ސްޓެލްކޯގެ އާ ޗެއާމަނަކަށް ކުރީގެ ޑީއެމްޑީ ލަތީފު، އެޗްޑީސީއަށް އާ ބޯޑެއް

ސްޓެލްކޯގެ އާ ޗެއާމަނަކަށް އެ ކުންފުނީގައި 34 އަހަރު ވަންދެން މަސައްކަތް ކުރެއްވި އަދި އެންމެ ފަހުން ޑެޕިއުޓީ މެނޭޖިން ޑިރެކްޓަރު (ޑީއެމްޑީ) ގެ މަގާމު ފުރުއްވި މުހައްމަދު ލަތީފު އިއްޔެ އައްޔަންކޮށްފި އެވެ.

މޯލްޑިވްސް އިލެކްޓްރިސިޓީ ބޯޑު ހިންގި ދުވަސްވަރު އެ ތަނުގެ އިނގިރޭސި ސެކްރެޓަރީއެއްގެ ވަޒީފާ އިން ހިދުމަތް ފެއްޓެވި ލަތީފު ވަނީ ސްޓެލްކޯގެ މެނޭޖިން ޑިރެކްޓަރުކަން 8 މަސް ވަންދެން އަދި ޑެޕިއުޓީ މެނޭޖިން ޑިރެކްޓަރުކަން 10 އަހަރު ވަންދެން ކުރައްވައިފަ އެވެ.

އޭނާގެ އުމުރުން 65 އަހަރު ވުމުން ހިދުމަތުން ރިޓަޔާ ކުރެއްވީ މިދިޔަ ނޮވެމްބަރު 27 ގަ އެވެ.

ލަތީފު ވަނީ ރާއްޖޭގެ ކަރަންޓު ހިދުމަތުގައި އެކި މަރުހަލާތަކުގައި އެކި މަގާމުތައް ފުރުއްވައި ބޮޑެތި ތަޖުރިބާތަކެއް ހޯއްދަވައިފަ އެވެ.

ސްޓެލްކޯގެ ޗެއާމަންގެ މަގާމުގައި އެންމެ ފަހުން ހުންނެވީ ކުރީގެ ބްރިގޭޑިއާ ޖެނެރަލް އަދި ސިފައިންގެ އަށް ބޮޑެތި ހިދުމަތްތަކެއް ކުރެއްވި އިބްރާހިމް މުހައްމަދު ދީދީ އެވެ. ލަތީފަށް އެ ކުންފުނީގެ ޗެއާމަންކަން ދިނީ މިދިޔަ ހޯމަ ދުވަހު ދީދީ އިސްތިއުފާ ދެއްވުމުންނެވެ.

މި ސަރުކާރުގައި ސްޓެލްކޯގެ މެނޭޖިން ޑިރެކްޓަރުކަން ވެސް ރައީސް ޑރ. މުހައްމަދު މުއިއްޒު ދެއްވީ އެ ކުންފުނީގައި މިހާތަނަށް 25 އަހަރު ހޭދަކުރައްވައި ބޮޑެތި ތަޖުރިބާތަކެއް ހޯއްދަވާފައިވާ ހުސައިން ފަހުމީއަށެވެ. އަދި އޭނާގެ ދަށުން އެންމެ އިސްކޮށް މަސައްކަތްކުރަން ދެ ޑެޕިއުޓީ މެނޭޖިން ޑިރެކްޓަރުން ވެސް އައްޔަން ކުރެއްވީ ސްޓެލްކޯގެ ތެރެއިންނެވެ.

އާ ރައީސް ޑރ. މުހައްމަދު މުއިއްޒު ބޭނުންފުޅުވެގެން ޕީސީބީން އިއްޔެ ވަނީ ސްޓެލްކޯގެ ޗެއާމަންކަމަށް ލަތީފު ހަމަޖެއްސެވުމުގެ އިތުރުން ހުޅުމާލެ ބަލަހައްޓާ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ބޯޑުން ކުރީގެ މެމްބަރުން ވަކިކޮށް، އާ މެމްބަރުން އިއްޔެ އައްޔަން ކޮށްފަ އެވެ.

އެއީ:

1- އާރިފް އަބްދުއްސަމަދު (ދަފްތަރު ނަމްބަރު ރސ9241)

2- މުހައްމަދު ވިޝާމް (ވ. ވަސްމީރުފިޔަ)

3- އުލާ މުހައްމަދު ރަޝީދު (ގ. ގަސްކަރަ)

4- އިބްރާހިމް ޔޫސުފްފުޅު (އަތިރީގެ، ނ. ވެލިދޫ)

5- އަޒްހަރު އަބްދުﷲ ސައީދު (ސީނާޒް، ގދ. މަޑަވެލި)

6- މުހައްމަދު ވަހީދު (މަބުސްތާނުގެ، ހއ. ފިއްލަދޫ)

މި ހަ ބޭފުޅުންގެ ތެރެއިން އިބްރާހިމް ޔޫސުފްފުޅަކީ ޓޫރިޒަމް މިނިސްޓަރުގެ ނައިބެވެ. އަދި ވިޝާމަކީ ބަންޑާރަ ނައިބު އަހުމަދު އުޝާމްގެ ބޭބެ އެވެ.

މި ބޭބޭފުޅުންގެ އިތުރުން ސްޓެލްކޯގެ ޗެއާމަނަކަށް މަޝްހޫރު ވިޔަފާރިވެރިޔާ އާމިރު މަންސޫރު އަދި އާސަންދަ ކުންފުނީގެ ބޯޑަށް ގދ. ފިޔޯރީ މަލަމަތި، ފައިސަލް އިބްރާހިމް ވެސް ވަނީ އިއްޔެ އައްޔަންކޮށްފަ އެވެ.