އާސެނަލް ބަލިކުރުމަށް ފަހު ތަށީގެ ވާހަކަ އެމެރީ ފަށައިފި

ބާމިންހަމް (ޑިސެމްބަރު 10) - އެސްޓަން ވިލާ އަށް މިހާރު ތަށީގެ ވާހަކައާ ޑީލް ކުރެވޭނެ ކަމަށް، ރޭ އާސެނަލްގެ މައްޗަށް 1-0 މޮޅުވި މެޗަށް ފަހު، ވިލާގެ ކޯޗު އުނައި އެމެރީ ބުނެފި އެވެ.

މިދިޔަ ބުދަ ދުވަހުގެ ރޭ، ވިލާއިން ވަނީ މެންޗެސްޓާ ސިޓީ ވެސް ބަލިކޮށްފަ އެވެ. މެޗުގައި އާސެނަލް ކޮޅަށް ލަނޑު ޖެހީ ޖޯން މެގިން އެވެ.

މެޗަށް ފަހު އާސެނަލްގެ ކޯޗު މިކަލް އާޓެޓާ ބުނީ ތައްޓަށް ވާދަ ކުރުމުގެ ފެންވަރު ވިލާގެ ކިބައިގައި އެބަ ހުރި ކަމަށެވެ. ކުރިން ކުޅުނު މެޗަށް ފަހު ސިޓީގެ ކޯޗު ޕެޕް ގާޑިއޯލާ ވެސް ބުނީ އެހެންނެވެ.

އެހެންނަމަވެސް އޭރު އެމެރީ ބުނީ އެ ވާހަކަ ދައްކަން އަދި ވަގުތު ނުޖެހޭ ކަމަށެވެ. ރޭގެ މެޗަށް ފަހު އޭނާގެ ވާހަކަ ވަނީ ބަދަލު ވެފަ އެވެ.

އޭނާ ބުނީ ތައްޓާ ގުޅުވައި ވިލާގެ ކުޅުންތެރިންނާ ބެހޭ ވާހަކަ ދެއްކުމަކީ ޓީމަށް ރަނގަޅެއް ކަމަށެވެ.

"އާނ، (އެ ވާހަކަ ދެއްކީމަ) އަހަންނަށް މާ ރަނގަޅު. އަހަރެމެން އެ ހިސާބުގައި މިތިބީ އެކަން ހައްގުވާތީ. އެމީހުން އަހަރެމެންނާ ބެހޭގޮތުން އިތުރަށް ވާހަކަ ދައްކާނެ. އަދިވެސް އަހަރެން އެ މީހުންނަށް އަދި ކަލޭމެންނަށް [މީޑިއާ އަށް ] މި ފޮނުވަނީ ހަމަ އެއް މެސެޖެއް. ހިތްހަމަޖެހިގެން އަހަރެމެން ތިބެން ޖެހެނީ. މޯޓިވޭޓްވާން ޖެހޭ،" މެޗަށް ފަހު އެމެރީ ބުންޏެވެ.

"މިހާރު އަހަރެމެން ތިން ވަނައިގައި އޮތް ނަމަވެސް ގަދަ ހަތެއްގައި ހިމެނުމަށް އަހަރެމެންނަށް ވުރެ ބޮޑު ވާދަވެރި ހަތް ޓީމެއް އަދިވެސް އެބަ އޮތް. ސީޒަންގެ 30 ވަނަ ނުވަތަ 32 ވަނަ މެޗަށް ދާއިރު ހަމަ އެ މަގާމުގައި އޮވެވިއްޖެނަމަ އެހެން މެސެޖެއް ދެވިދާނެ."

އާސަނަލް ބަލިވުމުން، އެ ޓީމު ވަނީ ދެވަނަ އަށް ވެއްޓިފަ އެވެ. މިހާރު އެއްވަނައިގައި އޮތީ ރޭ ފަހަތުން އަރައި ކްރިސްޓަލް ޕެލަސްގެ މައްޗަށް 2-1 އިން ކުރިހޯދި ލިވަޕޫލެވެ.