އިލޮން މަސްކްގެ ހަޔާތަށް ފިލްމެއް ހަދަނީ

ދުނިޔޭގެ އެންމެ ބޮޑު މަހުޖަނު އިލޮން މަސްކްގެ ހަޔާތަށް ފިލްމެއް ހަދަން ނިންމައިފި އެވެ.

މުނިފޫހިފިލުވުމުގެ ހަބަރުތައް ގެނެސްދޭ ނޫސްތަކުން ރިިޕޯޓްކުރި ގޮތުގައި އެ ފިލްމު ހަދަނީ މިދިޔަ ސެޕްޓެމްބަރު މަހު، އެމެރިކާގެ ލިޔުންތެރިޔާ އަދި ސީއެންއެންގެ ކުރީގެ ސީއީއޯ ވޯލްޓާ އައިސާކްސަން ނެރުނު އިލޮންގެ ބައޮގްރަފީ "އިލޮން މަސްކް" އަށް ބިނާކޮށެވެ.

ނަމަވެސް އެ ފިލްމުގައި އިލޮންގެ ރޯލު ކުޅެނީ ކާކު ކަމެއް އަދި ނޭނގެ އެވެ. ނަމަވެސް އެ ފިލްމު ހަދާކަން އިލޮން ވަނީ އެކްސްގައި ކުރި ޕޯސްޓެއްގައި ކަށަވަރުކޮށްދީފަ އެވެ.

"ޑެރެން ހަދަނީ އެ ފިލްމު. އޭނާ އަކީ އެންމެ މޮޅު އެކަކު،" އިލޮން ބުންޏެވެ.

އެ ފިލްމު ޑައިރެކްޓްކުރާ ޑެރެން އެފްރޮނޯސްކީ "ބްލެކް ސްވޯން" އާއި "ނޯއާ" އަދި "މަދާ" ކަހަލަ ހޮލީވުޑްގެ މޮޅެތި ފިލްމުތައް ގެނެސްދިން މަޝްހޫރު ފަންނާނެކެވެ.

ރިޕޯޓްތައް ބުނީ އެ ފިލްމު ހަދަން އިލޮންގެ ބައޮގްރަފީގެ ރައިޓްސް ގަނެފައި ވަނީ ހޮލީވުޑްގެ ކުރިއަރަމުން އަންނަ ސްޓޫޑިއޯ، އޭޓުޒީން ކަމަށެވެ.

އިލޮން އަކީ ލަގްޒަރީ ކާރު ބްރޭންޑް، ޓެސްލާ އާއި ޖައްވީ ކުންފުނި، ސްޕޭސް އެކްސް އާއި ސެޓްލައިޓް އިންޓަނެޓްގެ ހިދުމަތް ދޭ ސްޓާލިންކް އަދި މިހާރު "އެކްސް"ގެ ނަމުގައި ހިންގަމުން އަންނަ ކުރީގެ ޓުވިޓާގެ ވެސް ވެރިޔާ އެވެ.