ކުއްޖަކަށް އަނިޔާކުރި އިންޑިއާ އަންހެނަކު ހައްޔަރުކޮށްފި

ކުޑަކުއްޖެއްގެ ގައިގައި ޖަހައި އަނިޔާކުރި އިންޑިއާގެ މެއިޑަކު ހައްޔަރުކޮށްފި އެވެ.

ސަންދީޕް ކޯރު، 22، ހައްޔަރުކޮށް އޭނާގެ ބަންދަށް 15 ދުވަސް ދީ ނެރުނު އަމުރުގައިވާ ގޮތުން މި މީހާ ކުއްޖާގެ ގައިގައި ޖަހާ ކަމަށް، ހެކީގެ ގޮތުގައި ހުށަހެޅި ވީޑިއޯއިން ބެލެވެ އެވެ.

މި މީހާ ހައްޔަރުކޮށް، ތުހުމަތުކޮށްފައިވަނީ ކުޑަކުއްޖަކަށް ޖިސްމާނީ އަނިޔާކުރުމެވެ. އަދި އޭނާ އަނިޔާކުރީ، ބެލެހެއްޓުމާ ހަވާލުވެ ހުރި ކުއްޖަކަށް އަނިޔާކުރި ކަމުގެ ތުހުމަތުގައި ކަމަށް ވާތީ ބަންދުގައި ބަހައްޓަން ފެންނަ ކަމަށާއި އެއީ މުޖުތަމައުގެ ސަލާމަތަށްޓަކައި ކަމަށް ވެސް ގާޒީ އަލީ ނަދީމް ނެރުއްވި އަމުރުގައިވެ އެވެ.

އަމުރުގައި ބުނެފައިވަނީ ކުޑަކުއްޖަކަށް އަނިޔާކުރި ކަމަށް ކުރެވޭ ތުހުމަތު ވުޖޫވާ ވަރަށް މި މައްސަލައިގައި ހެކި އެބަހުރި ކަމަށެވެ.