އައްޑޫގެ ފަޅު ރަށަކަށް ދަތުރުގޮސް އުޅުނު މީހަކު ވެއްޓި، މަރުވެއްޖެ

އައްޑޫގެ ފަޅު ރަށަކަށް ދަތުރުގޮސް އުޅުނު މީހަކު ވެއްޓި މިއަދު މަރުވެއްޖެ އެވެ.

އެނގިފައިވާ ގޮތުގައި ހިތަދުއަށް އުފަން އަހުމަދު މުހައްމަދު، އެއްރުއްހެރާ ނަމަކަށް ކިޔާ ފަޅު ރަށަކަށް އިއްޔެ ހަވީރު ދިޔައީ އޭނާގެ ރައްޓެހިންނާއި އާއިލާގެ ބަޔަކާއެކުގަ އެވެ.

އެ މީހުންނާ އެކު އުޅުމުގެ ތެރޭގައި އަހުމަދު، 28، މިއަދު އެއްފަހަރު ބިން މައްޗަށް ވެއްޓުނު ކަމަށްވެ އެވެ. އެކަމަކު، ފެނާއި ޖޫސް ދިނުމުން ފަހުން ރަނގަޅުވި އެވެ.

އޭނާ މަރުވީ، ދެ ވަނަ ފަހަރަށް ވެއްޓުނު ފަހުންނެވެ.

"ވެއްޓިފައި އޮއްވާ ފެނުނުއިރު ނޭވާ ލާ. ޓެންޓު ކައިރިއަށް ގެންދިޔަ ފަހުން ނޭވާނުލާން ފެށީ. އެކަމަކު ވިންދު ހުރި. އެހެންވެ، ވަގުތުން ކޯސްޓްގާޑަށް ގުޅައިގެން މި ގެންދިޔައީ. ފޭދޫ ހެލްތު ސެންޓަރަށް ގެންދިޔަ ފަހުން މަރުވީ." މިކަން ހިނގިގޮތް އެނގޭ މީހަކު ކިޔައިދިނެވެ.

އެކަމުގައި ފުލުހުންގެ ބަހެއް އަދި ނުލިބެ އެވެ.