ރާއްޖެ އިން ފަލަސްތީނަށް ދެ މިލިއަން މަސްދަޅު ހަދިޔާ ކުރަނީ

ފަލަސްތީނުގައި ހާލުގައި ޖެހިފައިވާ މީހުންނަށް އެހީވުމަށްޓަކައި ރާއްޖެއިން ދެ މިލިއަން މަސްދަޅު ހަދިޔާކުރަން ރައީސް އިބްރާހިމް މުހައްމަދު ސޯލިހު މިއަދު ނިންމަވައިފި އެވެ.

އިޒްރޭލުން ފަލަސްތީނަށް މިހާރު ދެމުންދާ ހަމަލާތަކުގެ ސަބަބުން ފަލަސްތީނުގެ އެތައް ހާސް ބަޔަކު ޝަހީދުވެ، އަދި އެތައް ބަޔަކު ވަނީ ހާލުގައި ޖެހިފަ އެވެ.

ފޮރިން މިނިސްޓަރު އަބްދުﷲ ޝާހިދު ކުރެއްވި ޓްވީޓެއްގައި ވަނީ ފަލަސްތީނުގެ މީހުންނަށް އެހީވުމުގެ ގޮތުން ރާއްޖެ އިން ދެ މިލިއަން މަސްދަޅު ހަދިޔާ ކުރަން ރައީސް ނިންމަވާފައިވާ ކަމަށެވެ. އެއީ ފަލަސްތީނުގެ ހައްގުގައި ދިވެހިން ތިބިކަން ދައްކުވައިދޭނެ ކަމެއް ކަމަށް ވެސް ޝާހިދުގެ ޓްވީޓްގައިވެ އެވެ.

ފަލަސްތީނަށް އިޒްރޭލުން ދެމުންދާ ހަމަލާތައް ރާއްޖެ އިން ވަނީ ކުށްވެރިކޮށްފަ އެވެ. ރާއްޖެ ހިމެނޭ ގޮތަށް ގިނަ ގައުމުތަކެއް ބައިވެރިވެގެން އދ. ގެ އާންމު މަޖިލީހުގެ ހާއްސަ ޖަލްސާއެއް ބާއްވަން ވެސް މިހާރު ވަނީ ނިންމައިފަ އެވެ.

ފަލަސްތީނަށް އެހީވުމުގެ ގޮތުން ދިވެހިންނާއި ރާއްޖޭގެ ވިޔަފާރިތަކުން ވެސް ވަނީ އެތައް މިލިއަން ރުފިޔާއެއްގެ އެހީ ދީފަ އެވެ.