ދުނިޔޭގެ އަރަބި ބަހުގެ ދުވަސް ފާހަގަކުރަން މިއަދު ހާއްސަ އިވެންޓެއް

އަރަބި ބަހުގެ ދުވަސް ފާހަގަ ކުރުމުގެ ގޮތުން މިއަދު ހަވީރު ހާއްސަ އިވެންޓެއް ކުރިއަށް ގެންދިއުމަށް ސައުދީ އެމްބަސީން ނިންމައިފި އެވެ.

އަރަބި ބަހުގެ ދުވަސް ފާހަގަ ކުރަނީ ކޮންމެ އަހަރެއްގެ ވެސް ޑިސެމްބަރު 18 ވަނަ ދުވަހު އެވެ.

މާލޭގައި ހުންނަ ސައިދީ އެމްބަސީގެ އޮފިޝަލަކު "މިހާރު" އަށް ވިދާޅުވީ އެ އިވެންޓު ކުރިއަށްދާނީ ހަވީރު 4:00 އިން އިރުއޮއްސި 6:00 އަށް ކަމަށެވެ.

އެ އިވެންޓުގައި އާޓިފިޝަލް ބީޗުގައި ސްޓޯލްތަކެއް ބަހައްޓައި އަރަބި ބަހާއި އަރަބި ކުރިއެރުވުމަށް ރާއްޖެއިން ކުރާ މަސައްކަތްތަކާ ގުޅޭގޮތުން މައުލޫމާތު ދޭނެ އެވެ. އަދި ސައުދީގައި ކިޔެވުމަށް ހުރި ފުރުސަތުތަކާ ގުޅޭ މައުލޫމާތު ދިނުމާއި އަރަބި ލިޔުން (ކެލިގްރަފީ) އާއި އަރަބި ޅެން ހެދުން ވެސް ކުރިއަށްދާނެ ކަމަށް އެމްބަސީން ބުންޏެވެ.

ސައުދީ އެމްބަސީން އިސްނަގައިގެން ކުރިއަށް ގެންދާ އެ އިވެންޓުގައި ރާއްޖޭގެ ފަރާތުން މައުލޫމާތު ދިނުމަށާއި އިވެންޓުގެ ހަރަކާތްތަކުގައި ބައިވެރިވާނީ އިސްލާމިކް މިނިސްޓްރީ އާއި އެމްއެންޔޫ އާއި އަރަބިއްޔާ ސްކޫލާއި އިސްލާމިކް ޔުނިވާސިޓީ އާއި އިލްމް އިންސްޓިޓިއުޓްގެ އިތުރުން އެވިޑް ކޮލެޖުގެ ބޭފުޅުންނެވެ.