ޓޫރިޒަމް ޒޯނެއް ތަރައްގީ ކުރަން ފިޔޯރި ކައިރީގައި އޮންނަ ފަޅުރަށަކުން ބޮޑު ބިމެއް ކުއްޔަށް ދެނީ

ގދ. ފިޔޯރީގެ އިހުތިސާސްގެ ތެރޭގައި އޮންނަ ފަޅުރަށެއް ކަމަށްވާ ކާޅެހުއްޓާއިން 429،000 އަކަފޫޓަށް ވުރެ ބޮޑު ބިމެއް ޓޫރިޒަމް ޒޯނެއް ހެދުމަށް ކުއްޔަށް ދޫކުރަން އެ ރަށު ކައުންސިލުން މިއަދު އިއުލާންކޮށްފި އެވެ.

އެ އިއުލާނުގައި ބުނީ ޓޫރިޒަމްގެ ވިޔަފާރި ހިންގުމަށް ކާޅެހުއްޓާއިން ޓޫރިޒަމް ޒޯނަށް ކަނޑައަޅާފައިވާ ބިން، 50 އަހަރުގެ މުއްދަތަށް ކުއްޔަށް ހިފުމަށް ޝައުގުވެރިވާ ފަރާތްތަކަށް ބީލަން ހުށަހެޅުމުގެ ފުރުސަތު މިހާރު ހުޅުވާލާފައިވާ ކަމަށެވެ.

ކައުންސިލުން ބުނި ގޮތުގައި، ކުއްޔަށް ދޭ ސަރަހައްދުގެ ބޮޑުމިނުގައި 429،480 އަކަފޫޓު ހުންނާނެ އެވެ. ބިމު ކުލީގެ ގޮތުގައި އަކަފޫޓަކަށް ހުށަހެޅޭނެ އެންމެ ދަށް އަދަދަކީ އަހަރަކަށް 0.5ރ. އެވެ. ކުއްޔަށް ދެނީ އެ ބިން އެއްކޮށެވެ.

އެ މަސައްކަތަށް ޝައުގުވެރިވާ ފަރާތްތަކުން މި މަހު 16 ގެ ކުރިން ބިޑް ރަޖިސްޓަރީ ކުރުމަށް އެދޭ ފޯމު ހުށަހަޅަން ވާނެ ކަމަށް ކައުންސިލުން ބުންޏެވެ.

ބީލަން ބަލާގަތުމާއި ބީލަން ހުޅުވުން އޮންނާނީ މި މަހުގެ 30 ގައި ކައުންސިލް އިދާރާގައި ކަމަށް ވެސް އެ އިއުލާނުގައި ބުންޏެވެ.

ފިޔޯރި ކައުންސިލްގެ ރައީސް ފައިޒަރު ރަޝީދު "މިހާރު" އަށް ވިދާޅުވީ ކާޅެއްހުޓާ އަކީ އެ ރަށުގެ އިހުތިސާސްގެ ތެރޭގައި އޮންނަ ތިން ފަޅުރަށުގެ ތެރެއިން ރަށާ އެންމެ ކައިރީގައި އޮންނަ ރަށް ކަމަށެވެ. ރަށުގެ ލޭންޑް ޔޫސް ޕްލޭން ހެދި އިރު، ކާޅެއްހުޓާގައި ދަނޑުވެރިކަމަށާއި ޓޫރިޒަމްގެ ބޭނުމަށް ބިން ކަނޑައެޅި ކަމަށް އޭނާ ވިދާޅުވި އެވެ.

ބޮޑުމިނުގައި 9.5 ހެކްޓަރު ހުންނަ އެ ރަށުގެ ބިމުން 5.6 ހެކްޓަރުގެ ސަރަހައްދެއް މި އަހަރުގެ ކުރީކޮޅުގައި އޯގެނިކް ފާމިން އަށް ކުއްޔަށް ދޫކޮށްފައިވާ ކަމަށް ވެސް ފައިޒަރު ވިދާޅުވި އެވެ.

"ބާކީ ހަތަރު ވަރަކަށް ހެކްޓަރު މި ކުއްޔަށް ދެނީ ޓޫރިޒަމްގެ ބޭނުމަށް،" އޭނާ ވިދާޅުވި އެވެ.

"މި ފުރުސަތު ހުޅުވާލީ ވެސް އެތަނުގައި ލޯކަލް ޓޫރިޒަމްގެ ވިޔަފާރިކުރަން ދެތިން ފަރާތަކުން ކައުންސިލަށް ޝައުގުވެރިކަން މިހާރު ވެސް ފާޅުކޮށްފައި އޮތީމަ. އޮންނަ އުސޫލުގެ ތެރެއިން އެކަން ބިޑަކުން ކޮށްގެން، އެންމެ ރަނގަޅު ޕްރޮޕޯސަލްއެއް ހުށަހަޅާ ފަރާތަކަށް ކުއްޔަށް ދިނުމަށް."

ފައިޒަރު ވިދާޅުވި ގޮތުގައި، އެ ރަށުގެ ލޯކަލް ޓޫރިޒަމް ފުޅާކޮށްގެން ރަށު މީހުންނަށް ވަޒީފާގެ ފުރުސަތުތައް ވެސް ތަނަސްވެ، ރަށަށް ވަންނަ އާމްދަނީ އިތުރު ކުރެވޭނެ އެވެ. ފިޔޯރީގެ ސާފިން ޕޮއިންޓާއި ޑައިވިން ޕޮއިންޓަކީ މިހާރު ވެސް ޓޫރިސްޓުންގެ މެދުގައި މަގުބޫލު ތަންތަނެވެ.

އެ ރަށާ ކައިރިން މަޑީގެ ބާވަތްތައް ވެސް ގިނަ އަދަދަކަށް ފެންނާތީ، އެއީ ލޯކަލް ޓޫރިޒަމަށް ވަރަށް ރަނގަޅު ސަރަހައްދެއް ކަމަށް ކައުންސިލް ރައީސް ގަބޫލުކުރައްވަ އެވެ. އަދި ފިޔޯރިއާ ކައިރީގައި އޮންނަ ގދ. ފަރެސްމާތޮޑާގައި އެއާޕޯޓެއް ހުޅުވުމުން ޓޫރިސްޓުނަށް ދަތުރުފަތުރުކުރުމުގައި ވެސް ކުރިއަށް ވުރެ ލުއިފަސޭހަ ވެއްޖެ އެވެ.