ގައުމީ ޓީމުގެ މެޗު ޕްރޮމޯޓް ކުރުމެއް ނެތް، އެފްއޭއެމުން އަތްއުރާލައިގެން

ވޯލްޑް ކަޕް ކޮލިފައިންގެ ޕްލޭއޮފްގައި މާދަމާ ބަންގްލަދޭޝާ ދެކޮޅަށް ކުޅޭ މެޗަކީ ކުރިއަށް އޮތް އެއް އަހަރު ރާއްޖޭގެ ފުޓްބޯޅައިގެ ކަލަންޑަރު ކަނޑައެޅުމާ ގުޅިފައި އޮތް މެޗެކެވެ. މާދަމާ ހަވީރު ގައުމީ ފުޓްބޯޅަ ދަނޑުގައި ރާއްޖެ ކުޅޭ މެޗަކީ ވޯލްޑް ކަޕް ކޮލިފައިންގެ ގުރޫޕް ސްޓޭޖަށް ކޮލިފައިވުމަށް ކުޅޭ ޕްލޭއޮފް ބުރުގެ ފުރަތަމަ ލެގް މެޗެވެ. މި ބުރު ރާއްޖެ އަށް ގެއްލިއްޖެނަމަ، ކުރިއަށް އޮތް އަހަރަށް ދިވެހި ގައުމީ ޓީމުގެ ހަރަކާތް ހުއްޓޭނެ އެވެ. ކިތަންމެ ދިގު މުއްދަތަކަށް ލީގު ހުއްޓާލައިގެން އޮންނަން ޖެހުނަސް އިންޓަނޭޝަނަލް ފްރެންޑްލީ ގިނަ މެޗުތަކެއް ރާއްޖެއަކުން ނުކުޅެ އެވެ.

ޕްލޭއޮފް ބުރުގެ މެޗުން ގުރޫޕް ސްޓޭޖަށް ދެމި ނުގަނެވިއްޖެނަމަ އަންނަ އަހަރުގެ ނިޔަލަށް ފުޓްބޯޅައިގެ މާ ބޮޑު ހަރަކާތެއް ރާއްޖެއަކަށް ނޯންނާނެ އެވެ.

ރާއްޖޭގެ ފުޓްބޯޅަ އަށް މުހިންމު މި މެޗު ޕްރޮމޯޓް ކުރަން އެފްއޭއެމުން އެކަށީގެންވާ މަސައްކަތެއް ނުކުރެ އެވެ. ފުޓްބޯޅަ އާއި އެފްއޭއެމް ރިފޯމް ކުރަމަށް ގޮވާލާ ކެމްޕޭން ފަށައިފައިވާ ސޭވް އެފްއޭއެމްގެ އޮފިޝަލަކު ބުނީ މެޗުގެ ފޯރި ހިއްޕުމުގެ މަސައްކަތުގައި އެފްއޭއެމުން ތިބީ އަތް އުރާލައިގެން ކަމަށެވެ.

"އެފްއޭގެ ފޭސްބްކް ޕޭޖުގައި ޕޯސްޓެއް ޖަހާލާތަން ފެންނަނީ. އެކަމަކު އެއީ ކޯއްޗެއް، ރާއްޖޭގެ އެންމެ ބޮޑު ކުޅިވަރު އެސޯސިއޭޝަނާ ބަލާއިރު މި ފެންވަރަކަށް ނޫން ދާން ޖެހޭނީކީ،" އޭނާ ބުންޏެވެ.

އޭނާ ބުނީ އެފްއޭއެމުން އިސްނަގައިގެން މީގެ ކުރިން ވެސް މުހިންމު މެޗުތައް ޕްރޮމޯޓްކުރަން މަސައްކަތްކޮށްފައި ނުވާ ކަމަށެވެ. މީގެ ކުރިން މިކަހަލަ މެޗުތައް ޕްރޮމޯޓްކުރަން އެފްއޭއެމުން މަސައްކަތް ކުރީ ފުޓްބޯޅަ އަށް ޝައުގު ހުންނަ ކޮންމެ ވެސް އާރުލާ މީހަކު އިސް ނަގައިގެން މަސައްކަތް ކުރަން އުޅުމުން ކަމަށެވެ.

"މިދިޔަ ހަތަރު ވަރަކަށް އަހަރު މަހޭ [ސްޕޯޓްސް މިނިސްޓަރު އަހްމަދު މަހްލޫފް] ނޫނީ ބަލަކު [ކުރީގެ ޓޫރިޒަމް މިނިސްޓަރު އަލީ ވަހީދު] އުޅުނީމަ މެޗުތައް ޕްރޮމޯޓް ކުރަން އެފްއޭއެމުން ކިރިޔާ ވެސް ކަމެއް ކޮށްފައި އޮތީ،" އޭނާ ބުންޏެވެ.

"އޭގެ ކުރިން ޓޮމް [އަހުމަދު ތޯރިގު] (އެފްއޭއެމްގެ ރައީސްކަމުގައި) ހުރި އިރު ފެނުނު ކުޅުދުއްފުށިން ސަޕޯޓަރުން ގެނެސް ހާއްސަ ކަންތައްތަކެއް ކުރިތަން. އެކަމަކު މިހާރު އޮތް ލީޑާޝިޕުން އިސް ނަގައިގެން އެކަހަލަ އެއް ވެސް މަސައްކަތެއް ކޮށްފައެއް ނެތް."

އޭނާ ބުނީ އެފްއޭއެމްގެ ހިންގުން ދޯދިޔާ ވެގެން ދިއުމުން ގައުމީ ޓީމުގެ މެޗުތަކަށް ވެސް އާންމުންގެ ސަމާލުކަން ކުޑަވެއްޖެ ކަމަށެވެ. މެޗު ޕްރޮމޯޓްކުރަން ބައެއް މައުލޫމާތުތައް ހޯދަން ނޫސްވެރިން ވެސް އެފްއޭއެމްގެ މީޑިއާ ގުރޫޕްގައި ތަކުރާރުކޮށް އެދެމުން ދިޔަ ކަމަށެވެ. އެކަމަކު އެފްއޭއެމްގެ ރައީސް ބައްސާމް އަދީލް ޖަލީލާއި ޖެނަރަލް ސެކްރެޓަރީ ހުސައިން ޖަވާޒާއި އޭނާގެ ނައިބު އަދި ގައުމީ ޓީމުގެ މެނޭޖަރު އަބްދުﷲ ޝިބާއު ވެސް ތިއްބަވާ އެ ގުރޫޕްގައި އެއިން އެއްވެސް ބޭފުޅަކު ނޫސްވެރިންގެ އެ ރިކްއެސްޓްތައް ފުރިހަމަކޮށްދީފައެއް ނުވެ އެވެ.

ޓިކެޓް ވިއްކަން ފަށާނީ ކޮން އިރަކުންތޯ، މެޗަށް ދަނޑަށް ވައްދާނީ ކިހާ ސަޕޯޓަރުންނެއްތޯ، އަދި ގައުމީ ސްކޮޑަށް ނެގި ކުޅުންތެރިންގެ ލިސްޓް ހޯދަން ވެސް ނޫސްވެރިން އެ ގުރޫޕްގައި އެދިފައި ވެއެވެ. އެކަމަކު މެޗު ފަށަން ތިރީހަކަށް ގަޑިއިރަށް ވީ އިރު ވެސް އެ މައުލޫމާތުތައް ހިއްސާކޮށްފައެއް ނެތެވެ.

ގައުމީ ޓީމުގެ ކުރީގެ ކުޅުންތެރިޔަކު ބުނީ މި އަހަރުގެ ސާފް ޗެމްޕިއަންޝިޕްގައި ރާއްޖެ އަށް ކުރިމަތިވި ދަށް ނަތީޖާ އާ އެކު ފުޓްބޯޅަ އާ މެދު އާންމުންގެ ސަމާލުކަން ދަށަށް ދިއުމުން ކުރިއަށް އޮތް މެޗު ޕްރޮމޯޓް ކުރަން އެފްއޭއޭމުން ދެ ގުނަ އަށް މަސައްކަތް ކުރަން ޖެހޭނެ ކަމަށެވެ.

"އާޓިފިޝަލް ބީޗް ކަހަލަ ތަނެއްގައި އިވެންޓެއް ބޭއްވުން. އެތަނުން މެޗުގެ ޓިކެޓް ވިއްކަން ފަށައި ހަމަ އެތަނުން ގައުމީ ޓީމު ޖޯޒީ ގަންނަން ލިބޭނެ އިންތިޒާމުތައް ހަމަޖެއްސޭނެ. މި ހުންނަނީ އެފްއޭއެމްގެ ލެވަލްގައި ކުރެވޭނެ ކަންކަން. މިއީ ފުޓްބޯޅައިގެ އެންމެ ބޮޑު ފޯރިއެއް އޮންނަ ޔޫރަޕްގެ ގައުމުތަކުގައި ވެސް ކަންކަން ކުރާ ގޮތް،" އޭނާ ބުންޏެވެ.

ގައުމީ އަންހެން ޓީމުގެ ހެޑް ކޯޗު އަދި ބުރު ސްޕޯޓްސްގެ ވެސް ކޯޗު މުހައްމަދު ނިޒާމް ބުނީ ބަންގްލަދޭޝްގެ މެޗުން މޮޅުވެއްޖެ ނަމަ ފުޓްބޯޅައިގެ ފޯރި އަލުން ގެނައުމަށް ބޮޑު އެހީ އަކަށް ވާނެ ކަމަށެވެ.

އެކަމަކު މެޗުގެ ކުރިން އާންމުންގެ މެދުގައި އެ ފޯރި ގެންނަން އެފްއޭއެމުން އެކަށީގެންވާ މަސައްކަތެއް ނުކުރެ އެވެ. އެއަށް ވުރެ އެ އެސޯސިއޭޝަން އޮތީ މާލީ ގޮތުން ބޮޑު އަޑިގަނޑަކަށް ވެއްޓިފަ އެވެ. ފީފާ އާއި އޭއެފްސީން ފައިސާ ފޯރުކޮށް ދެމުން ދިޔައިރު ވެސް އެ ދަރަންޏާއި މުސާރަ ނުދިނުމުގެ މައްސަލަތަކަށް ހައްލެއް ނުލިބެ އެވެ.

އެފްއޭއެމްގެ ޓެކްނިކަލް އަދި އިދާރީ މުވައްޒަފުންނަކަށް މުސާރަ ނުދެ އެވެ. ކްލަބްތަކަށް ދޭން ޖެހޭ ފައިސާއެއް ނުދެ އެވެ. ދަރަނީގެ މައްސަލަތަކުގައި އެ އެސޯސިއޭޝަނާ ދެކޮޅަށް އޯގަސްޓް އަދި ސެޕްޓެމްބަރު މަހުގައި ވެސް ކޯޓުން ހުކުމްތަކެއް ކޮށްފި އެވެ.