އިންޑިއާ އަށް ހިތްދަތިކަން، ދުނިޔޭގެ ޗެމްޕިއަންކަން އޮސްޓްރޭލިއާ އަށް

އަހްމަދުއާބާދު (ނޮވެމްބަރު 20) - އަމިއްލަ ދަނޑުގައި ކުޅުނު އިންޑިއާގެ މައްޗަށް ހަ ވިކެޓުން ކާމިޔާބު ހޯދައި، ކްރިކެޓްގެ ދުނިޔޭގެ ޗެމްޕިއަންކަން އޮސްޓްރޭލިއާ އިން ހަވަނަ ފަހަރަށް ހޯދައިފި އެވެ.

އިންޑިއާގެ ބޮޑުވަޒީރު ނަރެންދްރަ މޯދީގެ ގުޖްރާތު ސްޓޭޓްގެ އަހްމަދު އާބާދު ސިޓީގައި އޭނާގެ އަމިއްލަ ނަމުން ނަން ދިފައިވާ ކްރިކެޓް ސްޓޭޑިއަމްގައި 92،000 ވުރެ ގިނަ މީހުންގެ ކުރިމަތީ އިންޑިއާގެ ސަޕޯޓަރުން ހިމޭންކޮށްލުމުގައި އޮސްޓްރޭލިއާގެ ޓީމުން އެންމެ މުހިންމު ދައުރެއް އަދާކުރީ،137 ލަނޑު ހެދި ޓްރެވިސް ހެޑް އެވެ.

އޮސްޓްރޭލިއާ އިން ވަނީ 241 ލަނޑު ހަދައިފަ އެވެ. އިންޑިއާ އަށް ހެދުނީ 240 ލަނޑެވެ.

"އަހަންނަށް ހީނުކުރަން މިލިއަނެއްހާ އަހަރުން ވެސް މިކަން ވެދާނެކަމަކަށް. މިއީ ކޮން ކަހަލަ އާދަޔާހިލާފު ދުވަހެއް. މި ކާމިޔާބުގައި އަހަންނަށް ހިއްސާ ވެވުނީތީ އަހަރެން މިހުރީ ވަރަށް ފޯރީގައި،" އިންޑިއާގެ ލައްކައެއްހާ ސަޕޯޓަރުންގެ ކުރިމަތީގައި ކުޅެ އެ ޓީމާ ދެކޮޅަށް އޮސްޓްރޭލިއާ ހޯދި ކާމިޔާބާ ބެހޭގޮތުން ޓްރެވިސް ހެޑް ބުންޏެވެ.

ކެޕްޓަން ރޯހިތު ޝަރްމާ ލީޑް ކުރި އިންޑިއާގެ ޓީމުން ވަނީ މުބާރާތުގައި ކުރިން ކުޅުނު 10 މެޗުން ވެސް މޮޅުވެފަ އެވެ.

އެކަމަކު އޮސްޓްރޭލިއާ އިން، މުބާރާތުގައި ފުރަތަމަ ދެ މެޗުގައި އިންޑިއާ އާއި އޮސްޓްރޭލިއާ އަތުން ބަލިވި އެވެ. ގުރޫޕް ސްޓޭޖުގައި އޮސްޓްރޭލިއާގެ މައްޗަށް އިންޑިއާ އަށް ކުރި ހޯދިފައި އޮތުމުން، 1.4 މިލިއަން މީހުނަށް، މިފަހަރު ތައްޓާ މެދު ކުރެވުނު އުންމީދު އޮތީ ބޮޑުވެފަ އެވެ.

އިންޓަނޭޝަނަލް ކްރިކެޓް ކައުންސިލްގެ ޗެމްޕިއަންސް ޓްރޮފީ 2013 ގައި ހޯދި ފަހުން އިންޑިއާ އަށް ކްރިކެޓްގައި އަދި ތައްޓެއް ނުލިބެ އެވެ.