އިޒުރޭލަށް ސަޕޯޓްކޮށް ކައިލީ ކުރި ޕޯސްޓަކާ ހެދި މިލިއަނެއްހާ ފޮލޮވާސް ގެއްލިއްޖެ

ކައިލީ ޖެނާ އިޒުރޭލަށް ސަޕޯޓްކޮށް އިންސްޓަގްރާމް ކުރި ޕޯސްޓަކާ ހެދި، އެއް ދުވަސް ތެރޭގައި މިލިއަނެއްހާ ފޮލޮވާސް އޭނާއަށް ގެއްލިއްޖެ އެވެ.

ކައިލީ މިދިޔަ ހޯމަ ދުވަހު އޭނާގެ އިންސްޓަގްރާމް ސްޓޯރީގައި ޝެއާކުރި ޕޯސްޓެއްގައި އިނީ އިޒުރޭލުގެ ދިދައިގެ ފޮޓޯއެކެވެ. އަދި އެ ފޮޓޯގައި "އައި ސްޓޭންޑް ވިތު އިޒުރޭލު" ލިޔެފައިވެ އެވެ.

ހަމާސް އިން އިޒްރޭލަށް މިދިޔަ ހޮނިހިރު ދުވަހު ދިން ކުއްލި ހަމަލާތަކާ ގުޅިގެން އެ ސަރަހައްދުގެ ހާލަތު ވަނީ ވަރަށް ބޮޑަށް ނުރައްކާވެފަ އެވެ. އެ ހަމަލާތަކުގައި ގިނަ ބަޔަކު މަރުވަމުން ދާއިރު، އެމެރިކާގެ ބައެއް ސެލެބްރިޓީން ވަނީ އެ މީހުން އިޒުރޭލަށް ސަޕޯޓްކުރާ ކަން އަންގައިފަ އެވެ. އޭގެ ތެރޭގައި ކައިލީ ވެސް ހިމެނެ އެވެ.

ކައިލީ އެ ޕޯސްޓް ކުރިތާ މާ ގިނައިރުތަކެއް ނުވެ ޑިލިޓް ވެސް ކޮށްފި އެވެ. އޭނާ ޕޯސްޓު ޑިލިޓްކޮށްލީ ގިނަ ބައެއްގެ ފާޑުކިޔުން އަމާޒުވި ފަހުންނެވެ.

އެ ޕޯސްޓުކުރި އިރުގައި ކައިލީގެ ފޮލޮވާސްގެ އަދަދު އުޅުނީ 400 މިލިއަނަށް ވުރެ މަތީގަ އެވެ. ނަމަވެސް މިހާރު އެ އަދަދު ވަނީ 399 މިލިއަނަށް ވެއްޓިފަ އެވެ.

އިޒުރޭލަށް ސަޕޯޓްކޮށް ޕޯސްޓުކުރި މަޝްހޫރު ތަރިންގެ ތެރޭގައި މެޑޯނާ، އެމީ ޝޫމާ، މާކް ހެމިލް، ނެޓަލީ ޕޯޓްމަން، ގަލް ގެޑޯ، ޖެމީ ލީ ކާޓިސް، ނީނާ ޑޮބްރޭވް، ސޯފިއާ ރިޗީ އަދި އޭޝްލީ ޓިސްޑޭލް ހިމެނެ އެވެ. އެ އެންމެނަށް ވެސް ގިނަ ބައެއްގެ ފާޑުކިޔުން ދަނީ އަމާޒުވަމުންނެވެ.