ޔުޓިލިޓީ ނިޒާމްގެ އޮނިގަނޑު ބަދަލުކުރަން ވިސްނަނީ

ރާއްޖޭގައި ޔުޓިލިޓީ ހިދުމަތް ދޭ ނިޒާމް ބަދަލު ކުރުމަށް ވިސްނުންތަކެއް ގެންގުޅޭ ކަމަށާއި އެކަމުގެ މަޝްވަރާތައް ކުރަމުންދާ ކަމަށް އިންތިހާބީ ރައީސްގެ އޮފީހުން ބުނެފި އެވެ.

ޔުޓިލިޓީ ހިދުމަތްތައް ދެނީ ސަރުކާރުގެ ހަތަރު ކުންފުންޏެއް ކަމަށްވާ ސްޓެލްކޯ، ފެނަކަ، އެމްޑަބްލިއުއެސްސީ އަދި ވެމްކޯ މެދުވެރިކޮށެވެ. އެ ކުންފުނީގެ މާލީ އަދި ދަރަނީގެ ހާލަތާ ގުޅިގެން އިންތިހާބީ ރައީސް އޮފީހުން މިއަދު ކަންބޮޑުވުން ފާޅުކޮށް، ހައްލު ކުރަން ގެންގުޅޭނެ ވިސްނުންތައް ހާމަކުރި އެވެ.

އިންތިގާލީ މަރުހަލާގެ ތަރުޖަމާނު މުހައްމަދު ފިރުޒުލް ވިދާޅުވީ ޔުޓިލިޓީ ނިޒާމްގެ އޮނިގަނޑު ބަދަލު ކުރަން ވިސްނަމުންދާ ކަމަށާއި އެކަން ކުރާނީ ހިދުމަތްތައް ރައްޔިތުންނަށް އެންމެ ރަނގަޅަށް ފޯރުކޮށްދެވޭނެ ގޮތެއް ހޯދައި، ދައުލަތަށް ބުރައަކަށް ނުވާނެ ގޮތަށް ކަމަށެވެ.

ނަމަވެސް، އޭގެ ތަފްސީލެއް އަދި ދެވެން ނެތް ކަމަށް އޭނާ ވިދާޅުވި އެވެ. ފިރުޒުލް ވިދާޅުވީ އޮނިގަނޑަށް ބަދަލު ގެންނަން ވިސްނަމުން ދިޔަ ނަމަވެސް، އޭގެ ތެރޭގައި އެއްވެސް ކުންފުންޏެއް ޕްރައިވެޓައިޒް ކުރުމުގެ ވިސްނުމެއް ނެތް ކަމަށެވެ.

ފިރުޒުލް ވިދާޅުވީ ސަރުކާރު ހިއްސާވާ ކުންފުނިތަކަކީ ކުންފުނިތަކެއްގެ ގޮތުގައި ހިިންގަންޖެހޭ ތަންތަން ކަމަށާއި ދައުލަތުގެ ބަޖެޓަށް ބަރޯސާވުމުގެ އިތުރުން ލިބޭ އާމްދަނީ އިން މެނޭޖް ކުރެވޭނެ ތަންތަނަށް ހަދަން ޖެހޭ ކަމަށެވެ.

ކުންފުނިތަކުގެ މާލީ އަދި އިދާރީ އެޑްމިނިސްޓްރޭޝަން ރަނގަޅު ކުރެވިއްޖެނަމަ، ކުންފުނިތަކުގެ ހާލަތަށް ވަރަށް ބޮޑު ބަދަލެއް ގެނެވޭނެ ކަމަށް ވެސް ފިރުޒުލް ވިދާޅުވި އެވެ. އެހެންކަމުން، ކުންފުނިތަކުން އެކި ކަންކަމުގައި ގެންގުޅޭ ހަމަތައް ހަރުދަނާ ނިޒާމެއްގެ ތެރެއަށް ގެންނާނެ ކަމަށް އޭނާ ވިދާޅުވި އެވެ.

ސަރުކާރު ހިއްސާވާ ކުންފުނިތަކުގެ ދަރަނި ބޮޑުކަން ފާހަގަކުރައްވައި، ހާއްސަކޮށް އާންމު ކުދި ވިޔަފާރިތަކަށް އަދާކުރަންޖެހޭ ފައިސާ ގިނަ ކަން ފިރުޒުލް ފާހަގަކުރެއްވި އެވެ. އެ ފައިސާ ވީ އެންމެ އަވަހަކަށް އަދާކުރާނެ ކަމަށް ވެސް އޭނާ ވިދާޅުވި އެވެ.

ކުންފުނިތަކުގެ ދަރަނީގެ އަދަދު

- ފެނަކަ: 4.1 ބިލިއަން ރުފިޔާ

- ސްޓެލްކޯ: 3.7 ބިލިއަން ރުފިޔާ

- އެމްޑަބްލިއުއެސްސީ: 1.4 ބިލިއަން ރުފިޔާ

- ވެމްކޯ: 226 މިލިއަން ރުފިޔާ

ފިރުޒުލް ވިދާޅުވީ ކުންފުނިތައް ހިންގަމުންދާ މަޝްރޫއުތައް ކަނޑައެޅިފައިވާ މުއްދަތުގެ ތެރޭގައި ކުރިއަށް ގެންގޮސް ނިންމުމަށް ވެސް ވަރަށް އިސްކަންދޭނެ ކަމަށެވެ. މަޝްރޫއުތައް މުއްދަތަށް ނުނިމުމަކީ މަޝްރޫއުތަކުގެ އަގު އިތުރުވެ، އޭގެ ބުރަ ކުންފުނިތަކުން އުފުލަންޖެހޭ ކަމެއްކަން އޭނާ ފާހަގަކުރެއްވި އެވެ.

މީގެއިތުރުން ކުންފުނިތަކަށް ބޭނުންވާ މިންވަރަށް މާބޮޑަށް އިތުރަށް މުވައްޒަފުން ނަގާފައި އޮތުމަކީ ވެސް ކުންފުނިތަކުގައި އޮތް ބޮޑު މައްސަލައެއްގެ ގޮތުގައި ފިރުޒުލް ފާހަގަ ކުރެއްވި އެވެ. އެކަމުގެ ހާލަތު އެންމެ ގޯހީ، ގިނަ ރަށްރަށުގައި ކަރަންޓުގެ ހިދުމަތް ފޯރުކޮށްދޭ ފެނަކައިގެ އެވެ.

ފެނަކައިގެ މުވައްޒަފުންގެ އަދަދު 2018 ވަނަ އަހަރު ހުރީ 2000ގަ އެވެ. މިހާރު މުވައްޒަފުންގެ އަދަދު ވަނީ 8،000 އަށް އަރައިފަ އެވެ. މި އަދަދު އެންމެ ބޮޑަށް އިތުރުވެފައި ވަނީ މި އަހަރުގެ މާޗް މަހުން ފެށިގެންނެވެ.

ފިރުޒުލް ވިދާޅުވީ ބޭނުންވާ މިންވަރަށްވުރެ އިތުރަށް މުވައްޒަފުން ތިބި ނަމަވެސް، މުވައްޒަފުން ވަކި ކުރުމަކީ އިންތިހާބީ ރައީސް ޑރ. މުހައްމަދު މުއިއްޒު ގެންގުޅުއްވާނެ އުސޫލެއް ނޫން ކަމަށެވެ. އެ މައްސަލަ ހައްލު ކުރާނީ ވެރިކަމަށް އައިސް ކުންފުނިތަކުގެ ހިއުމަން ރިސޯސް އޮޑިޓެއް ހަދައިގެން ކަމަށް އޭނާ ވިދާޅުވި އެވެ.

"އަޅުގަނޑުމެން ކުރިމަތީގައި އޮތީ އުއްމީދުތަކެއް. ގޮންޖެހުންތަކާ ކުރިމަތިލާ ރައްޔިތުން އެދޭ ބަދަލުތައް ގެނެސްދިނުމުގެ ފުރިހަމަ އިތުބާރު އެބަ އޮތް،" ފިރުޒުލް ވިދާޅުވި އެވެ.