ރަމީލާ ފަރުވާއަށް ވަޑައިގަތުމުން މިނިސްޓްރީ ހިންގުން ޣައްސާނަށް

އެގްރިކަލްޗާ މިނިސްޓަރު ޑރ. އައިޝަތު ރަމީލާ ކެންސަރުގެ ފަރުވާއަށް ރާއްޖެއިން ބޭރަށް ފުރާވަޑައިގަތުމުން، އެ މިނިސްޓްރީ ހިންގުން ޑިފެންސް މިނިސްޓަރު ޣައްސާން މައުމޫނާ ވަގުތީގޮތުން ހަވާލުކޮށްފި އެވެ.

ރައީސް އޮފީހުން ބުނީ އެގްރިކަލްޗާ އެންޑް އެނިމަލް ވެލްފެއާ މިނިސްޓްރީ ހިންގުން، ޣައްސާނާ ހަވާލުކުރެއްވީ، ރަމީލާ މިދިޔަ މަހުގެ 23 ގައި ބޭރަށް ކުރެއްވި ދަތުރު ނިންމަވާލެއްވުމަށްފަހު ރާއްޖެ ވަޑައިގަންނަވަންދެން ކަމަށެވެ.

މިނިސްޓަރު މިދިޔަ ބުރާސްފަތި ދުވަހު ލިޔުއްވި ފޭސްބުކް ޕޯސްޓުގައި ވިދާޅުވީ ކެންސަރަށް ޑައިގްނޯސްވުމާ ގުޅިގެން ކީމޯ އާއި ރޭޑިއޭޝަން ތެރަޕީ ނެގުމަށް ރާއްޖެއިން ބޭރަށް ވަޑައިގަންނަވަން ނިންމަވާފައިވާ ކަމަށެވެ.

އެ ބަލި ޖެހިފައިވާކަން އެނގުނީ ކެންސަރުގެ އެންމެ ފަހު ސްޓޭޖުގައި ހުއްޓާ ކަމަށް ވެސް އޭނާ ވިދާޅުވި އެވެ. ނަމަވެސް، ކެންސަރުގެ ތަފްސީލެއް ނުދެއްވަ އެވެ.

ރަމީލާގެ ޕޯސްޓުގައި ވިދާޅުވީ ހައިޕެކް ފަރުވާ ހޯއްދަވަން ވަޑައިގަންނަވާ ކަމަށެވެ. އެ ފަރުވާ އާއްމުކޮށް ދެނީ ބަނޑުގެ ކެންސަރަށެވެ.

"ވަރަށް ބަރު ހިތަކާ އެކު މި ވަގުތަށް އެންމެންނާ މި ވަކިވަނީ. ﷲގެ އިރާދަފުޅާ އެކު އަލުން ބައްދަލުވާނެ." ރަމީލާގެ ޕޯސްޓުގައި ލިޔުއްވާފައިވެ އެވެ.

ނަރުހެއްގެ ގޮތުގައި 1990 ވަނަ އަހަރު މަސައްކަތް ފެއްޓެވި ރަމީލާ ވަނީ ހެލްތު މިނިސްޓްރީގެ ސްޓޭޓް މިނިސްޓަރުކަން ދެ ފަހަރެއްގެ މަތިން ކުރިން ކުރައްވައިފަ އެވެ.