ބްރެންސަންއާ އެކު އޮބާމާ މޫދު ކުޅިވަރުގައި

ލަންޑަން (ފެބްރުއަރީ 8) - އިނގިރޭސި ވިލާތުގެ މަޝްހޫރު ވާޖިން ގްރޫޕުގެ ޗެއާމަން ބިލިއަނާ ރިޗަޑް ބްރެންސަންއާ އެކު އެމެރިކާގެ ކުރީގެ ރައީސް ބަރަކް އޮބާމާ ކެރީބިއަންގައި މޫދު ކުޅިވަރުތަކާ އެކު ޗުއްޓީ ހޭދަކުރައްވައިފަ އެވެ.

ބްރެންސަން ބައްލަވައިގެންފައިވާ ބްރިޓިޝް ވާޖިން އައިލެންޑްސްގެ މޮސްކިޓޯ އައިލެންޑުގައި ޗުއްޓީ ހޭދަކުރެއްވުމަށް އޮބާމާ އާއި އަނބިކަނބަލުން މިޝޭލް ވަޑައިގެންނެވީ މިދިޔަ މަހު 20 ވަނަ ދުވަހު އެމެރިކާގެ ވެރިކަމުން ފައިބައިވަޑައިގަތުމަށް ފަހު އެވެ. ވާޖިން އައިލެންޑްސް އަށް ވަޑަައިގެންނެވީ ކެލިފޯނިއާގައި ކުރު ޗުއްޓީއެއް ހޭދަކުރެއްވުމަށް ފަހު އެވެ. އޮބާމާގެ ގާތް ރަހުމަތެރިޔާ ބްރެންސަންގެ ބްލޮގުގައި ވަނީ ހެލްމެޓާއި ގޮގްލްސް އަޅުއްވައިގެން އޮބާމާ ކައިޓްސާފިން ކުރާ ފޮޓޯތައް ޝާއިއުކޮށްފަ އެވެ.

"އެމެރިކާގެ ރައީސްކަމުގައި ހުންނެވި އިރު އޮބާމާ އަށް ވަރަށް ބޮޑަށް ސެކިއުރިޓީ ދީފައި ވަނީ. އެހެންވެ ޗުއްޓީ އަށް ވަޑައިގެން ބައެއް ކަންކަން ނުކުރެއްވެވޭ. އެކަމަކު މި ފަހަރު އޮބާމާ ވަނީ ވަރަށް ބޮޑަށް ރިލެކްސް ކުރައްވާފައި،" ބިލިއަނާ ބްރެންސަން ލިޔުއްވާފައިވެ އެވެ.

ބްރެންސަން ވިދާޅުވީ ރައީސްކަމުގައި ހުންނެވި އިރު މޫދު ކުޅިވަރުތަކުގައި ބައިވެރިވުން ސަލާމަތީ ސަބަބުތަކަށްޓަކައި އޮބާމާ އަށް އޮތީ މަނާކޮށްފަ އެވެ. އޭނާ އިތުރަށް ވިދާޅުވީ އޮބާމާ ކައިޓްސާފް ކުރައްވަން ދަސްކުރަން ދެ ދުވަސް ހޭދަވި ކަމަށެވެ. ސާފް ކުރެއްވުން ފަދަ ކަންތައްތައް އެމެރިކާގެ ރައީސުންނަށް ސީކްރެޓް ސާވިސް އިން އޮންނަނީ މަނާކޮށްފަ އެވެ.

ރިޗަޑްސަން ލިޔުއްވާފައިވާ ގޮތުގައި އޭނާ ވަނީ އޮބާމާ އަށް ރަހުމަތްތެރިކަމުގެ ޗެލެންޖެއް ވެސް ހުށަހަޅައިފަ އެވެ. އެއީ އޭނާ ފޮއިލްބޯޑް ކުރަން ދަސްކުރާ އިރު އޮބާމާ ކައިޓްސާފް ކުރަން ދަސްކުރުމެވެ.

މޮސްކިޓޯ އައިލެންޑް ބްރެންސަން ބައްލަވައިގެންފައި ވަނީ 2007 ވަނަ އަހަރު އެވެ. އޭގެ ފަހުން ވަނީ ލަގްޒަރީ ރިސޯޓަކަށް އެ ތަން ބަދަލުކޮށްފަ އެވެ.

އޮބާމާގެ އެންމެ ފަހު ޕްރެސް ކޮންފަރެންސްގައި ވަނީ ވެރިކަމުން ފައިބައިވަޑައިގެން އާއިލާއާ އެކު ވީހާ ވެސް ގިނަ ވަގުތު ހޭދަކުރައްވަން ބޭނުންވާ ކަމަށް ވިދާޅުވެފަ އެވެ.