ސާހިލް ކޯޓުގައި ވެސް ހުރީ ހަނު، ދައުލަތުން އޭނާ އަށް ވަކީލުން ނުދޭން ނިންމައިފި

މިދިޔަ އަހަރު މާލޭގެ ގެއެއްގެ ތެރޭގައި އަނިޔާވެރި ގޮތަކަށް އަންހެނަކު މަރާލި މައްސަލާގައި ދައުވާލިބޭ ސާހިލް އަލީ ޝަރީއަތުގައި ވެސް ވާހަކަ ދައްކަން ދެކޮޅު ހަދާފައިވާ ކަމަށާއި ވަކީލުންނަށް އެއްބާރުލުން ނުދޭތީ ދައުލަތުން އޭނާ އަށް އިތުރަށް ވަކީލުން ނުދޭނެ ކަމަށް ކްރިމިނަލް ކޯޓުން ބުނެފި އެވެ.

މިދިޔަ އަހަރު މާލޭގެ ގެއެއްގެ ތެރޭގައި ޝިއާއު މުހައްމަދު ސައީދު މަރާލުމަށް ފަހު އޭނާގެ ހަށިގަނޑަށް ބޮޑެތި ގެއްލުންތަކެއް ދިން މައްސަލާގައި ފ. ނިލަންދޫ ފިނިފެންމާގޭ ސާހިލްގެ މައްޗަށް ފަސް ދައުވާއެއް ކުރާއިރު، އެ ދައުވާތަކުގެ ޝަރީއަތް ކުރިއަށް ގެންދަނީ ސިއްރު ކޮށްގެންނެވެ.

ކްރިމިނަލް ކޯޓުން ބުނިގޮތުގައި މިއަދު ބޭއްވި އަޑުއެހުމުގައި ސާހިލް ވާހަކަ ދައްކަން ދެކޮޅު ހަދާފައިވާ ކަމަށެވެ. ނަމަވެސް ދައުވާ އަށް ޖަވާބުދާރީ ނުވެވޭ ފަދަ ނުކުޅެދުންތެރިކަމެއް އޭނާގެ ކިބައިން ނުފެންނަ ކަމަށް ކޯޓުން ބުންޏެވެ.

ކޯޓުން ބުނިގޮތުގައި ސާހިލް އަށް ދައުލަތުގެ ހަރަދުގައި ދެ ފަހަރަކު ވަކީލުން ހަމަޖައްސައި ދިނުމުން ވެސް، އޭނާ ވަކީލުންނަށް އެއްބާރުލުން ނުދޭތީ އިތުރަށް ދައުލަތުގެ ހަރަދުގައި ވަކީލުން އޭނާ އަށް ހަމަޖައްސައި ނުދޭން އެޓާނީ ޖެނެރަލްގެ އޮފީހުން މިހާރު ވަނީ ނިންމައިފަ އެވެ.

އެ މައްސަލާގައި މިއަދު ބޭއްވި އަޑުއެހުމުގައި ހެކި ރައްކާތެރި ކުރުމުގެ އަމުރެއް ނެރުމަށް ފަހު، މައްސަލައިގެ ލިޔުންތައް ކޯޓުގައި ހުރެގެން ބެލޭނެ އިންތިޒާމު ސާހިލް އަށް އޮންނާނެ ކަން އޭނާ އަށް އަންގާފައިވާ ކަމަށް ކޯޓުން ބުންޏެވެ.

ދެން އޮންނަ އަޑުއެހުމެއްގައި ސާހިލްގެ ފަރާތުން ޖަވާބުދާރީވާން ފުރުސަތު ދީފައިވާ ކަމަށް ކޯޓުން ބުންޏެވެ.