"ލާ ލާ ލޭންޑް" އާ މެދު ފަހުރުވެރިވަން: ރަޔަން ގޮސްލިން

"ލާ ލާ ލޭންޑް" ގިނަ ބަޔަކަށް ކަމުގޮސްފި ކަމަށާއި ފިލްމުގެ ކާމިޔާބީއާ މެދު ވަރަށް ފަހުރުވެރިވާ ކަމަށް އެ ފިލްމުގެ ބަތަލު ރަޔަން ގޮސްލިން ބުނެފި އެވެ.

ގޯލްޑެން ގްލޯބް އެވޯޑްސްގައި ހަތް ކެޓަގަރީއަކުން ނޮމިނޭޓްވެ، އެ ހަތް ކެޓަގަރީން ވެސް އެ ފިލްމް އެވޯޑްތައް އުފުލައިލި އިރު، މި މަހު ބާއްވާ އޮސްކާ އެވޯޑްގައި "ލާ ލާ ލޭންޑް" އަށް ވަނީ 14 ނޮމިނޭޝަންސް ލިބިފަ އެވެ.

މިއީ އޮސްކާގެ ތާރީހުގައި ވެސް މިއުޒިކަލް/ކޮމެޑީއަކަށް މިހާ ބޮޑު ކާމިޔާބީއެއް ލިބުނު މަދު ފަހަރުތަކުގެ ތެރެއިން ފަހަރެކެވެ. އެހެންވެ "ލާ ލާ ލޭންޑް" ގެ ޓީމް އޮތީ ވަރަށް އުފަލުންނެވެ.

އެ ފިލްމުން މޮޅު އެކްޓަރުގެ އެވޯޑް ގޯލްޑެން ގްލޯބް ރަޔަން އުފުލާލައިފައިވާ އިރު، އޮސްކާގައި ވެސް އެންމެ މޮޅު އެކްޓަރުގެ އެވޯޑް އޭނާ އުފުލައިލާނެ ކަމަށް ގިނަ ބަޔަކު އުންމީދު ކުރެ އެވެ.

ޑެމިއަން ޗެޒެލް ޑައިރެކްޓްކޮށްފައިވާ "ލާ ލާ ލާންޑާ" ބެހޭ ގޮތުން ރަޔަން ބުނީ ފިލްމަށް ލިބުނީ ހަގީގަތުގައި ވެސް އުންމީދު ކުރި ވަރަށް ވުރެ މާ ބޮޑު ކާމިޔާބީއެއް ކަމަށެވެ. އެހެންވެ އެ ފިލްމަކީ އެއްގޮތަކަށް ވެސް އާދައިގެ ފިލްމެއް ނޫންކަން ސާބިތުކޮށް ދެވިއްޖެ ކަމަށް ވެސް އޭނާ ބުންޏެވެ.

"އަހަރެން ކުރިން ހީކޮށްގެން ހުރީ މި ފިލްމަކީ ގިނަ ބަޔަކަށް ބަލައި ގަންނާނެ ކަހަލަ ފިލްމަކަށް ހަދަން އަހަރަމެން ވަރަށް ގިނަ މަސައްކަތްތަކެއް ކުރަން ޖެހޭނެ ކަމަށް،" ހޮލީވުޑް ރިޕޯޓާ އަށް ދިން އިންޓަވިއުއެއްގައި ރަޔަން ބުންޏެވެ. "އެކަމަކު ކަން ދިމާ ކުރި ގޮތުން އެހެނެއް ނުވި. ފިލްމް ބަލާ މީހުންނަށާއި ކްރިޓިކުންގެ އިތުރުން އެވޯޑްތަކުގެ ފެވަރިޓަކަށް ވެސް ލާ ލާ ލޭންޑްވުމަކީ ކުޑަ ކަމެއް ނޫން. މި ފިލްމް ތިން ހަތަރު ފަހަރު ބެލި މީހުންނާ ވެސް ދިމާވެފައި އެބަހުރި."

އޭނާ އަދި ބުނީ މި ފަހަރު އެންމެ މޮޅު ބަތަލުގެ އޮސްކާ އަށް ވަރަށް ބޮޑަށް އުންމީދު ކުރާ ކަމަށެވެ.

މީގެ ކުރިން ވެސް އޭނާ އެ އެވޯޑަށް ވާދަ ކުރި އެވެ. އެއީ 2006 ގައި ރިލީޒްވި "ހާފް ނެލްސަން" އިންނެވެ.

ރަޔަން ބުނީ އޮސްކާ އަށް މިހާރު ވަރަށް ބޮޑަށް ތައްޔާރުވަމުން އަންނަ ކަމަށެވެ. އަދި މި ފަހަރު އޮސްކާ އެވޯޑް ހަފުލާގައި އިންނަން ބޭނުން ވަނީ ބަތަލާ މެރީލް ސްޓްރީޕް ކައިރީގައި ކަމަށް ވެސް އޭނާ ބުންޏެވެ.

ސްކްރީން އެކްޓާސް ގިލްޑް (އެސްއޭޖީ) އެވޯޑް ހަފުލާގައި ސްޓްރީޕް ކައިރީގައި އިންނަން ފުރުސަތު ލިބުމުން، އެކަން ރަޔަން އަށްވީ ވަރަށް ހާއްސަ ކަމަކަށެވެ.

"ލާ ލާ ލޭންޑް" ގެ ކާމިޔާބީ އަށް ފަހު، ރަޔަން، 36، އާއި އެ ފިލްމްގެ ޑައިރެކްޓަރު ޑެމިއަން މިހާރު އަންނަނީ އަނެއްކާ ވެސް އާ ޕްރޮޖެކްޓަކަށް ތައްޔާރުވަމުންނެވެ.

އެއީ އެންމެ ފުރަތަމަ ހަނދަށް ދިޔަ އެމެރިކާގެ ނީލް އާމްސްޓްރޯންގްގެ ހަޔާތުގެ މައްޗަށް ބިނާކޮށް ހަދާ ފިލްމަށެވެ. އެ ފިލްމުގައި ނީލްގެ ރޯލް ކުޅޭނީ ރަޔަން އެވެ.