ފަޒްނާ ދެއްވީ ފުރައްސާރަ ކުރިޔަސް ފަހަތަށް ޖެހިވަޑައިނުގަންނަވާނެ ކަމުގެ ޔަގީންކަން

ފިރިކަލުން އަދި އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހަށް ކެމްޕެއިން ކުރައްވަން ހިޔާ ފްލެޓް ސަރަހައްދަށް މިއަދު ހަވީރު ވަޑައިގަތުމުން އިދިކޮޅު ބައެއްގެ ފުރައްސާރަ އާއި ގޯނާއާ ކުރިމަތިލައްވަން ޖެހުނަސް ފަހަތަށް ޖެހިވަޑައިނުގަންނަވާނެ ކަމުގެ ޔަގީންކަން ފަސްޓް ލޭޑީ ފަޒްނާ އަހުމަދު މިރޭ ދެއްވައިފި އެވެ.

އެކަމަނާ އެ ޔަގީންކަން ދެއްވީ ހުޅުމާލެ 2 ގައި ކުރީގެ ރައީސް އަބްދުﷲ ޔާމީންގެ ވެރިކަމުގައި އިމާރާތްކުރި ހިޔާ ފްލެޓް ސަރަހައްދުގައި ކެމްޕެއިން ކުރެއްވުމަށް ފަހު ކުރެއްވި ފޭސްބުކް ޕޯސްޓެއްގަ އެވެ.

ހިޔާ ފްލެޓް ސަރަހައްދަށް ފަޒްނާ ވަޑައިގަތުމުން އިދިކޮޅު މީހުން ނުކުމެ ވަނީ ވަރަށް ހުތުރު ބަހުން އެކަމަނާއާ މުހާތަބުކޮށް، އަޑުގަދަކޮށްފަ އެވެ. އަދި ބައެއް މީހުން ހަޅޭއްލަވަމުން ފަހަތުން ވެސް ދިޔަ އެވެ.

ފަޒްނާ ވިދާޅުވީ، އެކަމަނާގެ ފަހަތްޕުޅުން ފުރައްސާރަ ކުރަމުން ހިނގީ އިދިކޮޅު ހަރަކާތުގެ ދެ ފިރިހެނަކު ކަން އެނގިވޑައިގަންނަވާ ކަމަށާއި އެ ދެ މީހުން އެހެން ނޫޅުނު ނަމަ ހިޔާ ފްލެޓް ސަރަހައްދަށް ވަޑައިގެންނެވިކަން ވެސް ބަޔަކަށް ނޭނގޭނެ ކަމަށެވެ.

"މި ހުތުރު އަމަލުގެ ސަބަބުން އަޅުގަނޑަށް ވީ ފައިދާ އެވެ. މީހުން އައިސް ސަލާންކޮށް ގައިގައި ފިރުމައި އަޅުގަނޑާ އެކު ފޮޓޯ ނަގަން އެދުނީ އެވެ. ނުވިތާކަށް އަޅުގަނޑު ދާން ޝެޑިއުލް ކޮށްފައި ނުވާ ފްލެޓްތަކުން ވެސް ދައުވަތު ލިބުނީ އެވެ،" އެހެން ދާއިރާތަކުގައި ދޮރުންދޮރަށް ހިންގެވުން ނިމުމުން އެ ފްލެޓްތަކަށް ވަޑައިގަންނަވާނެ ކަމަށް ވިދާޅުވެ، ފަޒްނާ ލިޔުއްވާފައި ވެ އެވެ.

ފަޒްނާ ވިދާޅުވީ، ޝެޑިއުލް ކުރައްވާފައި ނެތް ފްލެޓްތަކަށް މިއަދު ވަޑައިނުގެންނެވުނީ މަޣްރިބު ނަމާދު ވަގުތު ޖެހުމާއި އިރުއޮއްސި 6:30 އަށް ބައްދަލުވުމެއް ރާވާފައި އޮތުމުން ކަމަށެވެ.

ފަސްޓް ލޭޑީގެ ލިޔުއްވުމުގައި ވަނީ އެކަމަނާ އަށް ފުރައްސާރަކުރަމުން ހިނގި ދެ ފިރިހެނުންނަކީ އިދިކޮޅަށް ނިސްބަތްވާ މީހުންކަން އެނގޭ ހެއްކަކީ ހުޅުމާލެ ދާއިރާގެ މެމްބަރު އިބްރާހިމް ޝުޖާއުގެ ފަރާތުން ލިބުނު ޖަވާބެވެ. ވިދާޅުވީ، އެކަމަނާގެ އަރިހުގައި ހުންނެވި ހުޅުމާލެ ދާއިރާގެ މަޖިލިސް މެމްބަރު އަލީ ނިޔާޒް، ޝުޖާއު އަށް އެ ވަގުތު ގުޅުއްވި ކަމަށެވެ.

ޝުޖާއު ހުންނެވީ ރާއްޖެ އިން ބޭރުގައި ކަމަށާއި "މި ބަލަނީ އޭ" ނިޔާޒްގެ އަރިހުގައި ޝުޖާއު ވިދާޅުވި ކަމަށް ފަޒްނާގެ ލިޔުއްވުމުގައި ވެ އެވެ. ޝުޖާއުގެ އިތުރުން ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒަށް ވެސް ނިޔާޒް ގުޅުއްވައި، މެސެޖް ކުރެއްވި ކަމަށް ފަސްޓް ލޭޑީ ވިދާޅުވި އެވެ. އެކަމަކު، ފަޒްނާ ވިދާޅުވި ގޮތުގައި މުއިއްޒު ފޯނެއް ނުނަންގަވަ އެވެ.

"އަދި އަދަށް ވެސް ޖަވާބެއް ނުދެ އެވެ،" ފަޒްނާ ވިދާޅުވި އެވެ.

ފަސްޓް ލޭޑީ ވިދާޅުވީ، އާންމުން ނުކުމެ އެކަމަނާ އަށް "ބާގީ" އަށް ގޮވަނީ ކަމަށް ބުނެ، އިދިކޮޅުން އެކަމުން ރެެކެން އުޅުމަކީ ފިނޑި އަމަލެއް ކަމަށެވެ.

"އާންމުން ނުކުމެ އަޅުގަނޑަށް ފުރައްސާރައެއް ނުކުރާނެ އެވެ. އަޅުގަނޑު މަގުމައްޗަށް ނުކުތީ އަލަކަށް ނޫނެވެ،" ފަޒްނާ ވިދާޅުވި އެވެ.

ފަސްޓް ލޭޑީ ވިދާޅުވި ގޮތުގައި މި ފުރައްސާރަ އަށް އެކަނާ ޖެހިލުން ނުވިޔަސް އެއީ ސީރިއަސް މައްސަލަ އެކެވެ. ހާލު ބައްލަވަން މެސެޖު ފޮނުވާ މީހުންނަށް ޝުކުރު އަދާކުރައްވަމުން ފަޒްނާ ވިދާޅުވީ، ރައީސް އިބްރާހިމް މުހައްމަދު ސޯލިހަށް ކެމްޕެއިން ކުރެއްވުމުގައި ސާބިތުވެ ހުންނަވާނެ ކަމުގެ ޔަގީންކަން ދެއްވާ ކަމަށެވެ.

"މާތް ﷲ ގެ ތަނަވަސް ރަހުމަތްފުޅާއި އިރާދަފުޅުން އަޅުގަނޑުމެންގެ ކެންޑިޑޭޓް އިބްރާހިމް މުހައްމަދު ސޯލިހަށް މި އިންތިހާބު ކާމިޔާބުވާނެ އެވެ،" ފަޒްނާގެ ޕޯސްޓްގައި ވެ އެވެ.

ފަސްޓް ލޭޑީ ވަނީ މި މަހުގެ 30 ގައި ބާއްވާ ރިޔާސީ އިންތިހާބުގެ ދެ ވަނަ ބުރުގައި ވާދަކުރައްވާ ރައީސް އިބްރާހިމް މުހައްމަދު ސޯލިހުގެ ކެމްޕެއިނަށް ދޮރުންދޮރަށް ކެމްޕެއިން ހަރަކާތެއް އިއްޔެ ފައްޓަވައިފަ އެވެ. އިއްޔެ ކެމްޕެއިން ކުރެއްވީ ވިލިމާލޭގަ އެވެ.