ކުއްޖަކަށް ޖިންސީ ގޯނާކުރި މައްސަލައެއްގައި 17 އަހަރަށް ޖަލަށްލި މީހަކު ހައި ކޯޓުން ސަލާމަތްވެއްޖެ

ކުޑަކުއްޖަކަށް ޖިންސީ ގޯނާކުރިކަމުގެ ކުށް ސާބިތުވެގެން 17 އަހަރަށް ޖަލަށްލި މީހަކު ހައި ކޯޓުން އިއްޔެ މިނިވަންކޮށްފި އެވެ.

އަތޮޅު ތެރޭގެ ރަށެއްގައި ކުޑަކުއްޖަކަށް ޖިންސީ ގޯނާކުރި މައްސަލައެއް ފެންމަތިވީ އެ ކުއްޖާގެ ޓީޗަރަކު އެ ކުއްޖާއަށް ޖިންސީ ގޯނާކުރި ކަމަށް ބުނާ އެ މައްސަލައެއް 2020 ވަނަ އަހަރު ފެންމަތިވުމުންނެވެ. އެ ކުއްޖާ ބުނެފައިވާ ގޮތުގައި ޓީޗަރު އެ ކުއްޖާއަށް ޖިންސީ ގޯނާކުރީ 2019 ވަނަ އަހަރާއި 2020 ވަނަ އަހަރާ ދެމެދު އެވެ. އަދި ދެވަނަ މީހާ ޖިންސީ ގޯނާކުރީ އެ ކުއްޖާގެ އުމުރުން 11 އަހަރުގައި 2014 ވަނަ އަހަރާއި 2015 ވަނަ އަހަރާ ދެމެދު އެވެ.

އެހެންވެ، އެ މައްސަލާގައި އެ ޓީޗަރާއި ދެވަނަ މީހާގެ މައްޗަށް ދައުވާ ކުރުމުން 2022 ވަނަ އަހަރު ކްރިމިނަލް ކޯޓުން ނިންމީ ޓީޗަރުގެ މައްޗަށް ކުށް ސާބިތު ނުވި ނަމަވެސް ދެވަނަ މީހާގެ މައްޗަށް ކުށް ސާބިތުވާތީ އޭނާ 17 އަހަރަށް ޖަލަށްލުމަށެވެ.

އެ މައްސަލަ އެ މީހާގެ ފަރާތުން އިސްތިއުނާފް ކުރުމުން ހައި ކޯޓުން އިއްޔެ ކުރި ހުކުމުގައި ވަނީ ކުއްޖާގެ ފަރާތުން އެ ވާހަކަ އެންމެ ފުރަތަމަ މީހަކަށް ކިޔައިދިނީ ހާދިސާ ހިނގިތާ ހައެއްކަ އަހަރު ފަހުން ކަމަށާއި އަދި ޖެންޑާ މިނިސްޓްރީ އާއި ފުލުހުން އެ ކުއްޖާގެ ބަޔާން ދެ ފަހަރަށް ނެގިއިރު ފާހަގަ ކުރެވޭ ތަފާތުތަކެއް ދެ ބަޔާނުން ފެންނަން ހުރި ކަމަށް ހުކުމުގައިވެ އެވެ. އެހެންވެ، އެ ހާލަތުގައި އެ ކުއްޖާ ބުނާ ބުނުމުގެ މައްޗަށް ބިނާކޮށް އެ ކުއްޖާގެ އާއިލާގެ މީހުންގެ ހެކިބަހަށް ބުރަދަން ދިނުން ރަނގަޅު ނޫން ކަމަށް ހުކުމުގައިވެ އެވެ.

މީގެ އިތުރުން އެ ކުއްޖާއަށް ޖިންސީ ގޯނާކުރި ކަމަށް ބުނެ އިތުރު މީހެއްގެ މައްޗަށް ދައުވާކުރި މައްސަލައެއް އެއްފަހަރާ ދަށު ކޯޓުން ހިންގިއިރު، ހެކިން ދީފައިވާ ހެކިބަހަށް ބަލާއިރު އޭގެ ތެރެއިން އެކަކު ސަލާމަތްކޮށް އަދި ދެވަނަ މީހާގެ މައްޗަށް ކުށް ސާބިތުކުރަން މަސައްކަތް ކޮށްފައިވާ ކަމަށް ބެލެވޭ ކަމަށް ހުކުމުގައިވެ އެވެ. އަދި ކުއްޖާއާ ބެހޭގޮތުން ހެދި މެޑިކޯ ލީގަލް ރިޕޯޓްތަކުގައި ވެސް، ޓީޗަރާ ދެކޮޅަށް ބާރު ލިބޭ ހެއްކެއް ނެތް ކަމަށް ދަށު ކޯޓުން ނިންމިއިރު އޭގެ މާކުރިން ހިނގި ކަމަށް ބުނާ ކަމެއްގައި ދެވަނަ މީހާއާ ދެކޮޅަށް ހެއްކެއް ލިބުނު ގޮތެއް ސާފުނުވާ ކަމަށް ހުކުމުގައިވެ އެވެ.

އެކަންކަން ފާހަގަ ކުރައްވައި، ފަނޑިޔާރު މުހައްމަދު ނިޔާޒާއި އިސް ފަނޑިޔާރު ހުސައިން ޝަހީދުގެ އަގުލަބިއްޔަތުން ނިންމެވީ ދަށު ކޯޓުގެ ހުކުމް ބާތިލްކުރަން ޖެހޭ ކަމަށެވެ.

ނަމަވެސް ރައުޔު ތަފާތުވި ފަނޑިޔާރު ހަސަން ޝަފީއުގެ ރައުޔަކީ ދަށު ކޯޓުގެ ހުކުމް ރަނގަޅު ކަމަށެވެ.

ސަބަބެއްގެ ގޮތުގައި އެ ރައުޔުގައިވަނީ އެ ކުއްޖާއަށް އެ މީހާ ޖިންސީ ގޯނާކުރި ވާހަކަ ޓީޗަރުގެ ފަރާތުގައި އެންމެ ފުރަތަމަ ކިޔައި ދިނުމުން އެ ޓީޗަރު ވެސް އެ ކުއްޖާއަށް ޖިންސީ ގޯނާކުރަން ފެށުމުން އެ ވާހަކަ އެހެން މީހުންނާ ހިއްސާކުރަން އެ ކުއްޖާ ފަސް ޖެހުނީ ކަމަށް ބެލެވޭތީ އެވެ. އަދި ޖިންސީ ގޯނާއެއް ބޭރު ފުށުން ފެންނަން ނެތުމަކީ އެ ކުއްޖާ ބުނާ ބުނުން ނަފީ ކުރެވޭނެ ކަމެއް ނޫން ކަމަށް އެ ރައުޔުގައިވެ އެވެ.

އެހެންވެ، ހައި ކޯޓުގެ ދެ ފަނޑިޔާރުންގެ އަޣުލަބިއްޔަތުން ކުރެއްވި ހުކުމުގައިވަނީ އެ މީހާ ޖަލަށްލާން ދަށު ކޯޓުން ކުރި ހުކުމް ބާތިލްކުރާ ކަމަށެވެ.