ފަލަސްތީނަށް ސަޕޯޓްކުރުމުން "ސްކްރީމް 7"ގެ އެކްޓްރެސްއަކު މަސައްކަތުން ދުރުކޮށްފި

އެމެރިކާގެ މަޝްހޫރު ފިލްމު ފްރެންޗައިޒް "ސްކްރީމް"ގެ ހަތް ވަނަ ފިލްމުގައި މަސައްކަތް ކުރަމުން އައި މެކްސިކޯގެ އެކްޓްރެސް މެލިސާ ބާރެރާ ފަލަސްތީނަށް ސަޕޯޓްކޮށް އިންސްޓަގްރާމްގައި ޕޯސްޓުތަކެއް ކުރުމުން އޭނާ މަސައްކަތުން ދުރުކޮށްފި އެވެ.

ބާރެރާ ވަނީ ފަލަސްތީނަށް ސަޕޯޓްކޮށް މިފަހުން އިންސްޓަގްރާމްގައި ގިނަ ޕޯސްޓުތަކެއް ކޮށްފަ އެވެ. އޭނާ ހިއްސާކުރި ޕޯސްޓުތަކުގެ ތެރޭގައި އިޒުރޭލުން އުޅެނީ ފަލަސްތީނުގެ ނަސްލު ނައްތާލަން ކަމަށާއި އިޒުރޭލުގެ އަމަލުތަކަކީ ލާއިންސާނީ އަމަލުތަކެއް ކަމަށް ބުނެފައި ހުއްޓެވެ.

އޭނާ މަސައްކަތުން ދުރުކުުރި ހަބަރު މީޑިއާ އަށް ތިލަވުމާ އެކު "ސްކްރީމް" ފްރެންޗައިޒްގެ ޕްރޮޑަކްޝަން ހައުސް ސްޕައިގްލާސް މީޑިއާ ގްރޫޕުން ނެރުނު ނޫސްބަޔާނެއްގައި ބުނީ ބާރެރާގެ ޕޯސްޓުތަކުގައި އިޒުރޭލުން ފަލަސްތީނުގެ ނަސްލު ނައްތާލަން އުޅޭ ކަމަށް ބުނެ ދޮގު ތުހުމަތުތަކެއް ކޮށްފައި ހުރި ކަމަށާއި އެހީ ސީދާ ޔަހޫދީންނާ މެދު ނަފުރަތު އުފެއްދުމަށް ހިއްސާކުރި ޕޯސްޓުތަކެއް ކަމަށް ވެސް ބުންޏެވެ.

އެ ކަހަލަ ތުހުމަތުތައް ވަރަށް ސީރިއަސްކޮށް ނަގާނެ ކަމަށާއި މިކަމުގައި އަމަލުކުރާނީ ކުންފުނީގެ "ޒީރޯ ޓޮލޮރެންސް" ޕޮލިސީ އަށް ކަމަށް ބަޔާނުގައި ބުންޏެވެ.

ބާރެރާ މަސައްކަތުން ދުރުކުރުމުން އެކަމާ ހިތްހަމަނުޖެހިގެން "ސްކްރީމް 7"ގެ ޑައިރެކްޓަރު ކްރިސްޓޮފާ ލަންޑޮން ވެސް ވަނީ އެކްސްގައި ޕޯސްޓެއް ކޮށްފަ އެވެ. އެކަމަކު މާ ގިނައިރުތަކެއް ނުވެ އޭނާ ވަނީ އެ ޕޯސްޓު ޑިލިޓްކޮށްފައިފަ އެވެ.

"މިއީ އަހަރެން ބުނާނެ ވާހަކަ އަކީ: ހުރިހާ ކަމެއް ކަޑަ. ހަޅޭ ނުލަވާ. މިއީ އަހަރެން ބޭނުންވި ގޮތެއް ނޫން،" އެ ޕޯސްޓުގައި ބުނެފައިވެ އެވެ.

މި މައްސަލާގައި ބާރެރާ އަދި މީޑިއާއާ އެއްވެސް ވާހަކައެއް ނުދައްކަ އެވެ.

ހޮލީވުޑްގައި ފަލަސްތީނަށް ސަޕޯޓްކޮށް ވާހަކަ ދައްކާ ތަރިންނާ ދެކޮޅަށް އެކި ކަހަލަ ފިއްތުންތައް ކުރިމަތިކުރުވުން މިހާރު ވަނީ އާންމުވެފަ އެވެ.

ބާރެރާ ވަނީ "ސްކްރީމް" ފްރެންޗައިޒްގެ ކުރީގެ ބައެއް ފިލްމުތަކުގައި ވެސް މަސައްކަތްކޮށްފަ އެވެ.