ބަޖެޓް ކުރިޔަސް ފުލުހުންގެ މުސާރަ ބޮޑު ކުރެވޭނީ ރިވިއު އަށް ފަހު: ފިނޭންސް

ބަޖެޓުކޮށްފައި އޮތަސް ފުލުހުންގެ މުސާރަ އާއި އެލަވެންސްތަކަށް އެއްވެސް ބަދަލެއް ގެނެވޭނީ ކަމާ ބެހޭ ފަރާތްތަކުން ރިވިއު ކުރުމަށް ފަހު ކަމަށް ފިނޭންސް މިނިސްޓްރީން މިއަދު ބުނެފި އެވެ.

ފުލުހުން ވަނީ މުސާރައިގެ އާ އޮނިގަނޑެއް އެކުލަވާލައި ހުރިހާ ފުލުހުންނަށް 4،000 ރުފިޔާގެ ލިވިން އެލަވެންސެއް ދޭން ހުށަހަޅައިފަ އެވެ. އެކަމަކު، މިދިޔަ މަހުގެ މުސާރަ އެ އޮނިގަނޑުގެ ދަށުން ހެދުމަށް ފަހު ފިނޭންސަށް ހުށަހެޅުމުން އަނބުރާ ފޮނުވާލައި ކުރީގެ އޮނިގަނޑުގެ ދަށުން އެންމެ ފަހުން މިއަދު ވަނީ މުސާރަ ދީފަ އެވެ.

ފުލުހުންގެ މުސާރަ އަށް ބަދަލު ގެނައުމާ މެދު ރައީސް އޮފީހާ މަޝްވަރާ ކުރަމުން އަންނަ ކަމަށް ފިނޭންސުން ފުލުހުންނަށް އަންގާފައިވާ ކަމަށް ވެ އެވެ.

މިކަމާ ގުޅޭ ގޮތުން ފުރަތަަމަ ފަހަރަށް ވާހަކަދައްކަވަމުން، ފިނޭންސް މިނިސްޓަރު އަހުމަދު މުުނައްވަރު މިއަދު ނޫސްވެރިންނަށް ވިދާޅުވީ ފުލުހުންގެ މުސާރަ އަށް ބަދަލު ގެނައުމަށް ފަހު އެ ބަދަލުތައް ހިމަނާފައިވާ "ހުށަހެޅުމެއް" ލިބިފައިވާ ކަމަށެވެ. އެކަމަކު، އެ ހުށަހެޅުމަށް އަމަލު ކުރެވޭނީ ރައީސް އޮފީހާއި ކަމާ ބެހޭ ފަރާތްތަކުން ރިވިއު ކުރުމަށް ފަހު ނިންމާ ގޮތެއްގެ މަތިން ކަމަށް އޭނާ ވިދާޅުވި އެވެ.

އެއީ، މިނިސްޓަރު ވިދާޅުވި ގޮތުގައި، ދައުލަތުގެ ހުރިހާ މުއައްސަސާއެއްގެ ވެސް މުސާރަ އާއި އިނާޔަތްތަކަށް ބަދަލު ގެނައުމުގައި ގެންގުޅޭ އާއްމު އުސޫލެވެ. އެ ގޮތުން، އެކަމާ ބެހޭ ސާކިއުލާއެއް ވެސް ފިނޭންސުން ކުރިން ނެރެފައިވާނެކަން އޭނާ ފާހަގަކުރެއްވި އެވެ.

"އަޅުގަނޑު އުއްމީދު މި ކުރަނީ އެ ގޮތަށް ކަމަށް ވާނީ. އެކަމަކު، ތިކަމުގައި އަޅުގަނޑަށް އެއްޗެއް ދެންނެވޭނީ އަޅުގަނޑު މި ދަންނަވާ ރިވިއު ނިމުނީމަ،" ރިވިއު އަށް ފަހު، ފުލުހުންގެ މުސާރައިގެ އާ އޮނިގަނޑަށް އަމަލު ކުރާނެތޯ ދެންނެވުމުން މިނިސްޓަރު ވިދާޅުވި އެވެ.

ފުލުހުންގެ މުސާރަ ބޮޑު ކުރަން މި އަހަރު ބަޖެޓް ކޮށްފައި ވިޔަސް އިތުރަށް ރިވިއު ކުރަން ޖެހޭތޯ "މިހާރު"ން ދެންނެވުމުން، މުނައްވަރު ވިދާޅުވީ ބަޖެޓުގައި ހިމަނާ ކަންކަން ވެސް ތަންފީޒު ކުރެވޭނީ އޮންނަ އުސޫލުގެ ދަށުން ފުރިހަމަ ކުރަން ޖެހޭ ކަންކަން ކުރުމަށް ފަހު ކަމަށެވެ. މުއައްސަސާއެއްގެ މުސާރަ އާއި އިނާޔަތްތަކަށް ބަދަލު ގެންނަ ނަމަ ރައީސް އޮފީހުން ރިވިއު ކުރަން ހަމަޖައްސާފައި ވާއިރު، ބަޖެޓުގައި މުސާރަ ބޮޑުކުރަން ހިމެނިޔަސް އެކަން ކުރެވޭނީ އެ ރިވިއު އަށް ފަހު ކަމަށް އޭނާ ވިދާޅުވި އެވެ.

ރައްޔިތުންގެ މަޖިލީހުން މި އަހަރުގެ ބަޖެޓް ފާސްކުރި އިރު ފުލުހުންނަށް ވަނީ މިދިޔަ އަހަރަށް ވުރެ ވަރަށް ބޮޑު ތަން އިތުރު ބަޖެޓެއް ދީފަ އެވެ. އެ ގޮތުން، މިދިޔަ އަހަރަށް ވުރެ 230 މިލިއަން ރުފިޔާ އިތުރެވެ. މިދިޔަ އަހަރުގެ ބަޖެޓަކީ 1.103 ބިލިއަން ރުފިޔާ އެވެ. މި އަހަރު ދީފައި ވަނީ 1.334 ބިލިއަން ރުފިޔާ އެވެ. ފުލުހުން ބުނެފައިވާ ގޮތުގައި މުސާރަ އިން ބޮޑުވި ބައި މި އަަހަރުގެ ބަޖެޓުގައި ހިމަނާފައި ވާނެ އެވެ.

ފުލުހުންގެ އެލަވަންސްތައް ބޮޑުކުރި މައްސަލައިގައި ސިފައިންގެ ތެރޭގައި ހިތްހަމަނުޖެހުންތަކެއް އުޅޭ ކަމުގެ އަޑުތަކެއް ވަނީ ފެތުރިފަ އެވެ. ބޮޑުކުރި އެލަވަންސްތަކާ އެކު ފުލުހުންގެ މުސާރަ އެމްއެންޑީއެފްގައި މަސައްކަތް ކުރާ މުވައްޒަފުންގެ މުސާރަ އަށް ވުރެ ބޮޑު ކަމަށް ވެ އެވެ.

އެކަމާ ގުޅޭ ގޮތުން ފިނޭންސް މިނިސްޓްރީން މިއަދު ސީދާ ވަކި އެއްޗެކޭ ނުބުނެ އެވެ. އެކަމަކު، މިނިސްޓަރު މުނައްވަރާ އެކު މިއަދުގެ ނޫސްވެރިންގެ ބައްދަލުވުމުގައި ބައިވެރިވެވަޑައިގެންނެވި އޭނާގެ ނައިބު ހުސެން ޝާމް އާދަމް ވިދާޅުވީ ދައުލަތުގެ ކޮންމެ މުއައްސަސާއެއްގެ މުސާރައިގެ އޮނިގަނޑު ހަދާއިރު ވެސް އެ ފަދަ މަސައްކަތެއް ކުރާ އެހެން ތަންތަނުގެ މުސާރަ އާއި އެލަވެންސްތަކަށް ބަލާނެ ކަމަށެވެ.

"އެހެންވީމަ، އެ ހުރިހާ ކަމަކަށް ރިއާޔަތް ކުރެވިގެން [ފުލުހުންގެ މުސާރައިގެ ރިވިއު ވެސް] ނިމޭނީ،" އޭނާ ވިދާޅުވި އެވެ.

ފުލުހުން ހުށަހަޅާފައިވާ ބަދަލާ އެކު ކޮންމެ ފުލުހަކަށް ވެސް ލިވިން އެލަވަންސް ލިބޭނެ އެވެ. މި އެލެވަންސް ކުރިން ދެމުން އައީ މާލޭގައި ކުއްޔަށް އުޅޭ ފުލުހުން އަމިއްލައަށް ހުށަހެޅުމުން އެ މީހެއްގެ ހާލަތަށް ބެލުމަށް ފަހު އެވެ. އެ ގޮތުން، ލިވިން އެލަވަންސަށް 2،500 ރުފިޔާ ލިބެ އެވެ. އެކަމަކު، އާ އޮނިގަނޑުގެ ދަށުން ކޮންމެ ފުލުހަކަށް ވެސް ލިވިން އެލަވަންސް ގޮތުގައި 4،000ރ ލިބޭނެ އެވެ.

އެހެންވެ، އެންމެ އާދައިގެ ފުލުހެއްގެ މުސާރަ އަށް ވެސް ގާތްގަނޑަކަށް 4،000 އެއްހާ ރުފިޔާ އިތުރުވާނެ އެވެ.