ރޯގާގެ ކޭސްތައް 22،000 އިން މަތީގައި، ސަމާލުވާން އެދެފި

ހަލުއިކަމާ އެކު އަރިދަފުސް ރޯގާ ފެތުރެމުންދާތީ ސަމާލުވާން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އިލްތިމާސްކޮށްފި އެވެ.

އެޗްޕީއޭ އިން ބުނީ އަރިދަފުސް ރޯގާ ޖެހިގެން ޑޮކްޓަރަށް ދައްކާ މީހުންގެ އަދަދު އިތުރު ވަމުންދާ ކަމަށެވެ.

"މިހާރު" އާ ހިއްސާކުރި ތަފާސްހިސާބަށް ބަލާއިރު، މިދިޔަ މަހު ރޯގާގެ 22،575 ކޭސް ރިޕޯޓްކޮށްފައިވެ އެވެ.

މިދިޔަ މަހުގެ ތަފާސް ހިސާބު:

- އޮގަސްޓް 6-12 އަށް: 6،311 ކޭސް

- އޮގަސްޓު 13-19އަށް: 7،919 ކޭސް

- އޮގަސްޓު 20-26އަށް: 8،346 ކޭސް

މީގެ ދޮޅު މަސް ކުރިން މާލޭގައި ވަނީ ހޮޑުލުމާއި ބޭރަށް ހިންގުމުގެ ރޯގާއެއް ވެސް ފެތުރިފަ އެވެ. އެޗްޕީއޭން ބުނީ އޭރު ފެތުރުނު ހޮޑުލުމާއި ބޭރަށް ހިންގުމަކީ ވަރަށް ފަސޭހައިން، ހަލުވިކަމާ އެކު ފެތުރޭ ނޯރޯވައިރަސްގެ ރޯގާއެއްކަމަށެވެ.

ރޯގާގެ އެއްވެސް އަލާމާތެއް ހުރި ނަމަ ވީހާވެސް އަވަހަކަށް ޓެސްޓްކުރުމަށާއި ބަލީގެ އަލާމާތް ހުރި ނަމަ އަނގަ އާއި ނޭފަތް ނިވާވާ ގޮތަށް މާސްކް އެޅުމަށާއި ރޯގާ ޖެހިފައި ހުރެގެން ކުޑަކުދިންނާ ގައިގޯޅި ނުވުމަށް އެޗްޕީއޭގެ އިލްތިމާސްގައިވެ އެވެ. މި ކަންކަމުގެ އިތުރުން ބަލިވުމުން ނުރައްކާވެދާނެ މީހުން އިންފްލުއެންޒާ ވެކްސިން ޖެހުމަށް ވެސް ވަނީ އިލްތިމާސްކޮށްފަ އެވެ.