ސޮނީ ފިޝިން ރީލޮކޭޓުކޮށްފި، އާ ފިހާރައިން ފުރަތަމަ މަހު ޑިސްކައުންޓް

ބޮޑުތަކުރުފާނު މަގުގައި ހުރި ސޮނީ ފިޝިން ހަމަ އެ މަގުގައި ހުންނަ ސޮނީ ހޯލްސޭލް ފިހާރައިގެ ފުރަތަމަ ފްލޯއަށް ރީލޮކޭޓުކޮށް ހުޅުވައިފި އެވެ.

މިއީ ސޮނީ ފިޝިންއިން އެކި ފިހާރަތަކުގައި ވިއްކަމުން ދިޔަ މަސްވެރިކަމާ ގުޅޭ ހުރިހާ ބްރޭންޑެއްގެ ޕްރޮޑަކްޓުތައް އެއްތަނަކުން ވިއްކުމުގެ ގޮތުން ހުޅުވި ފިހާރައެކެވެ. މި ފިހާރައިން ކޮމާޝަލް އަދި ސްޕޯޓްސް ފިޝިންއަށް ބޭނުންވާ ހުރިހާ ޕްރޮޑަކްޓެއް ލިބޭނެ އެވެ.

ސޮނީ ފިޝިންގެ ރީޓެއިލް މެނޭޖަރު މުހައްމަދު ހަމްދޫން ވިދާޅުވީ ސޮނީ ފިޝިން ރީލޮކޭޓުކުރީ ކުރިން ހިންގަމުން ދިޔަ ފިހާރައިގެ ހުރި ޖާގައިގެ ދަތިކަމުގެ ސަބަބުން ކަމަށެވެ. އަދި އެ ތަނުން ވިއްކާ ޕްރޮޑަކްޓުތައް އިތުރުކުރުމަކީ ވެސް މަގްސަދެއް ކަމަށް ވިދާޅުވި އެވެ.

"އަޅުގަނޑުމެން އަލަށް އިތުރު ޕްރޮޑަކްޓުތަކެއް ވަރަށް އަވަހަށް ގެންނާނަން. އަދި އާ ހިދުމަތްތަކެއް ވެސް ފަށާނަން. އަޅުގަނޑުމެން މިއަދު ޝިމާނޯ ރީލް ސާވިސްކޮށް ދިނުމުގެ ހިދުމަތް ވާނީ ފަށާފަ. މި ހިދުމަތް މި ތަނަށް އައިސް މިއަދުން ފެށިގެން ހޯދޭނެ." ހަމްދޫން ވިދާޅުވި އެވެ.

ސޮނީ ފިޝިން ރީލޮކޭޓުކޮށް އާ ފިހާރަ ހުޅުވުމާ ގުޅިގެން އެއްމަސް ދުވަހުގެ ޕްރޮމޯޝަނެއް ވެސް ވަނީ ފަށައިފަ އެވެ.

"މިއަދު އަޅުގަނޑުމެން މި ފެށި ޕްރޮމޯޝަނުގައި 3000 އެއްހާ އައިޓަމުން 50 ޕަސެންޓާ ހަމައަށް ޑިސްކައުންޓު ލިބޭނެ،" ހަމްދޫން ވިދާޅުވި އެވެ.

ސޮނީ ފިޝިންއިން ޝިމާނޯ، ރަޕަލާ، އެޓޯލް ވިލިއަމްސަން، ޔަމަގާ ބްލޭންކްސް އަދި ރިޕްލް ފިޝާ ފަދަ އެކި ބްރޭންޑުތަކުގެ މަސްވެރިކަމާ ގުޅޭ ތަކެތި އަންނަނީ ވިއްކަމުންނެވެ. މި ފިހާރައިން އެކި ވައްތަރުގެ ދޮށި، ކަންވާރު، ބުޅި އަދި މަސްވެރިންނަށް ބޭނުންވާ ޕަމްޕާއި ވާ ވެސް އެ ތަނުން ލިބޭނެ އެވެ.

ސޮނީ ފިޝިން ހުޅުވާފައި ހުންނާނީ ހެނދުނު 9 އިން 12 އަށެވެ. އަދި މެންދުރު 1:30 އިން 6 އަށެވެ. ރޭގަނޑު ހުޅުވާނީ 8 އިން 10 އަށެވެ.