"ފުވައްމުލަކަށް ޔާމީންގެ ތަރައްގީ އިޔާދަކޮށްދޭނީ މުއިއްޒު"

"މިއޮތީ މި ސަފު ކޮޅު ފެންނަން ނެތް. މިއީ އެއްވެސް މަޖުުބޫރު ކަމެއް ނެތި ހިތުގެ އަޑިން ސަޕޯޓްކުރާތީ ނުކުމެ ތިބިހާ މީހުން،" އިދިކޮޅު ޕީއެންސީ/ޕީޕީއެމްގެ ރިޔާސީ ކެންޑިޑޭޓަށް ފުވައްމުލަކުން އޮތް ތާއިދު ސިފަކޮށްދޭން ޒުވާނަކު ދައްކާލީ މި މަންޒަރެވެ.

މިއަދު ހަވީރު 5:10 ހާއިރު މި ސިޓީގެ އެއާޕޯޓަށް ފްލައިޓް ޖެއްސެއިރު އެ ސަރަހައްދަށް ގިނަ އަދަދެއްގެ މީހުން އެއްވެ ތިއްބެވެ. މުއިއްޒަށް މަރުހަބާ ދެންނެވުމަށް ދިގު ސަފެއް ދަމާލާފައި އޮތްއިރު، ޕީޕީއެމްގެ ފިޔާތޮށި ކުލައިގެ ދިދަތަކާ އެކު ވަރަށް ގިނަ ބަޔަކު ފޯރިނަގަމުން ދިޔަ އެވެ.

އެ އެންމެންނާ ސަލާމްކުރުމަށް ގާތްގަނޑަށް 45 ވަރަކަށް މިނެޓް މުއިއްޒު ހޭދަކުރައްވަން ޖެހުނުއިރު، މިއީ މި ސިޓީގައި މިގޮތަށް ދަމާލި އެންމެ ދިގު ސަފު ކަމަށް ވެސް ބައެއް މީހުން ބުނެ އެވެ.

އެތައް ސަތޭކަ ބަޔަކު މި ސަފުގައި ތިބިއިރު އޭގެ ތެރެެއިން ވަރަށް އުފަލުން ހުރި އަބްދުﷲ އަހުމަދު ބުނި ގޮތުގައި ފުވައްމުލަކަށް ކަމެއް ވިއްޔާ ވެފައިވަނީ ކުރީގެ ރައީސް އަބްދުﷲ ޔާމީންގެ ވެރިކަމުގައި އެވެ. މިއޮތް ބޮޑު ރަށުގައި ފެނާއި ނަރުދަމާ ގާއިމްކޮށް، ހުރިހާ ގެއަކަށް ގުޅައި، މަގުތަކުގައި ތާރުއަޅަން ފެށުމަކީ އާދައިގެ ކަމެއް ނޫން ކަމަށް އޭނާ ފާހަގަކުރި އެވެ.

ފުވައްމުލަކުގެ ބޮޑެތި ހުރިހާ މަގެއްގައި މި ސަރުކާރުން ވަނީ ތާރުއަޅާ ނިންމާފަ އެވެ. އެކަމަކު އަބްދުﷲ އަހުމަދު ގަބޫލުކުރާ ގޮތުގައި، މި ސަރުކާރަށް އެ މަޝްރޫއު އެހާ ފަސޭހަކަމާ އެކު ކުރިއަށް ގޮސް ނިންމާލެވުނީ ޔާމީންގެ ވެރިކަމުގައި އެކަމަށް ބޭނުންވާ ތަކެތި ފުވައްމުލަކަށް ގެނެސްފައި ހުރުމުންނެވެ. އެ މަޝްރޫއު ފަށާފައި އޮތުމުންނެވެ.

ހަމައެގޮތަށް ބަނދަރުގެ މަޝްރޫއު ވެސް އޭނާ ފާހަގަކުރީ ޔާމީންގެ މަޝްރޫއުއެއްގެ ގޮތުގައި އެވެ.

"މި ރަށަށް މި ސަރުކާރުން ވެފައިވާ އެއްވެސް ވައުދެއް ނުފެއްދޭ. އެކަމަކު މުއިއްޒުގެ ސަރުކާރެއްގައި އަނެއްކާވެސް މަޝްރޫއުތައް ހިނގައިގަންނާނެ ކަމަށް އުއްމީދު ވަރަށް ބޮޑަށް ކުރަން،" އޭނާ ބުންޏެވެ.

މިއީ ހަމައެކަނި އަބްދުﷲގެ ވިސްނުމެއް ނޫނެވެ. ފިޔާތޮށި ގަމީހެއް ލައިގެން ޕީޕީއެމް ދިދައެއް ހިފައިގެން ހުރި މުހައްމަދު އަލީ، 67 ވެސް ބުނި ގޮތުގައި މުއިއްޒަށް ވެރިކަން ލިބިއްޖެނަމަ ޔާމީން ގެނައި ތަރައްގީ މި ސިޓީއަށް އަލުން ލިބޭނެ އެވެ.

"މުއިއްޒު ވަރުގެ އިހްލާސްތެރި ކަމަށް ގާބިލް މީހަކު ނެތް ދެން ކުރިމަތިލާފައި. އެހެންވެ މިތަނަށް އައިސް މިހުރީ،" މުހައްމަދު އަލީ ބުންޏެވެ.

އުމުރުން 70 އިން މަތީގެ އިސްމާއިލް ފިކުރީބެ ވެސް ޖޯޝާ ފޯރީގައި ބުނީ "މުއިއްޒު ވަރުގެ މީހެއް ނެތް ކަމާއި އޭނާ ރަނގަޅުވާނެ،" ކަމަށެވެ.

ޕީޕީއެމްގެ ބޮޑު ސަޕޯޓެއް އޮންނަ ފުވައްމުލަކުން 2018 ވަނަ އަހަރުގެ ރިޔާސީ އިންތިހާބުގައި ކުރި ހޯދީ އެމްޑީޕީންނެވެ. ޔާމީނަށް 2900 ވޯޓު ލިބުނުއިރު އިބްރާހިމް މުހައްމަދު ސޯލިހަށް 3800 ވޯޓު ލިބުނެވެ. އޭގެ ފަހުން މަޖިލިސް އިންތިހާބުގައި ވެސް އެމްޑީޕީ ކުރި ހޯދި އެވެ.

އެކަމަކު، މިފަހަރު އެ މަންޒަރު ބަދަލުވާނެ ކަމަށް ޕީޕީއެމަށް ސަޕޯޓްކުރާ މި ސިޓީގެ މީހުން ބުނެ އެވެ.