަކަށް ގޮސްގެން އަމިއްލައަށެވެ. އެއީ ޓްރީ ޓޮޕް ފިޔަވައި ރާއްޖޭގެ އެހެން ހުރިހާ ހޮސްޕިޓަލްތަކެއްގައި ވެސް އަމަލު ކުރަމުން އަންނަ ގޮތެވެ. ކުރިން އައިޖީއެމްއެޗުން އެ ހިދުމަތް ދިން ނަމަވެސް މިހާރު ވަނީ ހުއްޓާލައިފަ އެވެ.

ކުރިން ބަލި މީހާގެ ބޭސް ސިޓީއަށް އެ މީހުންގެ އެހީތެރިން ބޭސް ހަމަކުރާ ގޮތަށް އޮތަސް ބޭސް ސިޓީއަށް އެ ހޮސްޕިޓަލުން ކަނޑައަޅާފައިވާ އުސޫލެއްގެ ދަށުން ބޭސް ހަމަކޮށްދޭނީ ކުޅުދުއްފުށީގައި ހުންނަ ބޭސްފިހާރަތަކުން ކަމަށް ހޮސްޕިޓަލުން ބުންޏެވެ.

އެ ހިދުމަތަށް ފެށި ފަހުން ތިން ހަފްތާ ވެފައިވާއިރު، މިހާތަނަށް 600 އަށްވުރެ ގިނަ ބޭސް ސިޓީއަށް ބޭސް ހަމަކޮށްދީފައިވާ ކަމަށް ހޮސްޕިޓަލުން ބުންޏެވެ.

ހޮސްޕިޓަލުން ބުނީ މިއީ އެކި ބޭސްފިހާރަތަކަށް ހިނގައިގެން ބޭސް ހޯދަން، ބަލި މީހުންގެ އެހީތެރިން އުފުލަންޖެހޭ ބުރަ ކުޑަކޮށްދޭން ފެށި ހިދުމަތެއް ކަމަށެވެ.

"އަލަށް ފެށިގެން އެ ދިޔަ ހިދުމަތުގެ ސަބަބުން ބަލިމީހުންގެ އެހީތެރިންގެ ގޮތުގައި ހަރަކާތްތެރިވާ މީހުން 600 ފަހަރެއްގެ މަތިން އެކި ބޭސްފިހާރަތަކަށް ގޮސް ބޭސްހަމަކުރަންޖެހޭ ޖެހުން ނިމުމަކަށް ގެނެވި، އެ ފަރާތްތަކުން މީގެކުރިން އުފުލަމުންދިޔަ ތަކުލީފަށް ނިމުން އައިސްފައި،" ކޭއާރްއެޗުން ބުންޏެވެ.

އެ ހޮސްޕިޓަލުން ބުނީ ސްޓޮކަށް މަދުވާ ބޭސް ހަމަކުރުމުގެ ނިޒާމު ވެސް މި ހިދުމަތުގެ ސަބަބުން އިތުރަށް ހަރުދަނާވާނެ ކަމަށެވެ.

ހޮސްޕިޓަލުގެ ވޯޑުތަކުގައި މަސައްކަތްކުރާ ނަރުހުން، އެޑްމިޓްކޮށްފައިވާ ބަލި މީހާގެ ބޭސް ސިޓީ ކަނޑައެޅިފައިވާ ގޮތެއްގެ މަތިން ބޭސްފިހާރަތަކާ ހިއްސާކުރުމުން، އެ ދުވަހަކަށް ކަނޑައެޅިފައިވާ ބޭސްފިހާރައަކުން ބޭސް ހަމަކޮށްދީގެން ނަރުހުންގެ ޖަގަހަތަކަށް ގެނެސްދޭނެ އެވެ.

އެކަމަކު އާސަންދައިން ނުލިބޭ ބޭހެއް ނަމަ ބޭސް ސިޓީ އަށް ބޭސް ނަގަން ޖެހެނީ އަމިއްލައަށެވެ.

ކޭއާރްއެޗް އަކީ ރާއްޖޭގެ އެންމެ އުތުރުގެ ތިން އަތޮޅުގެ 41 ރަށަކުން 72،000 އަށް ވުރެ ގިނަ މީހުން ހިދުމަތް ހޯދާ ތަނެކެވެ.

މިދިޔަ އަހަރުގެ ތަފާސްހިސާބުތަކުން ދައްކާ ގޮތުން، އެ ހޮސްޕިޓަލަށް މަހެއްގެ މައްޗަށް ގާތްގަނޑަކަށް 10،000 މީހުން އޯޕީޑީ އިން ޑަކްޓަރަށް ދައްކަ އެވެ. އަދި ގިނަ އަދަދެއްގެ މީހުން އެޑްމިޓްކޮށްގެން ވެސް ފަރުވާ ދެ އެވެ. މިދިޔަ އަހަރު 2،323 މީހަކަށް އެ ހޮސްޕިޓަލުގައި އެޑްމިޓްކޮށްގެން ފަރުވާދީފައިވެ އެވެ.